APENDIKS
Iesu be December ai E Vara Eiava?
BAIBUL ese Iesu e vara dinana na se gwauraia. To, e gwauraia herevadia haida amo ta dibamu Iesu na dia December ai e vara.
Iesu e vara gabuna, Betelehem, ena weda mani aita laloa. Iuda edia hua ladana Chislev (November/December padanai) na paraka bona medu negana. Una hua murina huana be Tebeth (December/January). Una na paraka herea huana, nega haida ororo kahadiai na snow danu e dihomu. Mani Baibul ese una gabu ena weda e herevalaia dalana aita itaia.
Esera 10:9, 13; Ieremia 36:22) Una dainai, December huanai una gabu ai e nohova mamoe ireḡudia taudia bona edia mamoe na hanuaboi ai murimuri ai asie taruhava!
Baibul itorena tauna Esera ese e hahedinaraia Chislev huana na paraka bona medu negana. Esera na e gwa, “hua ihataurahani-tana [Chislev] dinana iharuahuina” ai hutuma na Ierusalem ai e hebou neganai, “e heude-heudeva, . . . medu e diho badabadava dainai.” Hebou taudia ese una nega na ini e gwauraia toma: “Ina na medu momo negana; ai na murimuri ai basia gini diba.” (To, Baibul na e gwaumu Iesu e vara hanuaboinai, mamoe ireḡudia taudia na murimuri ai edia mamoe e reḡudiava. Baibul itorena tauna Luka ese e hahedinaraia, una negana ai mamoe ireḡudia taudia na Betelehem badinai “vahu ai e nohova, hanuaboi ai edia seri e gimadiava.” (Luka 2:8-12) Mani a laloa, mamoe ireḡudia taudia na vahu eiava murimuri ai nonoho, dia dinai e loaloava heḡereḡerena. Edia mamoe na hanuaboi ai murimuri ai e naridiava. Bema December ai Betelehem na medu bona keru negana, murimuri ai bae noho diba, eiava? Lasi. Iesu e vara dinana ai e vara ḡaudia ese e hamomokaniamu, ia na dia December ai e vara. *
Dirava ena Hereva ese Iesu e mase dinana na e hahedinaraia ḡoevaḡoeva, to e vara neganai e vara ḡaudia haida mo e gwaurai. Una dainai King Solomon ena hereva baita laloa: “Lada namona ese dehoro namo-hereana e hereaiamu, bona mase dinana ese vara dinana e hereaiamu.” (Kohelete 7:1) Una dainai basita hoa, Baibul ese Iesu ena haroro ḡaukara bona ena mase na e herevalaia momo to ena vara negana na se herevalaia momo.
^ par. 1 Bema o uramu hereva ma haida ba diba, Buka Helaga Herevalaia bukana, rau 93-96 ba itaia. Iehova ena Witnes taudia ese e karaia.