KAROA 6
David Na Se Gari
O garimu neganai, oi be dahaka o karamu?— Reana sinamu bona tamamu o heau henidiamu bae durumu totona. To oi baine durumu diba tauna ma ta na noho. Ia ena siahu na ma ta ena siahu ida basita haheḡereḡerea diba. Oi mai dibamu una be daika?— Oibe, una na Iehova Dirava. Mani Baibel ai mero ta ladana David aita herevalaia. Ia na se gariva badina mai dibana Iehova ese hanaihanai baine durua.
David na maraḡina amo tamana sinana ese e hadibaiava Iehova baine lalokau henia. Una ese e durua ḡau ta garina basine gari. Ia na mai dibana Iehova na ia Turana bona ia iduruna Tauna. Nega ta, David na mamoe e naridiava lalonai, leona badana ta ese mamoe ta e koria bona e heaulaia. Oi mai dibamu David be dahaka e kara? Ia ese leona e havaia bona imana kavakava amo e alaia! Bona bea ta ese mamoe e urava baine alaia neganai, David ese una bea danu e alaia mase! O laloamu daika ese David e durua?— Oibe, Iehova ese e durua.
Nega ma ta ai David ese gari lasi karana e hahedinaraia. Israel taudia na Filistia taudia ese e tuari henidiava. Filistia tuari tauna ta na tau lata-lata, ia na giant ta! Ladana na Goliata. Ia ese Israel edia tuari taudia bona Iehova e kirikirilaidiava. Bona Israel taudia e hauradiava ia bae tuari henia. To idia iboudiai na e gariva ia ituari henina. David e kamonai neganai, Goliata e hamaoroa: ‘Lau ese oi baina tuari henimu. Iehova ese baine durugu bena baina hadareremumu!’ O laloamu David e gari?— Lasi. Bena gabeai dahaka e vara? O uramu ba diba?
David ese ena ivilipopo bona nadi manada-manadadia faiv e abi, bena ela Goliata baine tuari henia. Goliata ese David e itaia neganai e kirikirilaia badina ia na mero matamatana. To David ese e hamaoroa: ‘Oi be mai daremu ida oma, a lau be Iehova ladanai nama!’ Bena ena ivilipopo ai nadi ta e udaia, Goliata e heau henia bona maoromaoro e dave henia. Una nadi na Goliata bagunai e tubu! Goliata na tano ai e moru, e mase! Filistia taudia na e gari dikadika dainai iboudiai e heau. Ena be David na mero matamata to dahaka dainai una giant e hadarerea?— Iehova ese e durua, bona Iehova ena siahu ese giant ena siahu e hereaia!
David na se gari badina mai dibana Iehova ese baine durua
David sivaraina amo dahaka ome diba?— Iehova ena siahu na ta ena siahu ida basita haheḡereḡerea diba. Bona ia na oi Turamu. Una dainai, bema gabeai o garimu, ba helalotao, Iehova na oi baine durumu diba!
