1, 2. Hari ina negai ededia hisihisi e varamu, bona momo be dahaka henanadai e henimu?

TANO ta ai tuari dikana ta e vara murinai, e mase taudia tausen momo, hahine bona maraḡidia, na guri badana ta ai e guridia bena korosi maraḡidia e ato heḡeḡe. Unu korosi ta ta ai ina hereva e torea: “Dahaka dainai?” Nega haida taunimanima e lalohisihisimu neganai unu e henanadai tomamu. Taunimanima momo na tuari, disasta, gorere, eiava kara dika dainai edia lalokau taudia e masemu, edia ruma e dikamu, eiava dala ma haidai hisihisi e davarimu neganai unu e henanadai tomamu. E uramu bae diba dahaka dainai unu dika na ediai e varamu.

² Dahaka dainai Dirava ese hisihisi na se kouamu? Bema Iehova na lalokau, aonega, hahemaoro maoromaoro, bona siahu idoinai Diravana, dahaka dainai tanobada na inai heheni bona kara gageva amo e honu? Nega ta sibomu una do laloa, eiava?

3, 4. (a) Dirava ese hisihisi se kouamu badina baita henanadailaia be kerere, eiava? (b) Iehova ese kara dika bona hisihisi be ede e lalodia tomamu?

³ Dirava ese hisihisi se kouamu badina baita henanadailaia be kerere, eiava? Haida na e laloamu bema unu bae henanadai toma, anina na idia na asi edia abidadama  eiava Dirava na asie matauraiamu. To, Baibul bo duahiamu neganai bo itaiamu, Dirava garina e gariva abidadama taudia danu unu e henanadai tomava. Heḡereḡere, peroveta tauna Habakuku ese Iehova e nanadaia: “Dahaka dainai hekwakwanai ḡaudia o hahedinarai henigumu? Hahebua-tari bona daḡedaḡe na vairagu ai, heatu bona heiri-heiri na e varamu.”​—Habakuku 1:3.

⁴ Peroveta tauna Habakuku ese una henanadai e heni dainai Iehova ese e gwau henia, eiava? Lasi. To, Dirava ese Habakuku ena hereva na Iena lauma amo e havaraia bukana, Baibul, ai e toredia. Danu, Dirava ese e durua una baine lalopararalaia bona ena abidadama e hagoadaia. Iehova na e uramu oi danu baine durumu. Ba helalotao, Baibul na e gwaumu: “Ia ese e lalomuimu.” (1 Petro 5:7) Iehova ese kara dika bona e varamu hisihisidia na e inai henidiamu. (Isaia 55:8, 9) To, dahaka dainai tanobadai hisihisi na bada herea?

5. Tomadiho igunalaina taudia ese hisihisi badidia be ede e gwaurai tomamu, to Baibul be dahaka e gwaumu?

⁵ Tomadiho idauidau taudia ese hisihisi e badamu badidia na edia hegunalai bona hahediba taudia ediai e  henanadailaimu. Nega momo edia hegunalai taudia edia haere na, Dirava ena ura dainai hisihisi e varamu bona bae vara ḡaudia iboudiai, ḡau dikadia danu, na ia ese de gwauraidia hidi. Momo na e hamaorodiamu Dirava ena dala na basita lalopararalaiamu eiava ia ese taunimanima​—maraḡidia danu​—e hamasediamu, unu amo ia ida gubai bae noho. To, karoa gunadiai o diba heḡereḡerena, Iehova Dirava ese kara dika na se havaraiamu. Baibul na e gwaumu: “Dirava na basine kara dika; Siahu-idoinai Diravana na basine kerere, lasi ona lasi vaitani.”​—Iobu 34:10.

6. Dahaka dainai taunimanima ese tanobadai e varamu hisihisi gwaudia na Dirava e heniamu?

⁶ Dahaka dainai taunimanima ese tanobadai e varamu hisihisi gwaudia na Dirava e heniamu? Nega momo unu e gwau tomamu, badina e laloamu Siahu Idoinai Diravana na ina tanobada lohiana. Idia na Baibul ena hereva momokanina na asi dibadia. Ina buka ena Karoa 3 ai una hereva momokanina o dibaia. Ina tanobada lohiana na Satana Diabolo.

