1. Edena ḡuriḡuri baita herevalaiamu?

TANOBADA heḡeḡemadai taunimanima momo na mai dibadia Lohiabada ena Ḡuriḡuri. Una na Iesu Keriso ese e hahedibalaia ḡuriḡurina. Una ḡuriḡuri na mai anina bada, bona ena hereva ginigunadia toi bo lalodiamu karana ese be durumumu Baibul ena hahediba bo lalopararalaidiamu.

2. Iesu ese ena hahediba e hamaorodia dahaka ḡau toi bae ḡuriḡurilai?

² Ina ḡuriḡuri matamanai, Iesu ese kamonai taudia e hadibadia: “Ini ba ḡuriḡuri toma: Tamamai e, guba ai o nohomu, oi ladamu baia hahelaḡaia; emu basileia bainema, emu ura tanobada ai baia kara, guba ai e karamu na heto.” (Mataio 6:9-13) Unu ḡuriḡuri herevadia toiosi anidia be dahaka?

3. Dirava ena Basileia totona dahaka baita diba na namo?

³ Ita ese Dirava ladana, Iehova, anina na da ta dibaia. Bona Dirava ena ura​—taunimanima daidiai e kara ḡaudia bona gabeai baine kara ḡaudia​—ta herevalai. To, Iesu na e gwa baita ḡuriḡuri “emu basileia bainema,” anina be dahaka? Dirava ena Basileia be dahaka? Edena dalai una Basileia ena mai ese Dirava ladana baine hanamoa eiava baine hahelaḡaia? Bona Basileia bainema neganai edena dalai Dirava ena ura baine karaia?

4. Dirava ena Basileia be dahaka, bona Pavapavana be daika?

⁴ Dirava ena Basileia na Iehova Dirava ese e haginia gavamanina, bona Pavapavana e abia hidi. Dirava ena Basileia Pavapavana be daika? Iesu Keriso. Pavapava Iesu ese tanobada lohiadia iboudiai e hereadia, bona e gwauraiamu, “pavapava edia Pavapava; bona lohia edia Lohia.” (1 Timoteo 6:15) Iena siahu na heḡereḡere ḡau namodia momo baine kara, tanobada lohiadia ese basie kara diba ḡaudia na ia ese baine karadia ḡoevaḡoeva.

5. Dirava ena Basileia be ede amo be lohiamu, bona dahaka be lohiaiamu?

⁵ Dirava ena Basileia be ede amo be lohiamu? Hari Iesu be edeseniai? Bo helalotaomu, Iesu na au ta ai e mase bona e toreisi lou. Bena gabeai e dae guba. (Kara 2:33) Una dainai, Dirava ena Basileia na gubai. Bona Baibul ese e gwauraiamu “guba basileiana.” (2 Timoteo 4:18, Nega Matamata Baibel) Ena be Dirava ena Basileia na gubai, to tanobada be lohiaiamu.​—Apokalupo 11:15 ba duahia.

6, 7. Dahaka dainai Iesu na Pavapava namona?

⁶ Dahaka dainai Iesu na Pavapava namona? Badina ia na basine masemu. Iesu ese tanobada pavapavadia na e hereadia badina Baibul na e gwaumu, “ia sibona e noho hanaihanaimu, asi iraka-kahikahina diarina ai e nohomu.” (1 Timoteo 6:16) Una ese e hahedinaraiamu Iesu ese baine kara ḡau namodia iboudiai na be mia hanaihanaimu. Bona ta dibamu ena taunimanima baine durudia ḡaudia momo be karamu.

⁷ Baibul ese Iesu e perovetalaia herevana mani a laloa: “Iehova ena Lauma ese baine rohea, aonega bona lalo-parara laumana, hahealo bona siahu laumana, diba-maoro bona Iehova garina laumana. Ia ese Iehova garina baine moalelaia. Ia na basine hahemaoro, matana e itamu ḡaudia daidiai, bona lalona basine hadaia, taiana e kamonaimu  herevadia daidiai; a mai kara maoromaorona ida ia ese ogoḡami taudia baine hahemaoro henidia, bona lalona baine hadaia maoro, tanobada ena manau taudia ediai.” (Isaia 11:2-4) Unu hereva ese e hahedinaraiamu Iesu na mai ena kara maoromaoro bona hebogahisi ida tanobada taudia baine lohiadia. O uramu unu bamona Pavapavana ta ese baine lohiamu, a?

