1. Dahaka dainai Etiopia eunuko tauna na e ura baine bapatiso?

“A ITAIA ranu binai. Dahaka ese ibapatisogu e laoa ahumu?” Una henanadai na aposetolo edia negai Etiopia eunuko tauna ese e heni. Kristen tauna ta ladana Filipo ese ienai e hahedinaraia Iesu na gwauhamata Mesiana. Una  Etiopia tauna na Toretore Helaḡadia amo e diba ḡaudia ese kudouna e hamarerea dainai, kara ta e karaia. E ura baine bapatiso!​—Kara 8:26-36.

2. Dahaka dainai bapatiso lalohadaina bavabia na namo?

² Bema oi na Iehova ena Witnes ta ida ina buka karoana ginigunadia da o stadilai, reana bo henanadaimu, ‘Dahaka ese egu bapatiso e kouamu?’ Oi na da mai dibamu, Baibul na e gwauhamata, mauri hanaihanai na Paradaiso ai be varamu. (Luka 23:43; Apokalupo 21:3, 4) Danu, mase taudia ediai e varamu ḡauna bona toreisi lou helarona na da o diba. (Kohelete 9:5; Ioane 5:28, 29) Reana Iehova ena Witnes taudia edia kongrigeisen heboudia do laomu bona tomadiho momokanina e badinaiamu daladia na do ita. (Ioane 13:35) Mai anina bada ḡauna na, oi na Iehova Dirava ida do heturamu.

3. (a) Iesu be dahaka haheḡani e heni? (b) Ranu bapatisona be ede e karaia tomamu?

³ Edena dalai ba hahedinaraia oi na o uramu Dirava ba hesiai henia? Iesu ese ena hahediba e haḡanidia: “Baola, bese iboudiai hahediba ai ba halaodia, bona . . . ba ha bapatisodia.” (Mataio 28:19) Iesu na ranu lalonai e bapatiso neganai, haheitalai namona e hahedinaraia. Ia na ranu taina amo se nevaria o kwarana mo se dairia. (Mataio 3:16) Ina hereva “bapatiso” na Grik herevana, bona anina na “ranu lalonai ba urua diho.” Una dainai, Kristen bapatisona anina na, ta na ranu lalonai bae urua diho eiava bae hadihoa.

4. Ranu bapatisona ese dahaka e hahedinaraiamu?

⁴ Iehova Dirava e uramu bae hetura henia taudia iboudiai ese ranu bapatisona bae abia na namo. Taunimanima vairadiai ba bapatiso karana ese e hahedinaraiamu oi na o uramu Dirava ba hesiai henia. Danu, e hahedinaraiamu Iehova ena ura ikarana na o moalelaiamu. (Salamo 40:7, 8) To, bapatiso bavabi totona, kara haida ba kara na namo.

5. (a) Ba bapatiso totona, ba karaia ḡauna ginigunana be dahaka? (b) Dahaka dainai kongrigeisen heboudia na mai anidia bada?

⁵ Kara ginigunana na do karaia. Edena dalai? Hanaihanai Baibul o stadilaiamu karana amo Iehova Dirava bona Iesu Keriso o dibadiamu. (Ioane 17:3 ba duahia.) To una mo na dia heḡereḡere. Kristen taudia na e uramu Dirava ena ‘ura bae diba’ maoromaoro. (Kolose 1:9) Iehova ena Witnes taudia edia kongrigeisen heboudia baola karana ese baine durumu una diba bavabia. Unu hebou baola na mai anidia bada. (Heberu 10:24, 25) Hanaihanai hebou ilao henina karana ese baine durumu Dirava ba dibaia.