7, 8. (a) Edena dalai tanobada taudia ese e lohiadiamu tauna ena kara e hahedinaraiamu? (b) Edena dalai kara dika bona “e vara kavamu” ḡaudia ese hisihisi e havaraiamu?

⁷ Baibul na e gwaumu: “Tanobada idoinai na dika tauna imana ai.” (1 Ioane 5:19) Una bo laloamu neganai, una hereva na momokani, ani? Ina tanobada taudia ese asita itaiamu laumana, ina “tanobada idoinai e koiamu” tauna, ena kara e hahedinaraiamu. (Apokalupo 12:9) Satana na koikoi, daḡedaḡe bona inai tauna. Una dainai, e lohiaiamu tanobadana na koikoi, daḡedaḡe bona inai heheni karadia amo e honu. Hisihisi e badamu badina ta na una.

⁸ Hisihisi e badamu badina iharuana na Karoa 3 ai ta herevalaia heḡereḡerena, Eden imeana ai gwau-edeede e vara negana amo taunimanima na dia ḡoḡoevadae. Kara dika taudia na e uramu ma haida bae lohiadia, una dainai tuari, daḡedaḡe karadia, bona hisihisi e varamu. (Kohelete 4:1; 8:9)  Hisihisi e badamu badina ihatoina na “nega bona kara na e vara kavamu.” (Kohelete 9:11 ba duahia.) Iehova ese se lohiaiamu tanobadanai, taunimanima na nega kererediai gabu kererediai nonoho dainai hisihisi e davarimu.

9. Ede ta diba tomamu Iehova na badi namona ta dainai hisihisi se kouamu?

⁹ Ta moalemu badina ta dibamu hisihisi na dia Dirava ese e havaramu. Ia ese tuari, kara gageva, daḡedaḡe karadia, eiava disasta amo taunimanima na se hahisidiamu. To, dahaka dainai Iehova ese hisihisi na se kouamu? Bema ia na Siahu Idoinai Diravana, ena siahu na heḡereḡere hisihisi baine koua diba. To, dahaka dainai doini e narimu? Reana lalokau Diravana na badi namona ta dainai hisihisi se koumu.​—1 Ioane 4:8.

10. Satana ese dahaka e hepapahuahulaia, bona edena dalai?

¹⁰ Dirava ese hisihisi se kouamu badina baita diba totona, namona na kara dika e matama negana aita laloa lou. Satana ese Adam bona Heva e koidia bena Iehova e gwau-edeede henia neganai, henanadai badana ta e vara. Satana ese Iehova ena siahu na se hepapahuahulaia. Satana na mai dibana Iehova ena siahu na asi hetoana. To, Satana ese Iehova ena lohia siahuna ena maoro e hepapahuahulaia. Satana na e gwa Dirava na koikoi tauna badina ena taunimanima ihanamolaidia ḡaudia na se henidiamu, una neganai ia ese Iehova na e gwauraia lohia dikana. (Genese 3:2-5 ba duahi.) Satana na e gwa taunimanima na Dirava ese basine lohiadia neganai, bae noho namonamo diba. Unu amo Iehova ena lohia siahuna ena maoro e hepapahuahulaia.

11. Dahaka dainai Iehova ese Eden ai gwau-edeede taudia na se hamasedia?

¹¹ Adam bona Heva ese Iehova e gwau-edeede henia. Idia na vaitani e gwa: ‘Asia uramu Iehova ese baine Lohiamai. Sibomai ese namo eiava dika baia abia hidi.’ Iehova ese una hepapahuahu be ede e hamaoromaoroa toma?  Edena dalai taunimanima bona aneru baine hadibadia unu gwau-edeede taudia na kerere bona iena dala na maoro? Reana ta na be gwaumu, Dirava ese gwau-edeede taudia na bema hamasedia bona bese matamatana bema havaraia. To Iehova na e gwa Adam bona Heva natudia ese tanobada bae hahonua, bona iena ura na tanobada paradaisonai bae noho. (Genese 1:28) Iehova ese hanaihanai ena ura na e haḡuḡurudiamu. (Isaia 55:10, 11) Danu, bema unu gwau-edeede taudia na Eden ai bema hamasedia, iena lohia siahuna dainai e vara hepapahuahuna na basinema hamaoromaoroa.

12, 13. Dahaka dainai Iehova ese Satana na se koua tanobada baine lohiaia, bona dahaka dainai taunimanima se koudia sibodia bae helohia? Haheitalai ta a gwauraia.

