BAIBUL ese Kristen taudia e haḡanidia Keriso ena mase Ilalotaona hebouna bae karaia. Una hebou na e gwauraiamu, “Lohiabada ena anibou.” (1 Korinto 11:20) Dahaka dainai una hebou na mai anina bada? Edena negai bona edena dalai bae karaia?

Laḡani 33 C.E. ai, Iuda taudia edia Pasova hanuaboina ai, Iesu Keriso ese una hebou e matamaia. Laḡani ta lalonai Pasova na nega tamona mo e karaiava, Iuda taudia edia hua ladana Nisan dinana namba 14 ai. Nisan huana na March lalonai, hua matamatana e hedinaraiva neganai e matamava. Iuda taudia ese dina 14 e duahiva, bena dina e dihova murinai Pasova e karaiava.

Iesu na ena aposetolo ida Pasova e karaia, bena Iuda Iskariote e siaia oho murinai, Lohiabada ena Anibou e matamaia. Una anibou ese Iuda taudia edia Pasova gabuna e abia, una dainai laḡani ta lalonai nega tamona mo bae karaia na namo.

Evanelia bukana Mataio na e gwa: “Iesu ese flaoa atagana ta e abia, e hanamoa, bena e bitua, ena hahediba e henidia, eto, Avabia, avania, lau  taugu binai. Ma kehere ta e abia, e hanamoa, e henidia, eto, Iboumui ai a inua; badina be ina na lau raragu, herohemaino rarana, hutuma daidiai baine hebubu, dika igwautaona.”​—Mataio 26:26-28.

Haida na e laloamu Iesu ese parao na ia tauanina korikori ai e halaoa bona wain na rarana korikori ai e halaoa. To, Iesu ese parao e heni neganai, ia na dounu mauri. Iesu ena aposetolo be ia tauanina korikori e ania bona rarana e inua, a? Lasi, badina taunimanima ianidia karana na Dirava ena taravatu iutuna karana. (Genese 9:3, 4; Levitiko 17:10) Luka 22:20 ai Iesu na e gwa: “Ina kehere na herohemaino [“kontraka,” Nega Matamata Baibel] matamatana lau raragu ai, umui daimui ai baine hebubu.” Una kehere be “kontraka matamatana” ai ela, eiava? Lasi, badina kontraka na gwaubou karana, ia na dia kohu korikorina ta.

Una dainai, parao bona wain na ḡau haida e laulaulai. Parao ese Keriso tauanina ḡoevadaena e laulaulaia. Iesu ese Pasova ariana ai e ḡaukaralaia paraona ta e ḡaukaralaia. Una parao ai hatubua muramurana na asie atoa. (Esodo 12:8) Nega momo Baibul ai hatubua muramurana ese kara dika e laulaulaia. Una dainai parao ese Iesu tauanina ḡoevadaena e bouboulaia ḡauna, e laulaulaia. Ia na asi ena kara dika.​—Mataio 16:11, 12; 1 Korinto 5:6, 7; 1 Petro 2:22; 1 Ioane 2:1, 2.

Wain kakakakana ese Iesu rarana e laulaulaia. Una rara ese herohemaino matamatana e hamomokania. Iesu na e gwa ia rarana na e hebubu “dika igwautaona” totona. Unu amo taunimanima na Dirava matanai bae ḡoeva bona Iehova ida herohemaino matamatana bae karaia. (Heberu 9:14; 10:16, 17) Ina herohemaino eiava kontraka dainai, abidadama Kristen taudia 144,000 na guba baela diba. Unuseniai idia na pavapava bona hahelaḡa ḡaukarana bae karaia taunimanima iboudiai idurudia totona.​—Genese 22:18; Ieremia 31:31-33; 1 Petro 2:9; Apokalupo 5:9, 10; 14:1-3.

Daidia ese Memorial paraona bae ania bona wain bae inua? Kontraka matamatana e karaia taudia​—guba helarona e abia taudia​—sibodia ese parao bae ania bona wain bae inua.  Dirava ena lauma helaḡa ese e hadibadiamu, idia na Dirava ese e abidia hidi gubai bae pavapava. (Roma 8:16) Danu, Iesu ese idia na Basileia e gwauhamatalai henidia.​—Luka 22:29.

Tanobada Paradaisona ai mauri hanaihanai helarona bae abia taudia be ede bamona? Idia na Iesu ena haheḡani e badinaiamu dainai, mai hematauraidia ida Lohiabada ena Anibou e laomu, to parao na asie aniamu bona wain na asie inuamu. Laḡani ta ta ai nega tamona mo, Nisan 14 dina e dihomu murinai, Iehova ena Witnes taudia ese Lohiabada ena Anibou e karaiamu. Ena be tanobada heḡeḡemadai Kristen taudia haida mo guba helarona e abia, to Kristen taudia iboudiai ediai una hebou na mai anina bada. Una hebou ai taunimanima iboudiai ese Iehova Dirava bona Iesu Keriso edia lalokau hereadaena bae laloa lou diba.​—Ioane 3:16.