1, 2. Dahaka dainai ḡuriḡuri karana na hahenamo badana ta, bona dahaka dainai Baibul ena hereva ḡuriḡuri ai baita diba na namo?

GUBA hisiudia momo amo tanobada na maraḡi herea. Iehova, “guba bona tanobada ikaradia Diravana” enai tanobada besedia na ranu hetuturuna tamona na heto. (Salamo 115:15; Isaia 40:15) To, Baibul na e gwaumu: “Iehova na e boi heniamu taudia iboudiai dekedekediai, e boi heniamu mai momokanidia ida taudia iboudiai dekedekediai. Ia garina e garimu taudia iboudiai edia ura na ia ese e haḡuḡuruamu, edia taitai danu e kamonaimu.” (Salamo 145:18, 19) Una anina mani a laloa! Siahu idoinai Diravana na ita dekedekedai bona bema baita ‘boi heniamu mai momokanida ida,’ be kamonai henidamu. Ḡuriḡuri amo Dirava baita hereva henia na hahenamo badana ta!

² To, bema ta uramu Iehova ese eda ḡuriḡuri baine kamonai, namona na iena ura dalanai baita ḡuriḡuri. Unu baita kara toma totona, Baibul ese ḡuriḡuri e herevalaia dalana baita lalopararalaia na namo. Ḡau badana na Baibul ena hereva ḡuriḡuri ai baita diba, badina ḡuriḡuri karana ese be durudamu Iehova baita raka henia kahimu.

3. Iehova baita ḡuriḡuri henia badina badana ta be dahaka?

³ Iehova baita ḡuriḡuri henia badina badana ta na ia ese e hagoadadamu unu baita kara toma. Baibul na e gwaumu: “Ḡau ta basio lalo haguhilaia; a ḡau iboudiai ḡuriḡuri ai, noinoi ai, heimodai ai, emui ura na Dirava ba hamaorolaia. Bena Dirava ena maino, eda diba idoinai e hereaiamu mainona, ese lalomui bona daramui baine gima, Keriso Iesu lalonai.” (Filipi 4:6, 7) Momokani, ita na asita uramu guba bona tanobada e lohiadiamu Diravana ena ura baita dadaraia!

4. Edena dalai ḡuriḡuri hanaihanai karana ese eda hetura karana Iehova ida baine hagoadaia?

⁴ Baita ḡuriḡuri badina ma ta na, ḡuriḡuri hanaihanai karana ese eda hetura karana Iehova ida baine hagoadaia. Tura korikoridia na dia ḡau ta e uramu negadiai mo e herevaherevamu. To, tura namodia na turadia edia namo e lalo badamu, bona edia hetura karana na baine goada diba bema edia lalohadai, e lalo badamu ḡaudia bona edia hemami bae gwaurai hedinarai. Dala haida ai, eda hetura karana Iehova Dirava ida na unu bamona. Ina buka amo Baibul ese Iehova, iena kara  bona iena ura e hahedibalai daladia momo vada o dibadia. O diba Dirava na e noho momokanimu. Ḡuriḡuri karana ese dala baine kehoa emu lalohadai bona emu hemami korikori na Tamamu gubai ba hamaorolaia. Unu bo kara tomamu neganai, Iehova bo raka henia kahimu.​—Iakobo 4:8.

5. Dahaka ese e hahedinaraiamu Iehova ese ḡuriḡuri haida na se kamonaimu?

⁵ Iehova ese ḡuriḡuri iboudiai e kamonai henidiamu eiava? Mani peroveta tauna Isaia ena negai, gwau-edeede Israel taudia e hamaorodia herevana a laloa: “Ena be ḡuriḡuri momo ba gwaurai, to lau basina kamonai; imamui na rara ai e honumu.” (Isaia 1:15) Una ese e hahedinaraiamu, kara haida daidiai Dirava ese eda ḡuriḡuri basine kamonai diba. Una dainai, Dirava ese eda ḡuriḡuri baine kamonai totona, kara haida baita kara na namo.