¹² Mani haheitalai ta aita laloa. Tisa ta na matematik aukana ta ihamaoromaorona dalana na ena stiuden vairadiai e herevalaiamu. Mai aonegana stiuden ta na baine gwau-edeede, baine gwa tisa ese una matematik e hamaoromaoroamu dalana na kerere. Baine gwa tisa na dia heḡereḡere, to ia hari una matematik ihamaoromaorona dalana  na mai dibana. Stiuden haida na bae laloa iena hereva na maoro, bena idia danu bae gwau-edeede. Tisa be dahaka baine kara? Bema unu gwau-edeede stiuden na klas amo baine luludia lasi, stiuden ma haida be dahaka be lalomu? Idia ese una gwau-edeede stiuden bona e bamoa taudia edia hereva bae abi dae, eiava? Reana stiuden iboudiai ese tisa na basie matauraiamu, badina be laloamu ia na se uramu ena kerere bae hahedinaraia. Una dainai tisa ese gwau-edeede stiuden baine hamaoroa klas vairadiai una matematik baine hamaoromaoroa.

¹³ Iehova ese e karaia karana na tisa e karaia karana heḡereḡerena. Ba helalotao, Eden ai e vara gwau-edeede karana na aneru milioni momo ese danu e itaia. (Iobu 38:7; Daniel 7:10) Iehova ese gwau-edeede taudia e kara henidia karana na mai anina bada unu aneru bona taunimanima ediai. Una dainai, Iehova be dahaka e kara? Ia ese Satana na se koua taunimanima baine lohiadia. Danu, Dirava ese taunimanima na se koudia Satana ena hahekau henunai sibodia bae helohia.

14. Iehova ese taunimanima na se koudia sibodia bae helohia totona, una ese dahaka namo baine havaraia?

¹⁴ Haheitalai ai tame herevalaia tisa na mai dibana una gwau-edeede stiuden bona ia e badinaia stiuden na kekerere. To danu, ia na mai dibana bema nega baine henidia edia hereva bae hamomokania karana ese klas taudia iboudiai baine durudia. Unu gwau-edeede stiuden bae kerere neganai, stiuden namodia na bae diba tisa sibona na heḡereḡere idia baine gunalaidia. Idia na tisa ese gwau-edeede stiuden na gabeai klas amo baine luludia badina bae lalopararalaia. Una heḡereḡerena, Iehova na mai dibana kudou-maoro taudia bona aneru na namo bae davaria diba, bema bae itaia Satana bona iena gwau-edeede taudia na asie kwalimu bona taunimanima na sibodia basie helohia diba. Idaunegai tauna Ieremia heḡereḡerena, idia ese ina hereva momokanina bae dibaia: “Iehova e, lau dibagu taunimanima ena dala na  dia ia sibona lalona ai, bona taunimanima ena raka na ia sibona ese basine gwauraia hidi.”​—Ieremia 10:23.

15, 16. (a) Dahaka dainai Iehova ese hisihisi na se koua haraḡamu? (b) Dahaka dainai Iehova ese kara gageva na se koudiamu?

¹⁵ Dahaka dainai Iehova ese hisihisi na se koua haraḡa? Bona dahaka dainai ḡau dikadia e varamu na se koudiamu? Hari haheitalai lalonai, una tisa ese se kara ḡaudia rua mani aita lalodia. Ginigunana na, ia ese una stiuden na se koua, una matematik baine hamaoromaoroa totona. Iharuana na, una gwau-edeede stiuden na se durua una matematik baine hamaoromaoroa. Una heḡereḡerena, Iehova ese se kara ḡaudia rua mani aita lalodia. Ginigunana na, ia ese Satana bona e badinaia taudia na se koudia edia hereva bae hamomokania. Una dainai nega e henidia. Laḡani tausen momo lalodiai, taunimanima na sibodia bae helohia totona gavamani idauidau e haginidia. Ena be saiens eiava ḡau ma haidai edia diba e habadamu, to kara gageva, ogoḡami, raskol karadia, bona tuari na doini e bada e laomu. Una ese e hahedinaraiamu taunimanima sibodia na basie helohia diba.

