KAROA 3
Rahaba Na Iehova E Abidadama Henia
Mani aita laloa, ita na Ieriko hanuanai. Ieriko hanuana na Kanana tanonai, bona Ieriko taudia ese Iehova na se abidadama heniamu. Hahine ta ladana Rahaba na ina hanua ai e nohomu.
Rahaba maraḡinai ia na e kamonai Mose ese Davara Kakakakana e hapararaia bona Aigupito amo Israel taudia e hakaudia lasi. Danu, e kamonai Iehova ese idia na e durudia bena inaidia e halusidia. Hari ma eme kamonai Israel taudia na Ieriko badinai e kamepamu!
Rahaba na Iehova e abidadama henia dainai hasinadoa taudia e hunidia
Adorahi ta, Israel tatau rarua na Ieriko hanuana ema bae hasinadoa totona. Idia na Rahaba ena ruma ela. Bena ia ese e boiridia vareai unuseniai bae noho. Una hanuaboi ai, Ieriko pavapavana na e kamonai tatau haida na hanua lalonai, bona idia na Rahaba ena ruma ela. Una dainai pavapava ese tatau haida e siaidia idia bae abidia. Rahaba ese hasinadoa taudia na ena ruma guhinai e hunidia, bena pavapava ena hesiai taudia e hamaorodia: ‘Momokani, lau dekegu ema, to hanua amo deme raka lasi. Muridia amo aola haraḡa, bena ba davaridia.’ Oi mai dibamu dahaka dainai Rahaba ese hasinadoa taudia e hunidia?— Badina ia na Iehova e abidadama henia, bona e diba Iehova ese Kanana tanona na Israel taudia baine henidia.
Iehova ese Rahaba bona ena bese e hamauridia
Hasinadoa taudia na do asie ela ai, idia na Rahaba e gwauhamata henia Ieriko bae hadikaia neganai, ia bona ena ruma bese na bae mauri. Oi mai dibamu, Rahaba be e hamaoroa dahaka baine kara?— Rahaba e hamaoroa: ‘Ina varo kakakakana na gaba mauru ai ba kwatua kau. Bema unu bo kara tomamu, emu ruma taudia iboudiai be maurimu.’ Rahaba na hasinadoa taudia ese e hamaoroa heḡereḡerena e kara. Bena dahaka e vara?—
Dina haida muridiai, Israel taudia na asi reḡereḡeredia Ieriko hanuana e rakaia heḡeḡe. Dina siks lalodiai hanua e ḡeḡea, unu dina ta ta ai hanua na nega tamona e ḡeḡea. To dina namba seven ai, nega seven hanua e ḡeḡea. Bena iboudiai e lolo badabada. Iehova ese hanua maḡuna ibounai e hamorua. To varo kakakakana e hetaudae rumana mo gini! Ina laulau lalonai o itaiamu, a?— Rahaba bona ena ruma bese na e mauri!
Rahaba ena amo dahaka o dibamu?— Rahaba na Iehova e abidadama henia badina ia sivaraina momo e diba. Oi danu Iehova sivaraina momo do dibamu. Iehova o abidadama heniamu Rahaba heḡereḡerena, a?—Ai na mai dibamai oi na Iehova o abidadama heniamu!