6. Dirava ese eda ḡuriḡuri baine kamonai totona, dahaka na ḡau badana, bona ede baita hahedinaraia toma?

⁶ Baita karaia ḡauna badana ta na abidadama karana baita hahedinaraia. (Mareko 11:24 ba duahia.) Aposetolo Paulo na e gwa: “Asi ena abidadama tauna na Dirava ihamoalena asi dibana. Badina be Dirava iraka-heni-kahina e uramu tauna ese baine abia dae guna Dirava na e maurimu, bona ia e tahuamu taudia davadia namodia baine henidia.” (Heberu 11:6) Abidadama korikori na, ta dibamu Dirava na e nohomu, bona ia ese ḡuriḡuri e kamonaimu bona e haerelaimu, to una mo na dia heḡereḡere. Abidadama na eda kara amo baine hedinarai. Namona na eda dina ta ta maurina lalonai baita hahedinaraia ḡoevaḡoeva ita na mai eda abidadama.​—Iakobo 2:26.

7. (a) Dahaka dainai mai hematauraida ida Iehova baita ḡuriḡuri henia na namo? (b) Edena dalai mai manauda bona momokanida ida Dirava baita ḡuriḡuri henia?

⁷ Danu, Iehova na e uramu ia bae ḡuriḡuri henia taudia na mai manaudia bona momokanidia ida bae ḡuriḡuri.  Iehova ta hereva heniamu neganai baita manau na ḡau badana, ani? Taunimanima ese pavapava eiava praim minista e uramu bae hereva henia neganai, ena dagi dainai mai hematauraidia ida be hereva heniamu. Una dainai Iehova baita hereva henia neganai, namona na baita matauraia bada! (Salamo 138:6) Badina ia na “Siahu Idoinai Diravana.” (Genese 17:1, NWT) Dirava baita ḡuriḡuri henia neganai, namona na eda hereva amo baita hahedinaraia, Ia vairanai ita na kahu mo. Una manau karana ese baine duruda eda ḡuriḡuri na kudouda amo baita gwauraia, dia ḡuriḡuri dalana tamona baita badinaia, eiava hereva tamona baita gwauraia loulou.​—Mataio 6:7, 8.

8. Edena dalai ta ḡuriḡurilaimu ḡaudia heḡereḡeredia baita kara?

⁸ Dirava ese eda ḡuriḡuri baine kamonai totona baita karaia ḡauna ma ta na, eda ḡuriḡuri heḡereḡerena baita kara. Iehova na e uramu baita ḡaukara goada ta ḡuriḡurilaimu ḡaudia heḡereḡeredia baita kara. Heḡereḡere, bema eda ḡuriḡuri ai ta gwaumu, “Hari dina ai amai bame henimai,” namona na baita hekwarahi ḡaukara ta baita karaia, tauani idurulaina ḡaudia baita abi totona. (Mataio 6:11; 2 Tesalonika 3:10) Bema eda manoka ḡauna ta iahanaina dainai ta ḡuriḡurimu, namona na una hahetoho baine havaraia ḡaudia iboudiai baita dadarai. (Kolose 3:5) To danu, ḡuriḡuri dainai e varamu henanadaidia baita haerelaidia na namo.