8. Daidia be Iesu ida be lohiamu?

⁸ Dirava ena Basileia ihamomokanina ḡauna ma ta na ina: Iesu na sibona basine lohiamu. Ma haida ida be lohiamu. Heḡereḡere, aposetolo Paulo ese Timoteo e hamaoroa: “Baita haheauka, ia ida lohia ai baitala.” (2 Timoteo 2:12) Oibe, Paulo, Timoteo, bona abidadama taudia ma haida na Dirava ese e abidia hidi Iesu ida guba Basileiana ai bae lohia. Una hahenamo bae abia taudia be hida?

9. Taunimanima hida be Iesu ida be lohiamu, bona Dirava ese edena negai e abidia hidi matama?

⁹ Ina buka ena Karoa 7 ai e hedinarai heḡereḡerena, aposetolo Ioane ese matahanai ta lalonai e itaia ‘Mamoe Natuna [Iesu Keriso] na Siona ororona [ena lohia gabuna guba] ai e gini; bona ia ida taunimanima domaga-ta gerebu-hani daha-hani, ia bona Tamana ladadia bagudia ai e torea taudia.’ Unu taunimanima 144,000 be daidia? Ioane na e gwa: “Idia ese Mamoe Natuna murinai e rakamu, ena loa iboudiai. Taunimanima padadia amo e hoidia, Dirava bona Mamoe Natuna anina roboana ai baela, taudia bunu.” (Apokalupo 14:1, 4) Oibe, idia na mai edia abidadama ida Iesu Keriso murinai e rakava taudia, Dirava ese e abidia hidi gubai Iesu ida bae lohia. Mase amo bae toreisi lou bena guba maurina bae abia murinai, idia na Iesu ida terona ai bae helai hebou. (Apokalupo 3:21) Aposetolo taudia edia nega amo, Dirava ese abidadama Kristen taudia e abidia hidi matama, ina namba 144,000 baine haḡuḡurua totona.

10. Dahaka dainai Iesu bona 144,000 ese taunimanima bae lohiadia na lalokau karana?

 ¹⁰ Dirava ese dala e heḡaeḡaelaia Iesu bona 144,000 ese taunimanima bae lohiadia na lalokau karana. Badina ta na, Iesu na taunimanima ta ai ela bona hisihisi mamina na mai dibana. Paulo ese Iesu e herevalaia neganai e gwa: “Eda hahelaḡa tauna badana na dia eda manoka-manoka mamina iabina asi dibana tauna. Ḡau iboudiai ese ia e dibaḡaniava, ita e dibaḡanidamu heḡereḡerena; to ia na asi ena kara dika.” (Heberu 4:15; 5:8) Ia ida be lohiamu taudia danu tanobadai hisihisi e haheaukalaiva. Danu, idia na dia ḡoḡoevadae dainai e hekwarahiva bona gorere idauidau e haheaukalai. Una dainai, taunimanima e davarimu hekwakwanaidia na be lalopararalaimu!

11. Dahaka dainai Dirava ena Basileia baine lohia na namo, Dirava ena ura gubai baine vara totona?

¹¹ Iesu ese ena hahediba e hamaorodia Dirava ena Basileia bainema bae ḡuriḡurilaia neganai, e hamaorodia danu, namona na bae ḡuriḡuri Dirava ena ura ‘tanobada ai bae kara, guba ai e karamu na heto.’ Dirava na gubai, bona unuseniai kamonai anerudia ese hanaihanai iena ura e karaiamu. To, ina buka ena Karoa 3 ai ta dibaia, aneru dikana ta na se ura Dirava ena ura baine karaia bona Adam bona Heva e koidia bena e kara dika. Karoa 10 ai, Baibul ese una aneru dikana, Satana Diabolo, ena kara be herevalaiamu. Satana bona ia e badinaia anerudia, e gwauraidiamu demoni, na se koudia nega taina gubai bae noho. Una dainai, gubai aneru haida mo Dirava ena ura e karaiava. Dirava ena Basileia e lohia neganai, una na e idau. Pavapava matamatana, Iesu Keriso, ese Satana e tuari henia.​—Apokalupo 12:7-9 ba duahi.

12. Apokalupo 12:10 ai dahaka mai anina bada ḡaudia rua e herevalai?

¹² Ina peroveta herevana ese baine vara ḡauna na ini e  herevalaia toma: “Bena na kamonai, gado badana ta guba ai e hereva, eto, Harihari iseda Dirava ena hahemauri bona ena goada bona ena basileia, bona iena Keriso ena siahu, vada eme gini dae; badina be Dirava vairanai varavarada e habadelaidia boi e habadelaidia rani tauna [Satana] na vada e tahoa dobi.” (Apokalupo 12:10) Ina Baibul sirina ai mai anina bada ḡaudia rua ome itadia, a? Ginigunana be, Iesu Keriso ese Dirava ena Basileia e lohiaia matama. Iharuana be, Satana na guba amo e tahoa dobi tanobadai.