6. Ba bapatiso totona, Baibul ibounai ba dibaia guna be namo, eiava?

⁶ Dia Baibul ibounai ba dibaia guna bena ba heḡereḡere ba bapatiso. Etiopia eunuko tauna na diba haida na de abi, to ta ese baine durua Buka Helaḡa ai kaha ma haida baine lalopararalai na namo. (Kara 8:30, 31) Una heḡereḡerena, oi danu ḡau momo dounu bo dibamu. Dirava idibana karana na asi dokona. (Kohelete 3:11) To, do so bapatiso lalonai, namona na Baibul ena hahediba hereva badadia ba diba bona bavabi dae. (Heberu 5:12) Unu hahediba herevadia haida na, mase taudia ediai e varamu ḡauna, Dirava ladana anina bona iena Basileia.

7. Edena dalai Baibul istadilaina karana ese baine durumu?

⁷ To, diba mo bavabi na dia heḡereḡere, badina be “asi ena abidadama tauna na Dirava ihamoalena asi dibana.” (Heberu 11:6) Baibul ese e hadibadamu, idaunegai Korinto hanua ai haida na Iesu ena hahediba ese e harorolaiava sivaraina e kamonai neganai “e abia dae, bona bapatiso e abia.” (Kara 18:8) Una heḡereḡerena, Baibul istadilaina karana ese emu abidadama baine hagoadaia bena bavabia dae Baibul na Dirava ena lauma amo e havaraia herevana. Danu, baine durumu Dirava ena gwauhamata bona Iesu ena boubou ḡauna ena siahu  bavabidadama henidia totona.​—Iosua 23:14; Kara 4:12; 2 Timoteo 3:16, 17.

8. Dahaka ese baine hagoadamu o dibamu ḡaudia ba herevalai hedinarai totona?

⁸ Emu abidadama be goadamu neganai, o dibamu ḡaudia na bo herevalai hedinaraimu. (Ieremia 20:9) Bo ura dikadikamu Dirava bona ena ura na haida ba hadibalaidia.​—2 Korinto 4:13 ba duahia.

9, 10. (a) Daidia vairadiai Baibul ena hereva momokani ba herevalaia diba? (b) Bema o uramu Iehova ena Witnes taudia ida ba haroro, dahaka ba kara na namo?

⁹ Reana aonega dalanai varavaramu, turamu, dekemu taudia, bona o ḡaukara heboumu taudia vairadiai Baibul ena hereva momokani na bo herevalaiamu. Gabeai, bo uramu Iehova ena Witnes taudia ida ba haroro. Una neganai, e stadi henimumu Witnes tauna ba hadibaia. Bema oi na heḡereḡere ba haroro, oi bona e stadi henimumu tauna na kongrigeisen elda rua ida ba hebou.

¹⁰ Unu amo Dirava ena mamoe serina e reḡudiamu elda taudia haida bo dibadiamu. (Kara 20:28; 1 Petro 5:2, 3) Bema be itaiamu oi na Baibul ena hahediba hereva badadia o lalopararalaimu bona o abi daemu, Dirava ena hahekau herevadia o badinamu, bona o uramu Iehova ena Witnes ta ai baola, be hadibamumu oi na heḡereḡere bapatiso lasi pablisa ai baola bona ba haroro diba.

11. Dahaka ba kara na namo, unu amo ba heḡereḡere haroro ḡaukara ba karaia?

¹¹ To danu, namona na emu mauri dalana eiava o manadalai karadia haida ba haidau, bena ba heḡereḡere haroro ḡaukara ba karaia. Una anina na hehuni ai o karamu kara dikadia danu ba dadarai. Una dainai, bapatiso lasi pablisa ai do sola lalonai, namona na kara dika badadia, heḡereḡere matabodaḡa karadia, inuinu kekero,  bona drag iabina karadia ba dadarai.​—1 Korinto 6:9, 10; Galatia 5:19-21 ba duahi.