9. Daika baita ḡuriḡuri henia, bona daika ladanai?

⁹ Daika baita ḡuriḡuri henia? Iesu ese ena hahediba taudia e hadibadia ini bae ḡuriḡuri toma, “Tamamai e, guba ai o nohomu.” (Mataio 6:9) Una dainai, Iehova Dirava mo baita ḡuriḡuri henia. To, Iehova na e uramu Ia Natuna vara-edeana, Iesu Keriso, ena dagi baita dibaia. Karoa 5 ai ta diba heḡereḡerena, Iesu na Dirava ese e siaia tanobadai, unu amo mauri davana e heni  kara dika bona mase amo e hoida. (Ioane 3:16; Roma 5:12) Ia na Dirava ese e abia hidi Hahelaḡa Tauna Badana bona Hahemaoro Tauna. (Ioane 5:22; Heberu 6:20) Una dainai, Baibul ese e hadibadamu eda ḡuriḡuri na Iesu ladanai baita gwauraia. Iesu na e gwa: “Dala na lau, hereva momokani na lau, mauri danu lau. Tamada dekena baela taudia iboudiai edia dala na lau.” (Ioane 14:6) Iehova ese eda ḡuriḡuri baine kamonai totona, namona na Natuna ladanai Ia baita ḡuriḡuri henia.

10. Dahaka dainai ta ḡuriḡurimu neganai baita tui diho eiava baita gini na dia ḡau badana?

¹⁰ Ta ḡuriḡurimu neganai, baita gini eiava baita tui diho be ḡau badana, eiava? Lasi. Iehova ese ede baita gini toma, eiava imada be ede baita ato toma na se gwauraia. Baibul ese e hadibadamu dala idauidau ai baita ḡuriḡuri diba. Unu dala haida na baita helai, baita igo diho, baita tui diho, eiava baita gini diba. (1 Sisiga 17:16; Nehemia 8:6; Daniel 6:10; Mareko 11:25) Ḡau badana na ita kudouda baine namo, to dia haida ese bae itada dainai baita tui diho eiava baita gini. Eda dina ta ta ḡaukaradiai eiava hekwakwanai negadiai, lalodai baita ḡuriḡuri diba, herevana ita be edekahai. Iehova ese unu ḡuriḡuri na e kamonaimu, ena be haida na asi dibadia ita na ta ḡuriḡurimu.​—Nehemia 2:1-6.

11. Ḡuriḡuri ai baita gwaurai lalohekwarahi ḡaudia haida be dahaka?

¹¹ Dahaka baita ḡuriḡurilai diba? Baibul na e gwaumu: “Dibada ḡau ta iena ura heḡereḡerena ai baita noia, ia [Iehova] ese baine hakala henida.” (1 Ioane 5:14) Una dainai, ḡau idauidau na Dirava ena ura heḡereḡerenai baita ḡuriḡurilai. Dirava e uramu eda lalohekwarahi ḡaudia baita ḡuriḡurilai, eiava? Oibe! Iehova ta ḡuriḡuri heniamu karana na turada namona ta hereva heniamu heḡereḡerena. Namona na ‘lalodai’ e miamu ḡaudia iboudiai Dirava enai baita gwaurai hedinarai. (Salamo 62:8) Lauma helaḡa baita noia na namo, badina ia ese baine duruda kara maorodia baita kara. (Luka 11:13) Danu baita noinoi Dirava ese baine duruda abi hidi maorodia baita kara bona goada baine henida  hekwakwanai baita haheaukalai. (Iakobo 1:5) Ta kereremu neganai, namona na baita noinoi Keriso ena boubou amo eda dika baine gwautao. (Efeso 1:3, 7) Momokani, eda lalohekwarahi ḡaudia mo basita ḡuriḡurilai. Namona na ruma bese taudia bona Kristen tadikaka daidiai baita ḡuriḡuri danu.​—Kara 12:5; Kolose 4:12.

12. Edena dalai eda ḡuriḡuri ai Tamada gubai ena ura baita ato guna?

¹² Eda ḡuriḡuri ai Iehova Dirava e uramu ḡaudia na baita ato guna. Dirava ena kara namodia dainai mai kudouda ida baita hanamoa bona baita tanikiu henia. (1 Sisiga 29:10-13) Mataio 6:9-13 ai Iesu na e gwa baita ḡuriḡuri neganai Dirava ladana baita hahelaḡaia. (Ba duahi.) Bena ma e gwa Dirava ena Basileia bainema, bona iena ura tanobada ai baine vara, guba ai e vara heḡereḡerena. Iesu ese Iehova ena ura ḡaudia e herevalai murinai, ta lalohekwarahilaimu ḡaudia e herevalai. Eda ḡuriḡuri lalonai Dirava ena ura ḡaudia baita ato gunamu neganai, baita hahedinaraiamu ita na siboda eda namo mo asita lalomu.

