KAROA 7
Nega Haida Oi Na Sibomu Bona O Garimu, A?
Mani ina meromero a itaia. Ia na sibona bona e garimu, ani? Nega ta oiemu ai unu e vara toma?— Taunimanima iboudiai ediai una na e varamu. Baibel ai Iehova turana haida danu e laloava idia na sibodia bona e gariva. Ta be Elia. Mani ia sivaraina aita itaia.
Idaunegai, Iesu do se vara neganai, Elia na Israel ai e nohova. Ahaba, Israel edia king na Dirava momokanina, Iehova, se tomadiho heniava. Ia bona adavana Iesebel na dirava koikoina Baal e tomadiho heniava. Una dainai, Israel ai momo danu Baal e tomadiho heniava. Kwin Iesebel na hahine dikana bona e urava Iehova e tomadiho heniava taudia iboudiai, Elia danu, baine hamasedia! Oi mai dibamu Elia be dahaka e kara?—
Elia na e heau boio! Tano ḡaḡaena ela bona nadi kohuana ta ai e ha komu. O lalomu dahaka dainai e komu?— Oibe, ia na e gariva. To Elia na basinema
gari. Dahaka dainai? Badina ia na mai dibana Iehova ese baine durua diba. Guna Iehova ese ena siahu na Elia enai e hahedinaraia. Nega ta, Iehova ese Elia ena ḡuriḡuri e haerelaia dalana na guba amo lahi e siaia. Una dainai, hari danu Iehova ese Elia baine durua diba!Elia nadi kohuana ai e komuva neganai, Iehova ese e nanadaia: “Dahaka o karamu iniseni ai?” Elia e haere: ‘Lau mo sibogu oi na tomadiho henimumu. Bae alagu garina na garimu.’ Elia na e laloava Iehova e tomadiho heniava taudia iboudiai na e aladia ore. To Iehova ese e hamaoroa: ‘Una na dia momokani. Taunimanima 7,000 na dounu lau e tomadiho henigumu. Basio gari. Ḡaukara ma haida ba henimumu!’ O laloamu Elia e moale una hereva e kamonaia neganai?—
Elia enai e vara ḡauna amo dahaka ome diba?— Oi na dia sibomu bona basio gari. Oi na mai turamu, idia ese Iehova e lalokau heniamu bona oi danu e lalokau henimumu. Danu, Iehova ena siahu na bada herea, bona hanaihanai baine durumu! Ome diba oi na dia sibomu dainai o moalemu?—
EMU BAIBEL AI BA DUAHI