13. Satana na guba amo e tahoa dobi dainai dahaka e vara?

¹³ Unu kara ruaosi daidiai, dahaka e vara? Baibul ese gubai e vara ḡauna na ini herevalaia toma: “Guba e! Guba ai o nohomu taumui e! Idia daidiai ba moale.” (Apokalupo 12:12) Oibe, gubai kamonai anerudia na e moale, badina Satana bona ena demoni na da lasi dainai guba taudia iboudiai ese Iehova Dirava bae badinaia diba. Unuseniai maino korikorina bona lalotamona na mia. Gubai Dirava ena ura na da e vara.

14. Satana na e tahoa dobi tanobadai dainai dahaka e varamu?

¹⁴ To, tanobada be ede bamona? Baibul na e gwa: “Tanobada bona davara, madi ihabaimui! Badina be diabolo vada e vasi, e badu dikadikamu; badina be ia dibana ena nega eme kwadogi.” (Apokalupo 12:12) Satana na e badumu badina guba amo e tahoa dobi bona ena nega na kwadogi. Ena badu dainai tanobadai hekwakwanai idauidau e havaramu. Gabe karoana ai una baita dibaiamu. To una ta laloamu lalonai, baita henanadai, Edena dalai Basileia ese Dirava ena ura na tanobadai baine karaia?

15. Dirava ena ura tanobadai be dahaka?

¹⁵ Dirava ena ura tanobadai mani a laloa lou. Una na Karoa 3 ai o dibaia. Eden ai, Dirava ese e hahedinaraia iena ura na tanobada na baine paradaiso bona kara maoromaoro taudia ese bae noholaia hanaihanai. Satana ese Adam bona Heva e koidia bena e kara dika, bona una ese Dirava ena  ura tanobadai e hadikaia, to se haidaua. Iehova na dounu e uramu “kara maoromaoro taudia ese tano bae abia, bae noholaia hanaihanai.” (Salamo 37:29) Bona Dirava ena Basileia ese una baine haḡuḡurua. Edena dalai?

16, 17. Daniel 2:44 ese Dirava ena Basileia be ede e herevalaia toma?

¹⁶ Daniel 2:44 ena peroveta herevana mani a laloa. E gwa: “Unu pavapava edia nega ai guba Diravana ese basileia ta baine haginia, nega ta ai basie habuaia tari diba ḡauna, bena ena lohia siahuna na basine hanai bese idauna ta enai. Ia ese unu basileia iboudiai na baine hamakohidia sisisisi bona baine hadokodia, bena baine gini hanaihanai.” Una ese Dirava ena Basileia enai dahaka e hadibadamu?

¹⁷ Ginigunana be, e hadibadamu Dirava ena Basileia na “unu pavapava edia nega ai,” eiava basileia haida dounu bae lohia neganai, baine haginia. Iharuana be, e hadibadamu Basileia na baine gini hanaihanai. Gavamani haida ese gabuna basie abia eiava basie hadarerea. Ihatoina be, Dirava ena Basileia bona tanobada basileiadia na bae tuari. To Dirava ena Basileia baine kwalimu. Dokonai, una gavamani sibona ese taunimanima baine lohiadia. Bena taunimanima ese lohia dalana namona be moalelaiamu.

18. Dirava ena Basileia bona tanobada gavamanidia bogaraḡidiai be varamu tuari ginigabena ladana be dahaka?

¹⁸ Baibul ese Dirava ena Basileia bona tanobada gavamanidia bogaraḡidiai be varamu tuari ginigabena ai ḡau momo e herevalai. Heḡereḡere, e hadibadamu dokona baine kahikahi neganai, demoni ese koikoi herevadia amo “tanobada idoinai hanua hanua pavapavadia” lalodia bae veri. Dahaka dainai? Unu pavapava e “gogodiamu, siahu idoinai Diravana ena dina badana tuarina dainai.” Tanobada pavapavadia na be haboudiamu, “gabu ta ai, ladana Heberu gadodiai ai be Aramagedono.” (Apokalupo 16:14, 16) Unu siri ruaosi edia hereva dainai, tanobada gavamanidia bona Dirava ena Basileia bogaraḡidiai be varamu tuari ginigabena na e gwauraia Aramagedono tuarina.

19, 20. Dahaka dainai hari Dirava ena ura tanobadai na se varamu?