¹⁶ Iharuana na, Iehova ese Satana na se duruamu ina tanobada baine lohiaia. Heḡereḡere, bema Dirava ese kara gageva bema koua, una ese bema hahedinaraia ia na gwau-edeede taudia e durudiamu, ani? Unu amo taunimanima na bema lalo idia sibodia na bae helohia diba bona dika ta basie davaria, ani? Bema Iehova na unu bema kara toma, ia na bema koikoi. To, Dirava na ‘basine koikoi diba.’​—Heberu 6:18.

17, 18. Taunimanima edia lohia dalana bona Satana ena siahu dainai e varamu dika ḡaudia daidiai, Iehova be dahaka be karamu?

¹⁷ To, gwau-edeede karana dainai e vara hisihisidia be ede bamona? Baita helalotao, Iehova na siahu idoinai Diravana. Una dainai, ia ese taunimanima edia hisihisi iboudiai baine hanamodia diba. Vada ta diba heḡereḡerena, tanobada  ihadikana karadia na be haorediamu bona tanobada na Paradaiso ai be halaoamu. Iesu ena boubou ḡauna iabidadama henina karana ese kara dika be kokiamu, bona toreisi lou be varamu dainai mase ena hisihisi na lasi. Dirava ese Iesu ena amo “diabolo ena kara dika baine ha-orea.” (1 Ioane 3:8) Iehova ese unu iboudiai na iena nega korikori ai baine karadia. Ta moalemu badina ia na kara ta do se karaia, iena haheauka karana dainai ita na hereva momokani ta dibamu bona ia baita hesiai henia diba. (2 Petro 3:9, 10 ba duahi.) To hari, Dirava na kudou-maoro taudia e tahudiamu bona e durudiamu ina tanobada dikanai bae davari hisihisidia bae haheaukalai totona.​—Ioane 4:23; 1 Korinto 10:13.

¹⁸ Reana haida na bae henanadai, ‘Bema Dirava ese Adam bona Heva na basiema gwau-edeede dalanai bema karadia, ini hisihisi idauidau bema vara, eiava?’ Una henanadai ihaerelaina totona, namona na Iehova ese e henimu harihari ḡauna namona ba laloatao.

19. Iehova ese edena harihari ḡauna e henida, bona dahaka dainai baita laloa bada?

¹⁹ Karoa 5 ai ta itaia, Dirava ese taunimanima e havaradia na mai edia ura kwalimu. Una na harihari ḡauna hereana, ani? Dirava ese animal momo herea e karadia, bona lalodiai e miamu aonegana ese e biagudiamu. (Hereva Lada-isidia 30:24) Taunimanima ese misini haida na e karadia edia haheḡani bae badina totona. Bema Dirava ese ita na unu bema karada toma, ta ma moale, eiava? Lasi. Ta moalemu badina mai eda ura  kwalimu dainai baita abi hidimu ita be ede bamona taudia ai baitala, edena mauri dalana baita badinaia, daika baita bamoa, bona ḡau ma haida. Ta moalemu badina ita na mai eda ura kwalimu, bona Dirava na unu e ura tomamu.

20, 21. Edena dalai iseda ura kwalimu baita ḡaukaralaia namonamo, bona dahaka dainai unu baita kara toma na namo?

²⁰ Iehova na se uramu hahedua dainai iena ura baita karaia. (2 Korinto 9:7) Ini aita haheitalaia toma: Tama eiava sina ese edena be moalelaiamu​—ta ena hahedua dainai natuna baine gwa “na lalokau henimumu,” eiava ia kudouna amo una hereva baine gwauraia? Una dainai, baita henanadai, Iehova ese e henimu ura kwalimuna be ede bo ḡaukaralaia tomamu? Satana, Adam, bona Heva ese edia ura kwalimu na asie ḡaukaralaia namonamo. Idia ese Iehova Dirava e dadaraia. Oi be dahaka ba kara?

²¹ Oi na mai emu dala una ura kwalimu ba ḡaukaralaia namonamo totona. Iehova ena kahai e ginimu taudia milioni momo ba bamodia diba. Idia ese Dirava e hamoaleamu badina e hahedinaraia Satana na koikoi tauna, bona dia heḡereḡere baine lohia. (Hereva Lada-isidia 27:11) Oi danu unu bo kara toma dibamu, bema mauri dalana maorona bavabia hidi. Karoa gabena ese una be herevalaiamu.