1. Ruma bese baine moale dalana be dahaka?

IEHOVA DIRAVA na e uramu emu ruma bese na baine moale. Iena Hereva, Baibul, ese ruma bese taudia ta ta idurudia herevadia e heni, bona edia maduna e herevalai. Ruma bese taudia ta ta ese Dirava ena sisiba heḡereḡerenai edia maduna bae hua neganai, bae moale diba. Iesu na e gwa: “Dirava ena hereva e kamonaimu bona e badinamu taudia hari nanamo.”​—Luka 11:28.

2. Ruma bese baine moale totona, dahaka baita diba na namo?

² Ruma bese baine moale totona, namona na baita abia dae Iehova ese ruma bese e havaraia, ia na Iesu ese e gwauraia “Tamamai.” (Mataio 6:9) Tanobadai ruma bese iboudiai e nohomu badina Tamada gubai ese e havaradia​—bona mai dibana dahaka ese ruma bese baine hamoalea. (Efeso 3:14, 15) Una dainai, Baibul ese ruma bese taudia ta ta edia maduna be ede e herevalaia toma?

3. Baibul ese ruma bese e matama dalana be ede e herevalaia toma, bona dahaka dainai ta dibamu una na momokani?

³ Iehova ese tau bona hahine ginigunadia, Adam bona  Heva, e karadia bona e ha headavadia. Ia ese tanobada paradaisona​—Eden imeana​—ai e atodia bona e hamaorodia natudia bae havara. Iehova na e gwa: “Besemui ba havaradia, ba hutuma; tanobada ba hahonua bona ba biagua.” (Genese 1:26-28; 2:18, 21-24) Una na dia sivarai kava eiava gori ta, badina Iesu ese e hahedinaraia Genese bukana ese ruma bese e matama dalana e herevalaia na momokani. (Mataio 19:4, 5) Ena be hekwakwanai momo ta davarimu bona hari eda mauri na dia Dirava ena ura heḡereḡerena, to ruma bese baine moale diba dalana mani aita itaia.

4. (a) Edena dalai ruma bese taudia ta ta ese moale bae havaraia diba? (b) Dahaka dainai ruma bese ihamoalena totona Iesu ena mauri baita stadilaia na mai anina bada?

⁴ Ruma bese taudia ta ta ese Dirava ena kara bae tohotohoa, lalokau bae hahedinaraia neganai bae moale diba. (Efeso 5:1, 2) To, Dirava na asita itaiamu dainai edena dalai baita tohotohoa diba? Iehova ena kara baita dibaia diba, badina Natuna vara-edeana na guba amo e siaia tanobadai. (Ioane 1:14, 18) Tanobadai Iesu Keriso ese Tamana na e tohotohoa ḡoevaḡoeva dainai, e itaiava bona e kamonai heniava taudia na vaitani Iehova e itaiava bona e kamonai heniava. (Ioane 14:9) Una dainai, Iesu ese e hahedinaraia lalokauna baita dibaia bona ena haheitalai baita tohotohoa neganai, ita ta ta ese ruma bese baita hamoalea diba.

5, 6. (a) Edena dalai Iesu ese ekalesia e kara henia dalana na haheitalai namona tatau ediai? (b) Tatau na edia dika bae hegwautao totona, dahaka bae kara be namo?

⁵ Baibul na e gwaumu, namona na tatau ese adavadia bae kara henidia, Iesu ese ena hahediba e kara henidia heḡereḡerena. Baibul na e gwaumu: “Tatau e, adavamui ba lalokau henidia, Keriso ese ekalesia e lalokau henia na heto. Ia dainai sibona e heni . . . Unuhetomana tatau ese adavadia bae lalokau henidia, sibodia tau-anidia e lalokau henimu heḡereḡerena. Adavana e lalokau heniamu tauna ese sibona e helalokaumu.  Badina be tau ta ese sibona tau-anina se inai heniamu, to e ubuamu bona e dosiamu, Keriso ese ekalesia e ubuamu bona e dosiamu heḡereḡerena.”​—Efeso 5:23, 25-29.

⁶ Iesu ese ekalesia e lalokau henia karana na haheitalai namona tatau ediai. Iesu ese “e lalokau henidia ela bona dokona,” idia daidiai ena mauri e bouboulaia, ena be idia na dia ḡoḡoeva. (Ioane 13:1; 15:13) Una heḡereḡerena, Baibul ese tatau e sisiba henidia, eto: “Adavamui ba lalokau henidia; basio lalo dika henidia.” (Kolose 3:19) Bema hahine na nega haida basine lalo namonamomu dainai baine kara kerere, dahaka ese tau baine durua una sisiba baine badinaia? Namona na baine helalotao ia danu e kereremu bona dahaka baine kara Dirava ese ena dika baine gwauatao totona. Namona na ia e kara dika heniamu taudia, adavana danu, edia dika baine gwautao. Hahine danu unu baine kara toma. (Mataio 6:12, 14, 15 ba duahi.) Haida na e gwaumu headava baine namo totona tau bona hahine bae hegwautao heheni na namo, ani?