12. Dahaka dainai ba helalo-kerehai na ḡau badana?

¹² Kara ma haida ba kara guna na namo, unu amo ba heḡereḡere ba bapatiso. Aposetolo Petro na e gwa: “Ba helalo lou, ba helalo kerehai; bena emui dika bae heabi oho.” (Kara 3:19) Ba helalo-kerehai anina na guna o karaia kererena dainai ba sori. Bema ta na matabodaḡa karadia e kara, baine helalo-kerehai na namo, to kara mirodia se kara tauna danu baine helalo-kerehai na namo. Dahaka dainai? Badina taunimanima iboudiai na mai edia kara dika bona Dirava ese edia dika baine gwautao na namo. (Roma 3:23; 5:12) Baibul do so stadilaia neganai, Dirava ena ura na asi dibamu. Una dainai Dirava ena ura na so badinaiava, ani? Una dainai, ba helalo-kerehai na ḡau badana.

13. Emu kara ba haidau anina be dahaka?

¹³ Ba helalo-kerehai murinai, namona na “ba helalo lou” eiava emu kara ba haidau. Emu kara daidiai ba lalohisihisi mo na dia heḡereḡere. Namona na emu kerere gunadia ba dadarai bona lalomu ba hadaia kara maorodia ba kara. Bapatiso do so abi neganai, namona na ba helalo-kerehai bona emu kara ba haidau.

14. Bapatiso do so abi neganai, dahaka ba kara na namo?

¹⁴ Bapatiso do so abi neganai, mai anina bada ḡauna ma ta ba karaia. Namona na Iehova Dirava enai emu mauri ba gwauhamatalaia.

15, 16. Dirava enai emu mauri ba gwauhamatalaia anina be dahaka, bona dahaka ese ta baine hagoadaia unu baine kara toma?

¹⁵ Ḡuriḡuri ai emu mauri na Iehova Dirava enai ba gwauhamatalaia neganai, anina na o gwauhamatamu Ia mo ba tomadiho henia. To, dahaka dainai ta na be uramu unu  baine kara toma? Mani mero ta bona kekeni ta bae hetura matama dalana aita laloa. Mero na kekeni ena mauri dalana be dibamu bona ena kara namodia be itamu neganai, be ura henia badamu. Una dainai kekeni be noiamu baine adavaia totona. Ena be bae headava murinai maduna na momo. To lalokau dainai kekeni be adavaiamu.

¹⁶ Iehova bo dibaiamu bona bo lalokau heniamu neganai, ḡau ta ese basine koumumu Ia ba tomadiho henia eiava ba hesiai henia totona. Bema ta na e uramu Iesu Keriso murinai baine raka, ia na “sibona baine hedadarai” na namo. (Mareko 8:34) Siboda baita hedadarai, bema eda ura ḡaudia bona mauri ai ta tahumu ḡaudia ese Dirava ikamonai henina karana basine laoa ahu. Una dainai, do so bapatiso neganai, namona na emu mauri ai Iehova Dirava ena ura ikarana ba laloa bada.​—1 Petro 4:2 ba duahia.

17. Dahaka dainai haida na asie uramu Dirava bae gwauhamata henia?

¹⁷ Haida na asie uramu edia mauri Iehova enai bae gwauhamatalaia, badina una na kara badana. E garimu badina e laloamu Dirava ese edia kara dainai be hahemaoro henidiamu. Danu, bema edia gwauhamata basie haḡuḡuruamu, Iehova na be lalohisihisimu, una dainai asie uramu Dirava bae gwauhamata henia.

18. Dahaka ese baine hagoadamu Iehova ba gwauhamata henia totona?

¹⁸ Iehova ilalokau henina karana bo dibaiamu neganai, be hagoadamumu emu mauri bo gwauhamatalaiamu, bona una gwauhamata bo haḡuḡuruamu. (Kohelete 5:4) Emu mauri bo gwauhamatalaiamu murinai, bo uramu Iehova “imatauraina ai ba raka, kara iboudiai ia ba hamoalea.” (Kolose 1:10) Dirava o lalokau heniamu dainai, iena ura bo karaiamu. Una na momokani badina aposetolo Ioane na e gwa: “Dirava iura-henina anina binai: ena  haheḡani baita badina. Ena haheḡani danu dia memetau.”​—1 Ioane 5:3.

