KAROA 11
Iesu Sivaraina E Torea Taudia
Ina laulau ai ini tatau o itadiamu?— Idia na Mataio, Mareko, Luka, Ioane, Petro, Iakobo, Iuda bona Paulo. Idia na Iesu ena negai e nohova taudia, bona idia ese Iesu sivaraina e torea. Mani idia sivaraidia aita ita.
Ini tatau be daidia?
Idia tatoi na Iesu ida e haroro aposetolo taudia. Mai dibamu idia be daidia?— Mataio, Ioane bona Petro. Mataio bona Ioane na Iesu ida e tubu hebou, idia ese Iesu maraḡina amo ela bona e bada sivaraidia e
tore. Aposetolo Ioane ese Apokalupo bukana bona revareva toi, Ioane Ginigunana, Ioane Iharuana, bona Ioane Ihatoina e toredia. Aposetolo Petro ese Baibel ai revareva rua e toredia. Unu revareva na Petro Ginigunana bona Petro Iharuana. Iena revareva iharuanai, Iehova na guba amo Iesu e hanamoa negana e herevalaia bona ini e gwauraia toma: ‘Ina na lau natugu. Na lalokau heniamu, bona na lalo namo heniamu.’Laulau ai, ini tatau haida ese danu Iesu sivaraina e tore. Idia ta na Mareko. Iesu e dogoatao neganai, reana ia danu noho bona e vara ḡaudia iboudiai e ita. Ma ta be Luka. Una nega ai, ia na dokta ta bona reana Iesu e mase murinai, Keristani tauna ai ela.
Laulau ai, Baibel e torea tataudia rarua na Iesu tadina. Ladadia mai dibamu?— Ladadia na Iakobo bona Iuda. Matamanai, idia ese Iesu na asie hamomokaniava. Idia na e laloava Iesu na e kavaiava. To gabeai Iesu e abia dae bena Keristani taudia ai ela.
Laulau ai, Baibel e torea tauna orena na Paulo. Keristani tauna ai do sela neganai, ia ladana na Saulo. Ia ese Keristani taudia na se ura henidiava bona e daḡedaḡe henidiava. Oi mai dibamu dahaka dainai Paulo na gabeai Keristani tauna ai ela?— Nega ta, dala amo e laova lalonai guba amo gado ta e kamonaia. Una na Iesu gadona! Bena Paulo e nanadaia: ‘Dahaka dainai lau e abidadama henigumu taudia o daḡedaḡe henidiamu?’ Una murinai, Paulo ese ena kara e haidaua bena Keristani tauna ai ela. Baibel lalonai buka 14, Roma ela Heberu, na Paulo ese e toredia.
Dina ta ta Baibel na ta duahimu, ani?— Baibel baita duahiamu neganai Iesu sivaraina baita dibamu. O uramu Iesu sivaraina ma haida ba diba?—
EMU BAIBEL AI BA DUAHI