7. Iesu ese ena hahediba be ede e lalodia tomava, bona dahaka haheitalai namona e hahedinaraia tatau ediai?

⁷ Namona na tatau na bae diba, Iesu na hanaihanai ena hahediba edia namo e lalova. Ia na edia goada hetoana bona ura ḡaudia na mai dibana. Heḡereḡere, idia e hesiku neganai, ia na e gwa: “Gabu ḡaḡaena ta aitala, laḡada baita ani.” (Mareko 6:30-32) Tatau ese adavadia edia namo danu bae lalo bada. Baibul na e gwa hahine ‘edia goada na dia heḡereḡere,’ una dainai tatau ese bae “matauraidia.” Dahaka dainai? Badina tatau bona hahine na “mauri hariharina” bae abia. (1 Petro 3:7) Namona na tatau na bae helalotao, Dirava ese ta na dia tau eiava hahine dainai, to ena abidadama dainai e laloa badamu.​—Salamo 101:6.

8. (a) Edena dalai “adavana e lalokau heniamu tauna ese sibona e helalokaumu”? (b) Tau bona adavana “anidia vada tamona,” anina be dahaka?

⁸ Baibul na e gwaumu “adavana e lalokau heniamu tauna  ese sibona e helalokaumu.” Badina Iesu ese e hahedinaraia, tau bona adavana na “dia rarua, anidia vada tamona.” (Mataio 19:6) Una dainai, basie heudahanai. (Hereva Lada-isidia 5:15-21; Heberu 13:4) Unu bae kara toma, bema ta ta ena namo bae lalo bada. (1 Korinto 7:3-5) Ina hereva na mai anina bada: “Tau ta ese sibona tau-anina se inai heniamu, to e ubuamu bona e dosiamu.” Namona na tatau ese adavadia bae lalokau henidia, sibodia e helalokaumu na heto, bae helalotao idia kwaradia, Iesu Keriso, ese edia kara heḡereḡerena baine hahemaoro henidia.​—Efeso 5:29; 1 Korinto 11:3.

9. Filipi 1:8 ese Iesu ena kara be ede e herevalaia toma, bona dahaka dainai tatau ese una kara bae hahedinaraia na namo?

⁹ Aposetolo Paulo ese “Keriso Iesu ena hebogahisi” karana e herevalaia. (Filipi 1:8) Iesu ena hebogahisi mai lalokauna ese momo e hagoadadia, una kara dainai hahine momo na iena hahediba ai ela. (Ioane 20:1, 11-13, 16) Bona hahine na e uramu adavadia ese bae lalokau henidia.

10. Edena dalai Iesu na haheitalai namona hahine ediai?

¹⁰ Ruma bese na orea ta, bona baine ḡaukara namonamo totona, ta ese baine gunalaia na namo. Iesu danu Dirava ese e gunalaiava. “Keriso kwarana be Dirava,” una heḡereḡerena “hahine kwarana na tau.” (1 Korinto 11:3) Iesu ese Dirava ena kwara dagina e matauraia na haheitalai namona, badina ita iboudai na mai eda hegunalai tauna bona iena kwara dagina baita matauraia na namo.

11. Hahine ese adavana be ede baine kara henia toma, bona una ese dahaka be havaraiamu?

¹¹ Tatau na dia ḡoḡoevadae dainai e kereremu bona nega momo edia kwara dagina na asie ḡaukaralaia namonamomu. Una dainai, hahine be dahaka baine kara na namo? Dia namo adavana e karamu ḡaudia baine lalodia maraḡi eiava adavana daena amo bainela. Hahine na baine helalotao, Dirava matanai manau karana na mai anina bada. (1 Petro 3:4) Hahine ese una kara baine hahedinaraia neganai,  hekwakwanai negadiai danu Dirava ese e atoa kwara dagina baine matauraia diba. Danu, Baibul na e gwaumu: “Hahine danu adavana baine matauraia.” (Efeso 5:33) To bema tau ese Keriso ena Kwara dagina basine abia dae be ede bamona? Baibul ese hahine e hagoadadia, eto: “Hahine e, umui danu adavamui ba kamonai henidia, bena idia haida, ena be hereva asie abia daemu, to umui emui kara daidiai do bae helalo kerehai, emui igo-diho bona hemataurai karadia bae ita negadia ai.”​—1 Petro 3:1, 2.

