HEREVAHEREVA BA HAMATAMAIA
LESEN 5
Emu Hereva Ba Haerodia Namonamo
Hahekau Herevana: “Nega idoinai ba hereva mai gado-namomui ida.”—Kol. 4:6.
Paulo be Dahaka E Kara?
1. VIDIO ba itaia, eiava Aposetolo Edia Kara 17:22, 23 ba duahidia. Bena ini henanadai ba haerelaidia:
-
Atena ai, Paulo na tomadiho koikoi taudia ese e karava karadia e ita neganai ena hemami be ede bamona?—Aposetolo Edia Kara 17:16 ba itaia.
-
Paulo ese Atena taudia na se gwau henidia, to sivarai namona baine harorolaia totona, ia be dahaka e kara?
Paulo Ena amo Dahaka Ta Dibamu?
2. Taunimanima ese eda hereva na be kamonaimu bema eda hereva baita abi hidi namonamomu, baita gwaurai daladia bona baita gwaurai negadia danu baita haerodia namonamomu.
Paulo Ba Tohotohoa
3. Emu hereva ba haerodia namonamo. Heḡereḡere, bema o hereva heniamu tauna na Baibul ena hereva asi dibana, namona na ba gwaurai herevadia ese dala baine kehoa Baibul eiava Iesu ba herevalaia totona.
4. Ta ena hereva basio utua. Nega ba henia ena lalohadai baine gwauraia. Bema e gwauraia herevana na dia Baibul ena hahediba heḡereḡerena basio badulaia. (Iak. 1:19) To bo hakala namonamomu neganai, ia ese e abi daemu ḡaudia bona badidia bo lalopararalaimu.—Her. 20:5.
5. Bema e gwauraia herevana na maoro bavabia dae bona ba hanamoa. Reana e abia daemu iena tomadiho ese e hahedibalaimu herevadia na mamaoro. Bema ia ida ba herevalaia topik na ia ese danu e abia daemu, una ba herevalaia. Bena taina ruana ba durua Baibul ena hahediba herevana baine laloparalaia.