 ¹⁹ Aramagedono tuarina amo Dirava ena Basileia be dahaka be karamu? Dirava ena ura tanobadai mani a laloa lou. Iehova Dirava ena ura na kara maoromaoro taudia ese tanobada bae hahonua bona Paradaiso ai ia bae hesiai henia. Dahaka dainai hari una na do se vara? Badina ginigunana na, ita na kara dika tauda, bona ta goreremu bona ta masemu. To, Karoa 5 ai ta dibaia, Iesu na ita daidai e mase unu amo mauri hanaihanai baita abia diba. Danu, o laloataomu Evanelia bukana Ioane na e gwaumu: “Dirava ese tanobada ini e lalokau henia tomamu: Natuna vara-edeana vada eme heni, bae abidadama henia taudia iboudiai basie mase, a mauri hanaihanai bae abia.”​—Ioane 3:16.

²⁰ Badina iharuana na, taunimanima momo na kara dikadia e karamu. Edia hereva bona kara amo e koikoimu bona matabodaḡa karadia e karamu. Asie uramu Dirava ena ura bae karaia. Kara dikadia e karamu taudia na Dirava ena tuari, Aramagedono, ai be haorediamu. (Salamo 37:10 ba duahia.) To Dirava ena ura tanobadai se varamu badina ma ta na, tanobada gavamanidia ese taunimanima na se hagoadadiamu una ura bae karaia. Gavamani momo ese edia siahu na asie ḡaukaralaia namonamomu, e daḡedaḡemu bona koikoi karadia e karamu. Baibul na e gwaumu: “Taunimanima haida ese bamodia e biagudiamu bona e hahisidiamu.”​—Kohelete 8:9.

21. Basileia ese edena dalai Dirava ena ura tanobadai be haḡuḡuruamu?

²¹ Aramagedono murinai, gavamani tamona ese taunimanima baine lohiadia, una na Dirava ena Basileia. Una Basileia ese Dirava ena ura be haḡuḡuruamu bona hahenamo momo be mailaimu. Heḡereḡere, Satana bona ena demoni na laḡani daha ta lalonai guri dobu masemasena ai bae noho. (Apokalupo 20:1-3) Iesu ena boubou ḡauna ese abidadama taudia be durudiamu dainai basie goreremu bona basie masemu. Una dainai, Basileia ena lohia henunai,  idia na bae mauri hanaihanai. (Apokalupo 22:1-3 ba duahi.) Tanobada na paradaiso ai be laomu. Unu amo Basileia ese Dirava ena ura tanobadai be haḡuḡuruamu bona Dirava ladana be hahelaḡaiamu. Una anina be dahaka? Anina na Dirava ena Basileia henunai bae noho taudia iboudiai ese Iehova ladana be imodaiamu.

22. Dahaka dainai Iesu tanobadai e nohova eiava e toreisi lou murinai Dirava ena Basileia na do sema?

²² Iesu ese ena hahediba e hamaorodia bae ḡuriḡuri, “Emu basileia bainema,” una ese e hahedinaraiamu una negai Basileia na do sema. Iesu guba ela neganai Basileia ema, eiava? Lasi, badina Petro bona Paulo na e gwa Iesu e toreisi lou murinai, Salamo 110:1 ena peroveta herevana na ienai e ḡuḡuru, e gwaumu: “Iehova ese egu lohia e hamaoroamu, e tomu ‘Lau idibagu kahana ai ba helai, ela bona oi inaimu na aemu ihadaidia ḡaudia ai baina halaodia.’” (Kara 2:32-35; Heberu 10:12, 13) Una nega amo Iesu na una Basileia baine lohiaia negana e naria.

23. (a) Dirava ena Basileia be edena negai e lohia matama? (b) Karoa gabenai dahaka baita herevalaiamu?

²³ Ede daudauna e nari? Laḡani 1800 bona 1900 lalodiai, Baibul stiuden na e laloparara una nari karana na laḡani 1914 ai baine doko. (Una laḡani ba diba totona, Apendiks ai atikol ladana “Laḡani 1914—Baibul ai E Perovetalaia Laḡani Badana” ba itaia.) Tanobada heḡeḡemadai e vara ḡaudia ese e hamomokania, unu Baibul stiuden e lalopararalai ḡaudia na mamaoro. Baibul ena peroveta herevana e ḡuḡuru karana ese e hahedinaraiamu, laḡani 1914 ai Keriso na Pavapava ai ela bona Dirava ena guba Basileiana e lohiaia matama. Una dainai, ita na Satana ena ‘nega kwadogina’ lalonai ta nohomu. (Apokalupo 12:12; Salamo 110:2) Danu baita gwau dibamu, kahirakahira Dirava ena Basileia ese Dirava ena ura na tanobadai be havaraiamu. O laloamu una be sivarai namona, a? O abia daemu una be momokani, eiava? Karoa gabena ese be durumumu bena bo dibamu Baibul ese unu na e hahedibalaimu.