Samuel na maraḡina amo kalaga helaḡana ai e nohova bona e ḡaukarava, taunimanima na una gabu ai Iehova e tomadiho heniava. Oi mai dibamu, dahaka dainai Samuel na kalaga helaḡana ai e nohova? Mani Samuel sinana Hana sivaraina aita itaia.

Hana na nega daudau lalonai e urava natuna ta baine havaraia, to ia na gabani. Una dainai, Iehova e noia ia baine durua. Hana na e gwauhamata bema mero ta baine abia, una mero na baine siaia kalaga helaḡana ai baine noho bona baine ḡaukara. Iehova ese ena ḡuriḡuri e haerelaia bona mero ta e abia. Ladana e hatoa Samuel. Bona Hana ena gwauhamata heḡereḡerena, Samuel laḡanina toi eiava hani ai, sinana ese e laohaia kalaga helaḡana, unuseniai Dirava baine hesiai henia totona.

Una negai hahelaḡa tauna badana na Eli. Ia natuna memerodia raruosi danu kalaga helaḡana ai e ḡaukarava. Ba helalotao, kalaga helaḡana na Dirava e tomadiho heniava gabuna, bona namona na unuseniai bae ḡaukara taudia na kara namodia bae kara. To Eli natuna raruosi na kara dikadia e karava. Samuel ese idia e karava karadia na e itava. Samuel ese Eli natuna edia kara e tohotoho, eiava?​— Lasi, ia na nega iboudiai kara namodia e karava, tamana bona sinana ese e hadibaia heḡereḡerena.

O laloamu Eli be dahaka bema kara natuna raruosi ediai?​— Namona na bema panisidia. Dirava ena ruma ai basinema haḡaukaradia. To Eli na unu se kara toma dainai Iehova na ia bona natuna ediai e badu. Bena Iehova ese e panisidia.

Hanuaboi ta, Samuel na mahutanai, e kamonai ta ese ladana e hatoava: ‘Samuel!’ Bena Eli dekena e heau lao, to Eli eto: ‘Asina boirimu.’ Ma nega rua unu e vara toma. Nega ihatoina murinai, Eli ese Samuel e hamaoroa bema una gado o kamonai loumu, ba o gwa: ‘Iehova e, mani a hereva, na hakalamu.’ Samuel  na unu e kara toma. Bena Iehova ese Samuel e hamaoroa: ‘Eli ba hamaoroa, iena bese na edia kara dika dainai baina panisidia.’ O laloamu Samuel se gari una hereva Eli baine hamaoroa eiava?​— Lasi ia na e gari. Ena be Samuel na e gari, to Iehova ese e hamaoroa heḡereḡerena e kara. Iehova ena hereva na e momokani. Eli natuna raruosi e mase, bona Eli danu e mase.

Samuel na haheitalai namona. Ena be haida na kara dikadia e karava, to ia na kara namodia e karava. Oi be ede bo kara tomamu? Samuel heḡereḡerena kara namodia bo karamu eiava? Bema ia bo tohotohoamu, Iehova bona tamamu sinamu bo hamoalediamu.