KAROA 2
Rebeka Na E Ura Iehova Baine Hamoalea
Rebeka na Iehova e lalokau heniava hahinena. Ia adavana ladana na Isaak. Ia danu Iehova e lalokau heniava. Rebeka bona Isaak be ede e hedavari toma bena e headava? Rebeka be edena dalai e urava Iehova baine hamoalea? Mani ia sivaraina aita itaia.
Isaak tamana be Abraham bona sinana be Sara. Idia na Kanana ai e nohova, una tano taudia ese Iehova na asie tomadiho heniava. To Abraham na e urava natuna na Iehova e tomadiho heniava kekenina baine adavaia. Una dainai, ena hesiai tauna, reana Eliesere, e siaia Haran bainela, Isaak adavana baine ha tahua. Haran na Abraham varavarana e nohova gabuna.
Rebeka na e ura baine hekwarahi kamelo ranu baine henidia
Eliesere na Abraham ena hesiai taudia ma haida ida ela. Idia na gabu daudau e rakaia. Idia ese aniani bona harihari ḡaudia na kamelo ten latadiai e ato bena e laohai. To, Eliesere ese Isaak baine adavaia kekenina be ede baine abia-hidi toma? Haran ai e kau neganai, ranu guri badinai e nari, badina ia na dibana hanua taudia na baema ranu baeme utu. Iehova e ḡuriḡuri henia bena e gwa: ‘Bema hane-ulato ta baina noia lau ranu taina baine henigu, bena dia lau mo baine henigu to egu kamelo danu, baina diba o abia-hidi hane-ulatona bunai.’
Bena Rebeka na ranu gurina ela. Baibel ese e gwauraiamu ia na mai hairana. Eliesere ese e noia ranu taina baine henia, bena Rebeka e gwa: ‘Namo, madi ba inu, bona bainala ranu ma haida baina utu emu kamelo baina ha inulaidia.’ Mani a laloa! Kamelo na ranu momo herea e inumu, una dainai Rebeka na ranu gurina e lao loulouva ranu e utuva. Laulau o itaiamu, ia na e hekwarahi bada hereamu, ani?— Eliesere na Iehova ese ena ḡuriḡuri e haerelaia dalana e itaia neganai e hoa.
Rebeka na Eliesere ida Kanana ela bona Isaak e adavaia
Eliesere ese harihari ḡaudia namodia momo na Rebeka e henia. Ia ese Eliesere bona hesiai taudia ma haida e boiridia ia tamana ena ruma baela. Bena Eliesere na Rebeka ena bese vairadiai Abraham ese e siaia badina, bona Iehova ese ena ḡuriḡuri e haerelaia dalana e herevalaia. Una dainai, idia na e moale Rebeka ese Isaak baine adavaia.
To o laloamu Rebeka e ura Isaak baine adavaia?— Rebeka na e diba Eliesere na Iehova ese e siaia. Una dainai, ena bese ese e nanadaia bema ia na e uramu bainela Kanana ai Isaak baine adavaia neganai, ia eto: ‘Oibe, na uramu bainala.’ Bena Eliesere ida ela. Kanana ai e kau neganai, Isaak ida e headava.
Rebeka ese Iehova ena ura e badinaia dainai, Iehova ese e hanamoa. Laḡani momo muridiai, Iesu na iena bese amo e vara! Bema Rebeka heḡereḡerena Iehova bo hamoaleamu, Iehova ese oi danu be hanamomumu.