12. Dahaka dainai hahine na mai hematauraina ida ena lalohadai baine gwauraia na dia kerere?

¹² Herevana ia adavana na Kristen tauna eiava lasi, to bema hahine ese dala maoronai baine gwauraia lalohadaina na adavana ena amo idau, basita gwa diba una na dia hemataurai karana. Reana ena lalohadai na maoro, bona bema tau ese baine abia dae, ruma bese na baine durua diba. Sara ese ruma bese ena hekwakwanai ta ihamaoromaorona dalana e herevalaia neganai, ena be Abraham ese na se abia dae, to Dirava ese e hamaoroa: “Sara ena hereva iboudiai bavabi dae.” (Genese 21:9-12 ba duahi.) Una dainai, bema tau ena abi hidi karana ese Dirava ena taravatu na se utuamu, hahine ese una baine abia dae na namo, unu amo ena hemataurai e hahedinaraiamu.​—Kara 5:29; Efeso 5:24.

13. (a) Tito 2:4, 5 ese dahaka sisiba na headava hahinedia e henidia? (b) Baibul ese headava ihapararana bona ihadokona karana be ede e herevalaia toma?

¹³ Hahine ese ena maduna baine huaia diba, bema dala idauidau ai ena ruma bese baine naria. Heḡereḡere, Baibul ese e hahedinaraiamu headava hahinedia “ese adavadia bona natudia bae lalokau henidia; lalodia bae hadai maoromaoro; basie mata dika; ruma ai bae ḡaukara; bae hebogahisi; adavadia eredia bae kamonai.” (Tito 2:4, 5) Hahine na unu baine kara toma neganai, ena ruma bese ese bae lalokau henia bona bae matauraia. (Hereva Lada-isidia 31:10, 28 ba duahi.) Headava taudia na dia ḡoḡoevadae dainai, hekwakwanai badadia haida ese headava baine hapararaia eiava hadokoa diba.  Baibul ese headava e pararamu badidia haida e herevalai. To, headava ihapararana na dia ḡau maraḡina, badina Baibul na e gwaumu: “Hahine ese tau basine dihotania. . . . Tau ese danu adavana basine hadihoa.” (1 Korinto 7:10, 11) To, Baibul na e gwaumu bema idia ta baine heudahanai, headava bae hadokoa diba.​—Mataio 19:9.

14. Iesu ese natu be ede e kara henidia toma, bona tama sina be dahaka bae kara?

¹⁴ Iesu ese natu e kara henidia dalana na haheitalai namona tama sina ediai. Haida ese maraḡidia e koudia ia dekena basiela neganai, Iesu na e gwa: “Ene memero-memero na dekegu aema, asio luludia.” Baibul na e gwaumu, bena maraḡidia “e rosidia, imana tubuadia ai e dau kau, e hanamodia.” (Mareko 10:13-16) Iesu na ena nega e heni natu baine bamodia, umui danu namona na emui nega ba heni natumui ba bamodia, ani? Anina na nega bada bavato, bona ba hadibadia, badina una na Iehova ese tama sina e henidia haheḡanina.​—Deuteronomi 6:4-9 ba duahi.

15. Tama sina be dahaka bae kara diba natudia bae gimadia totona?

¹⁵ Ina tanobada na e dika e laomu dainai, namona na tama  sina ese natudia bae gimadia, unu amo matabodaḡa taudia ese basie hadikadia. Iesu ese ena hahediba e gimadia dalana mani a laloa, idia na e gwauraidia “natugu.” Iesu na inaina ese e dogoatao bona bae alaia eto neganai, dala e kara ena hahediba baine hamauridia totona. (Ioane 13:33; 18:7-9) Umui tama sina, namona na Diabolo ese natumui ihadikadia totona e ḡaukaralaimu ḡaudia nahuadia ba toho. Namona na dika do se vara neganai ba hadibadia. * (1 Petro 5:8) Hari ina negai tauani dalanai, Dirava itura henina karanai, bona kara maoromaoro ibadinana dalanai hahetoho na momo, dia guna heḡereḡerena.

16. Iesu ese ena hahediba edia kerere e hamoaoromaoroa dalana amo tama sina be dahaka e dibamu?

 ¹⁶ Iesu do se mase hanuaboinai, iena hahediba na e hepapahuahu, daika be herea. Iesu ese na se badu henidia, to mai lalokauna ida ena hereva bona kara amo e hadibadia. (Luka 22:24-27; Ioane 13:3-8) Bema oi na tama eiava sina, natumu ena kerere ihamaoromaoronai edena dalai Iesu ena haheitalai ba badinaia? Momokani, natu ese matahakani bae abi na namo, to namona na ena “dika davana korikorina” mo ba heni bona dia badu dalanai. Basio hegwau heni kava, “dare e hegwadamu na heto.” (Ieremia 30:11; Hereva Lada-isidia 12:18) Dala maoronai matahakani ba heni na namo, unu amo gabeai natu ese una sisiba ena namo baine itaia.​—Efeso 6:4; Heberu 12:9-11.

