HAHEMAORO Dinana be ede o laloa tomamu? Momo na e laloamu taunimanima bilioni momo na ta ta Dirava ena terona vairanai bae gini. Unuseniai, baine hahemaoro henidia. Haida be guba paradaisona baela, bona haida be hisihisi hanaihanai gabuna baela. To, Baibul ese una nega e herevalaia dalana na idau. Dirava ena Hereva na e gwaumu, una na dia gari negana, to ḡau iboudiai ihanamodia negana.

Apokalupo 20:11, 12 ai, aposetolo Ioane ese Hahemaoro Dinana na ini e herevalaia toma: “Terono kurokurona badana ta na itaia, bona e helai kau Diravana danu. Bena tanobada bona guba na ia vairana amo e heau puki, to edia gabu ta asie davaria. Bena mase taudia kikina badana na itadia, terono vairanai gigini; bona buka vada e hekeho. Bena buka ta ma e kehoa, mauri bukana; bona mase taudia na e hahemaoro henidia, edia kara buka ai e tore heḡereḡeredia.” Una Hahemaoro Tauna be daika?

Iehova Dirava na Hahemaoro Tauna badana. To, ia ese ta baine abia hidi hahemaoro ḡaukarana baine karaia. Kara 17:31 ai, aposetolo Paulo na e gwa, Dirava “ese dina ta vada e gwauraia hidi, una dina ai ena abi-hidi tauna ese tanobada idoinai baine hahemaoro henia mai maoromaorona ida.” E abia hidi baine  Hahemaoro tauna na Iesu Keriso, e toreisi lou tauna. (Ioane 5:22) To, Hahemaoro Dinana be edena negai baine hematama? Edena negai baine ore?

Apokalupo bukana ese e hahedinaraiamu, Aramagedono tuarina ai Satana ena tanobada oromana baine ore murinai, Hahemaoro Dinana baine matama. * (Apokalupo 16:14, 16; 19:19–20:3) Aramagedono murinai, Satana bona ena demoni na guri dobu-masemasena ai bae koudia ahu ela bona laḡani daha ta. Una negai, taunimanima 144,000 na gubai hahemaoro ḡaukarana bae karaia bona ‘Keriso ida bae lohia ela bona laḡani daha ta.’ (Apokalupo 14:1-3; 20:1-4; Roma 8:17) Hahemaoro Dinana na dia hora 24 lalonai bae karaia haraḡa ḡauna. Ia na laḡani daha ta lalonai bae karaia ḡauna.

Una laḡani daha ta lalonai, Iesu Keriso ese “mauri taudia bona mase taudia” baine hahemaoro henidia. (2 Timoteo 4:1) “Mauri taudia” na Aramagedono amo bae roho mauri “hutuma bada-herea” taudia. (Apokalupo 7:9-17) Danu, aposetolo Ioane ese “mase taudia . . . terono vairanai gigini” na e itadia. Iesu ena gwauhamata heḡereḡerena, “gara ai e nohomu taudia iboudiai ese [Keriso] gadona bae kamonaia; bena bae raka lasi.” (Ioane 5:28, 29; Kara 24:15) To, dahaka dainai baine hahemaoro henidia?

Aposetolo Ioane ena matahanai heḡereḡerena, “buka vada e hekeho,” bona “mase taudia na e hahemaoro henidia, edia kara buka ai e tore heḡereḡeredia.” (Apokalupo 20:12) Unu buka be taunimanima edia kara gunadia e tore bukadia, eiava? Lasi, hahemaoro na dia taunimanima do asie mase ai e kara karadia daidiai be karaiamu. Ede ta diba tomamu? Baibul na e gwaumu: “Mase tauna na kara dika ena amo vada e roho mauri.” (Roma 6:7) Una dainai, bae toreisi lou taudia edia kara dika gunadia na Dirava ese vada e gwaudiatao. Una dainai, unu buka ese Dirava ena haheḡani ma haida e laulaulaidia. Aramagedono amo bae roho mauri taudia bona bae toreisi lou taudia  na bae mauri hanaihanai totona, Dirava ena taravatu bona reana laḡani daha ta lalonai Iehova ese baine heni haheḡani matamatadia bae badinadia. Una dainai, taunimanima ta ta na Hahemaoro Dinana lalonai bae kara karadia heḡereḡeredia bae hahemaoro henidia.

Hahemaoro Dinana ai taunimanima bilioni momo ese Dirava ena ura bae dibaia bona bae badinaia. Anina na hahediba ḡaukara badana ta be varamu. Momokani, ‘tanobada inoholaina taudia ese kara maoromaoro bae dibaia.’ (Isaia 26:9) To, dia iboudiai ese Dirava ena ura be badinaiamu. Isaia 26:10 na e gwaumu: “Kara dika tauna bema lalo namo henia, to ia ese kara maoromaoro basinema dibaia; kara maoromaoro tanona ai ia na e kara gageva-gagevamu, bona Iehova hairaina se itaiamu.” Unu kara dika taudia na Hahemaoro Dinana ai bae mase ore.​—Isaia 65:20.

Hahemaoro Dinana dokonai, bae mauri taudia na mauri ḡoevadaena bae abia. Una dainai, Hahemaoro Dinanai taunimanima na bae ḡoevadae, matamana negana heḡereḡerena. (1 Korinto 15:24-28) Una murinai, hahetoho ginigabena da baine vara. Satana na ma bae ruhaia lou bena nega sisina lalonai taunimanima baine tohodia. (Apokalupo 20:3, 7-10) Satana bae dadaraia taudia ediai ina gwauhamata herevana na baine ḡuḡuru: “Kara maoromaoro taudia ese tano bae abia, bae noholaia hanaihanai.” (Salamo 37:29) Oibe, Hahemaoro Dinana na kara maoromaoro taudia edia hahenamo ta!