13. Dirava ese e abi daemu ḡuriḡuridia edia lata be Baibul ese ede e herevalaidia toma?

¹³ Eda ḡuriḡuri ena lata be ede bamona? Baibul ese ita siboda eiava taunimanima vairadiai ta gwauraimu ḡuriḡuridia edia lata na se gwauraia. Reana aniani do asita ani lalonai ḡuriḡuri kwadoḡina ta baita gwauraia, eiava eda lalohekwarahi ḡaudia Iehova enai ta gwauraimu neganai ḡuriḡuri latana ta baita gwauraia. (1 Samuel 1:12, 15) To, Iesu ese mai hekokorokudia ida taunimanima vairadiai ḡuriḡuri latadia e gwauraimu taudia na e gwauraidia dika. (Luka 20:46, 47) Iehova ese edia ḡuriḡuri na se moalelaimu. Una dainai ḡau badana na mai kudouda ibounai ida baita ḡuriḡuri. Dirava ese e abi daemu ḡuriḡuridia edia lata na idauidau, eda dabu bona noho daladia heḡereḡerediai.

14. Baibul ese ita e hagoadadamu ‘nega iboudiai baita ḡuriḡuri, basita hesiku’ anina be dahaka, bona baita moale badina be dahaka?

¹⁴ Nega hida baita ḡuriḡuri na namo? Baibul ese ita na e  hagoadadamu ‘nega iboudiai baita ḡuriḡuri, basita hesiku,’ ‘ḡuriḡuri baita goadalaia,’ bona ‘ḡuriḡuri basita hadokoa.’ (Luke 18:1; Roma 12:12; 1 Tesalonika 5:17) Unu siri anidia na dia dina ta lalonai miniti iboudiai Iehova baita ḡuriḡuri henia. To, Baibul ese e haḡanidamu baita ḡuriḡuri hanaihanai, Iehova ena kara namodia dainai baita tanikiu henia bona baita noia baine hakauda, tauhalo baine henida, bona baine hagoadada. Ta moalemu badina Iehova ese ia baita ḡuriḡuri henia negadia eiava edia lata hetoadia na se ato. Bema ḡuriḡuri ena namo baita laloa badamu, dala idauidau ai Tamada gubai baita ḡuriḡuri heniamu.

15. Dahaka dainai siboda eda ḡuriḡuri eiava taunimanima vairadiai ta gwauraimu ḡuriḡuridia dokodiai baita gwa, “Amen”?

¹⁵ Dahaka dainai ḡuriḡuri dokodiai baita gwa, “Amen”? Ina hereva “amen,” anina na “momokani,” eiava “unu baine vara toma.” Baibul ese e hahedinaraiamu ita siboda eda ḡuriḡuri eiava taunimanima vairadiai ta gwauraimu ḡuriḡuridia dokodiai baita gwa “Amen” na maoro. (1 Sisiga 16:36; Salamo 41:13) Siboda eda ḡuriḡuri dokodiai ta gwaumu “Amen” neganai, ta hamomokaniamu eda hereva na mai momokanida ida ta gwaurai. Ta ena ḡuriḡuri dokonai, “Amen” na lalodai eiava ta gwauraia badabadamu neganai, ta hahedinaraiamu iena hereva na ta abi daemu.​—1 Korinto 14:16.

16. Ḡuriḡuri karanai dahaka ta dibamu?

¹⁶ Iehova ese ḡuriḡuri e haerelaimu eiava? Oibe! Ta diba momokanimu “ḡuriḡuri ikamonaina Diravana” ese kudou namo taudia milioni momo edia ḡuriḡuri na e haerelaimu. (Salamo 65:2) Iehova ese dala idauidau ai eda ḡuriḡuri baine haerelai diba.