17. Edena dalai Iesu na haheitalai namona natu ediai?

¹⁷ Natu be Iesu ena amo diba bae abi diba, eiava? Oibe! Iesu ese ena haheitalai amo natu e hadibadiamu tamadia sinadia bae kamonai henidia. Iesu na e gwa: “Tamagu ese e hadibagumu heḡereḡerena ai na herevamu.” Bena ma e gwa: “Iena ura karadia nega idoidiai na karamu.” (Ioane 8:28, 29) Iesu ese Tamana gubai e kamonai heniava, bona Baibul na e gwaumu natu ese tama sina bae kamonai henidia. (Efeso 6:1-3 ba duahi.) Ena be Iesu na natu ḡoevadaena, to tamana Iosef bona sinana Maria, dia ḡoevadae taudia, na e kamonai henidiava. Una kara ese Iesu ena ruma bese taudia ta ta na e hamoaledia!​—Luka 2:4, 5, 51, 52.

18. Dahaka dainai Iesu na hanaihanai Tamana gubai e kamonai heniava, bona hari natu bae kamonai neganai daidia bae hamoaleadia?

¹⁸ Edena dalai natu ese Iesu bae tohotohoa bona tamadia sinadia bae hamoaledia? Momokani, nega haida natu ese tama sina bae kamonai henidia na auka, to Dirava na e uramu idia na bae kamonai. (Hereva Lada-isidia 1:8; 6:20) Iesu na hanaihanai Tamana gubai e kamonai heniava, nega aukadiai danu. Nega ta ai, Dirava ese ḡaukara aukana ta Iesu e henia neganai,  Iesu na e gwa: “Ina kehere [maduna] na egu amo boma abia oho.” To, Iesu ese Dirava ena ura na e karaia, badina mai dibana Tamana ena diba na bada. (Luka 22:42) Natu ese kamonai karana bae dibaia neganai, tamadia sinadia bona Dirava bae hamoaledia bada. *​—Hereva Lada-isidia 23:22-25.

19. (a) Satana ese natu be ede e tohodia tomamu? (b) Bema natu na matabodaḡa karana ta baine karaia, tama sina edia hemami be ede bamona?

¹⁹ Diabolo ese Iesu na e tohoa, bona ta dibamu memero kekeni danu baine tohodia kara kereredia bae kara. (Mataio 4:1-10) Satana Diabolo ese laloani karana e ḡaukaralaiamu, bona nega haida una idadaraina na auka. Una dainai, natu ese hebamo dikadia bae dadarai na ḡau badana! (1 Korinto 15:33) Iakobo natuna Daina ese Iehova se tomadiho heniava taudia e bamodia dainai, dika bada e vara. (Genese 34:1, 2) Bema ruma bese lalonai ta na matabodaḡa karana ta baine karaia, ruma bese na be lalohisihisi badamu!​—Hereva Lada-isidia 17:21, 25.

20. Ruma bese baine moale totona, ta ta be dahaka bae kara na namo?

²⁰ Ruma bese ena hekwakwanai na baita hamaoromaoro  diba bema Baibul ena sisiba baita badinadia. Unu sisiba ibadinadia karana ese ruma bese baine hamoalea. Una dainai tatau e, adavamui ba lalokau henidia bona Iesu ese kongrigeisen e kara henia heḡereḡerena ba kara henidia. Hahine e, adavamui edia kwara dagina ba matauraia, bona Hereva Lada-isidia 31:10-31 ai hahine namona ena kara ba badinaia. Tama sina e, natumui ba hadibadia. (Hereva Lada-isidia 22:6) Tama e, emui ruma bese ‘ba reḡua namonamo.’ (1 Timoteo 3:4, 5; 5:8) Bona natu e, tamamui sinamui ba kamonai henidia. (Kolose 3:20) Ruma bese taudia ta dia ḡoevadae, badina iboudiai na e kereremu. Una dainai ba lalomanau, bona emui dika ba hegwautao heheni.

21. Vaira neganai dahaka hahenamo be varamu, bona hari edena dalai ruma bese maurina baita moalelaia diba?

²¹ Momokani, Baibul lalonai ruma bese idurudia sisibadia bona hahediba herevadia na momo. Danu, Baibul ese e hadibadamu Dirava ese nega matamatana be havaraiamu bena tanobada paradaisonai moale taudia ese Iehova be tomadiho heniamu. (Apokalupo 21:3, 4) Unu na hahenamo namodia! Hari danu, Baibul ai Dirava ena hahediba herevadia baita badinamu neganai, ruma bese maurina baita moalelaiamu.