Tadikaka Bona Taihu E:

Dirava bona taunimanima ta lalokau henidiamu dainai ita ese Baibul ena hereva ta badinaiamu, e gwaumu: “Baola, bese iboudiai hahediba ai ba halaodia, bona . . . ba ha bapatisodia.” (Mat. 28:​19, 20; Mar. 12:​28-31) Momokani, lalokau na mai siahuna dainai Dirava “e tahuamu taudia” kudoudia baine hamarere diba.—Heb. 11:6.

Guna, ta urava haroro ai baita herevalai herevadia mo baita lalotao bona pablikeisin mo baita rakatani. To hari, namona na baita hekwarahi taunimanima ihereva henidia daladia baita hanamo. Taunimanima ta lalokau henidiamu dalana ta na, idia ese e lalo badamu ḡaudia baita herevalai. Anina na, baita hakala bena e herevalaimu ḡaudia heḡereḡerediai baita durudia. Edena dalai ina buklet ese be durudamu unu baita kara toma?

Ina buklet ai lesen iboudiai na 12, bona ita ese baita hahedinarai kara namodia ta ta e herevalai. Unu kara ta ta na mai anidia bada bema ta uramu taunimanima baita lalokau henidia bona hahediba ai baita halaodia. Lesen ta ta ai Iesu bona Kristen ginigunadia ese edia haroro ḡaukara lalonai e hahedinarai karadia baita dibamu. Eda tahua ḡauna na dia haroro herevadia mo baita lalotao, to dala baita tahu taunimanima ilalokau henidia karadia baita hahedinarai. Ini lesen ta ta amo baita dibamu, eda haroro ḡaukara ai edena kara baita hahedinaraia bema ta ida ta herevaherevamu, ta ta lou heniamu, eiava ta ta stadi heniamu.

Lesen ta o duahiamu neganai, emu komiuniti lalonai o hereva henidiamu taudia ediai una kara ta ba hahedinaraia dalana ba lalohadailaia namonamo. Ba hekwarahi emu lalokau Iehova enai bona taunimanima ediai ba hagoadaia. Unu amo emu tahua ḡauna, taunimanima na hahediba ai ba halaodia ḡaukarana, na bo karaia namonamomu.

Ai na a moalemu badina ina ḡaukara namona ai ta ḡaukara heboumu. (Sef. 3:9) Taunimanima o lalokau henidiamu bona o uramu hahediba ai ba halaodia dainai, Iehova ese be hanamomuimu.