17. Dahaka dainai baita gwa diba, Iehova ese ena aneru bona hesiai taudia e ḡaukaralaidiamu eda ḡuriḡuri baine haerelai totona?

¹⁷ Iehova ese ena aneru bona hesiai taudia e ḡaukaralaidiamu  ḡuriḡuri baine haerelai totona. (Heberu 1:13, 14) Ekspiriens momo ese e hahedinaraiamu haida na e urava Baibul bae lalopararalaia dainai Dirava e noia, bena Iehova ena hesiai taudia ese e vadivadidia. Unu ekspiriens ese e hamomokaniamu aneru ese Basileia iharorolaina ḡaukarana na e gunalaiamu. (Apokalupo 14:6) Lalohekwarahi negadiai heduru iabina totona ta ḡuriḡurimu neganai, Iehova ese Kristen tauna ta baine ḡaukaralaia diba ita baine duruda.​—Hereva Lada-isidia 12:25; Iakobo 2:16.

18. Edena dalai Iehova ese iena lauma helaḡa bona Baibul amo ena hesiai taudia edia ḡuriḡuri e haerelaimu?

¹⁸ Danu, Iehova Dirava ese iena lauma helaḡa bona iena Hereva, Baibul, e ḡaukaralaidiamu ena hesiai taudia edia ḡuriḡuri baine haerelai totona. Hedibaḡani ihahanaidia totona heduru ta noimu neganai, iena lauma helaḡa amo e hakaudamu bona goada e henidamu. (2 Korinto 4:7) Iehova ena hahekau ta noiamu neganai, nega momo Baibul amo e durudamu abi hidi maorodia baita kara helaoreana. Siboda eda stadi lalodiai bona Baibul bukadia, heḡereḡere ina buka, baita duahimu negadiai heduru siridia baita davari dibamu. Kristen hebouna ta ai ta kamonaimu herevana eiava kongrigeisen elda ta ena hereva lalonai, reana iduruda siridia haida baita davarimu.​—Galatia 6:1.

19. Bema eda ḡuriḡuri haeredia asita abi haraḡamu, dahaka baita laloatao na namo?

¹⁹ Bema Iehova ese eda ḡuriḡuri na se haerelai haraḡamu, basitato ia na dia heḡereḡere baine duruda. To, namona na baita helalotao Iehova ese ena ura heḡereḡerenai ta gwauraimu ḡuriḡuridia na nega korikori ai e haerelaimu. Ia na eda dabu ḡaudia bona baine henida daladia na mai dibana. Ia na e uramu hanaihanai baita noinoi, baita hetahu bona baita pidipidi. (Luka 11:5-10) Hanaihanai unu baita kara tomamu neganai, Dirava na be dibamu ta ḡuriḡurilaimu ḡaudia na ta  lalodia badamu bona ta abia daemu eda ḡuriḡuri na baine haerelai diba. Danu, Iehova ese eda ḡuriḡuri na baita lalopararalaiamu dalanai be haerelaiamu. Heḡereḡere, reana hahetoho ta dainai heduru ta noimu neganai, una hahetoho na basine kokiamu, to goada be henidamu baita haheauka totona.​—Filipi 4:13 ba duahia.

20. Dahaka dainai hanaihanai baita ḡuriḡuri na namo?

²⁰ Ta moalemu badina guba bona tanobada ikaradia Diravana na ia e ḡuriḡuri heniamu mai hematauraidia ida taudia dekedekediai. (Salamo 145:18 ba duahia.) Ḡuriḡuri amo Iehova ta hereva heniamu na hahenamo badana ta dainai, namona na hanaihanai baita ḡuriḡuri. Unu baita kara tomamu neganai, ita ese Iehova, ḡuriḡuri ikamonaina Diravana, baita raka henia kahi diba.