19. Dahaka dainai Dirava enai emu mauri ba gwauhamatalaia totona basio gari?

¹⁹ Dia ba ḡoevadae guna bena Dirava enai emu mauri ba gwauhamatalaia. Iehova na emu goada hetoana na mai dibana bona se dorimumu basio kara diba ḡaudia ba kara. (Salamo 103:14) Ia ese be durumumu badina e uramu emu gwauhamata ba haḡuḡurua. (Isaia 41:10 ba duahia.) Bema mai kudoumu idoinai ida Iehova bavabidadama henia, “ia ese emu dala baine hamaoromaorodia.”​—Hereva Lada-isidia 3:5, 6.

20. Dahaka dainai eda gwauhamata na baita hahedinaraia?

²⁰ Tame herevalai ḡaudia bo lalodiamu karana ese be durumumu ḡuriḡuri amo emu mauri na Iehova enai bo gwauhamatalaiamu. Danu Dirava e lalokau henia momokanimu taudia na ‘ududia ena hegwaurai amo mauri’ bae abia. (Roma 10:10) Edena dalai una ba karaia?

21, 22. Edena dalai taunimanima vairadiai emu abidadama ba hahedinaraia?

 ²¹ Emu kongrigeisen elda oreana ena kodineita ba hadibaia oi na o uramu ba bapatiso. Ia ese elda haida baine abidia hidi bena henanadai haida amo Baibul ena hahediba hereva badadia ba herevalai. Bema elda na bae lalotamona oi na heḡereḡere, be hadibamumu hebouhebou gabenai ba bapatiso diba. * Unu hebouhebou ai tadikaka ta ese bapatiso herevana be henimu. Bena bae bapatiso taudia iboudiai be noidiamu henanadai rua bae haerelai, unu amo edia abidadama bae gwaurai hedinarai.

²² Taunimanima vairadiai ba bapatiso karana amo bo hahedinaraiamu oi na Dirava do gwauhamata henia bona hari oi na da Iehova ena Witnes ta. Bapatiso taudia na ranu lalonai e hadihodiamu karana amo e hahedinaraiamu idia na Iehova de gwauhamata henia.

23. “Tamana, Natuna, Lauma Helaḡa ladana ai” ta baine bapatiso anina be dahaka?

²³ Iesu na e gwa, iena hahediba na “Tamana, Natuna, Lauma Helaḡa ladana ai” bae bapatiso. (Mataio 28:19) Anina na baine bapatiso tauna ese Iehova Dirava bona Iesu Keriso edia dagi baine lalopararalaia. (Salamo 83:18; Mataio 28:18) Danu, ia ese Dirava ena lauma helaḡa eiava ḡaukara siahuna e ḡaukaramu dalana baine lalopararalaia.​—Galatia 5:22, 23; 2 Petro 1:21.

24, 25. (a) Bapatiso ese dahaka e laulaulaia? (b) Edena henanadai na karoa dokona ese be haerelaiamu?

²⁴ To, bapatiso na dia ranu lalonai ba diho karana mo. Bapatiso na mai anina bada ḡauna ta e laulaulaia. Ranu lalonai ba diho karana ese e hahedinaraiamu emu mauri gunana na da o masetania. Ranu amo ba dae karana ese e  hahedinaraiamu oi na da mauri matamatana o abia Dirava ena ura ba karaia totona. Danu, ba helalotao, oi ese emu mauri na Iehova Dirava sibona enai o gwauhamatamalaia, dia ḡaukara ta, taunimanima ta, eiava orea ta enai o gwauhamatalaia. Gwauhamata bona bapatiso karana ese Dirava ida emui hetura karana be hanamoamu.​—Salamo 25:14.

²⁵ Bapatiso karana mo ese se hahedinaraiamu oi na hahemauri bavabia. Aposetolo Paulo na e gwa: “Mai garimui bona mai heude-heudemui ida ihamaurimui ba tahua.” (Filipi 2:12) Bapatiso na hahemauri bavabia dalana e kehoamu. Henanadai na ina, Edena dalai Dirava ena lalokau ai ba noho? Karoa dokona ese una henanadai be haerelaiamu.