1-3. Taunimanima ese mase dainai dahaka henanadai e henimu, bona tomadiho idauidau edia haere be dahaka?

TAUNIMANIMA ese unu henanadai na laḡani tausen momo lalodiai e lalohadailai. Unu na mai anidia bada henanadaidia. Herevana ita be daidia eiava edeseniai ta nohomu, to unu henanadai haeredia baita diba na mai anidia.

² Karoa 5 ai, ita ese Iesu Keriso ena mauri idavalaina boubouna amo mauri hanaihanai baita abia dalana ta herevalaia. Bona ta diba Baibul na e gwa nega ta ‘mase baine ore.’ (Apokalupo 21:4) To, ita na dounu ta masemu. Aonega Pavapavana Solomon na e gwa: “Mauri taudia na dibadia do bae mase.” (Kohelete 9:5) Ena be ta uramu eda mauri baita hadaudaua. To dounu ta daradaramu, baita masemu neganai edai be dahaka be varamu.

³ Eda lalokau taudia e masemu neganai ta lalohisihisi badamu. Bona baita henanadaimu: ‘Idia be ede ela? Idia e hisihisimu? Ita e naridamu? Baita durudia diba, eiava? Baita itadia lou dibamu eiava?’ Tomadiho iboudiai edia haere na idauidau. Haida na e gwaumu bema emu mauri na namo guba bo laomu, to bema emu mauri na dika lahi ai bo hisihisimu. Tomadiho ma haida na e gwaumu, taunimanima e masemu neganai, lauma edia gabu e laomu senedia dekedia. To ma haida na e gwaumu mase taudia na bae hahemaoro  henidia totona tanobada henuna e laomu, bena tauani idauna ta ai e vara loumu.

4. Tomadiho momo ese mase dainai edena lalohadai e hahedibalaiamu?

⁴ Unu tomadiho hahedibadia ese lalohadai tamona e hahedinaraiamu​—ta masemu neganai tauanida kahana ta na dounu e maurimu. Idaunega amo ema bona hari, kahirakahira tomadiho iboudiai na e laloamu, ta masemu murinai baita mauri hanaihanaimu dainai, baita roharohamu, baita kamonaimu, bona baita lalohadai dibamu. To, una momokani? Ita harada e ḡaukaramu dainai, ta kamonaimu, ta roharohamu, bona ta lalohadaimu. Baita masemu neganai, harada na basine ḡaukaramu. Una dainai, ḡau ta basita laloataomu, basita hemamimu, basita kamonaimu bona ḡau ta basita itaiamu.

5, 6. Baibul ese mase be ede e herevalaia tomamu?

⁵ Iehova na mai dibana mase tauna enai be dahaka e varamu, badina ia ese taunimanima haradia e havaraia. Una dainai, iena Hereva, Baibul lalonai mase taudia ediai e varamu ḡauna na e gwauraia hedinarai. Herevana bina: Ta e masemu neganai, ia na dia mauri. Mase bona mauri na idau. Mase taudia na asie roharohamu, asie kamonaimu, eiava asie lalohadaimu. Ta masemu neganai, tauanida kahana ta na se maurimu. Bona tauanida ai basine mase diba maurina eiava laumana na lasi. *

⁶ Solomon ese ina hereva, “mauri taudia na dibadia do bae mase” e gwauraia murinai, e gwa: “A mase taudia na ḡau ta asi dibadia.” Bena una hereva ihabadana totona ma e gwa mase taudia edia heura-heni, edia heinai-heni na e oremu bona “mase taudia edia gabu lalonai na asi ḡaukara ta, asi lalo-hadai ta, asi lalo-parara ta, bona asi aonega ta.” (Kohelete 9:5, 6, 10 ba duahi.) Una heḡereḡerena, Salamo 146:4 na e gwaumu ta e masemu neganai, “ena lalo-hadai e oremu.” Ita na baita mase diba bona ta masemu neganai tauanida na se maurimu. Ta  moalelaiamu maurina na kandolo hururuna na heto. Hururu ta habodoamu neganai, ia na ma gabu ta se laomu. To e ore vaitanimu.

7. Iesu ese mase be dahaka ida e haheḡereḡerea?

⁷ Iesu Keriso ese mase taudia ediai e varamu ḡauna e herevalaia. Ia turana namona Lasaro e mase neganai, una na e hedinarai ḡoevaḡoeva. Iesu ese ena hahediba e hamaorodia: “Turada Lasaro na e mahutamu.” Hahediba taudia na e laloava Iesu ena hereva anina na Lasaro na gorere amo baine namo lou totona, e laḡa-aniva. To edia lalohadai na kerere. Iesu na e gwa: “Lasaro na vada e mase.” (Ioane 11:11-14 ba duahi.) Iesu ese mase na mahuta ida e haheḡereḡerea. Lasaro na dia guba ela eiava hel lahinai. Ia na dia aneru eiava senena ida e ha hedavari. Lasaro na dia tauani idauna ta ai e vara lou. Ia na mase ai e laḡa-ani, bema mahuta boio na heto. Baibul siridia haida ese danu mase na mahuta ida e haheḡereḡerea. Heḡereḡere, hahediba tauna Stefano na nadi amo e hodoa mase neganai, Baibul na e gwa “bena e mahuta.” (Kara 7:60) Una heḡereḡerena, aposetolo Paulo ese iena negai e nohova taudia haida e herevalaidia eto idia na mase ai “vada e mahuta.”​—1 Korinto 15:6.

8. Ede ta diba tomamu Dirava na se uramu taunimanima bae mase?

⁸ Matamanai Dirava ena ura be taunimanima bae mase, eiava? Lasi! Iehova ese taunimanima e karadia na tanobadai bae mauri hanaihanai. Ina buka matamana kahanai ta dibaia, Dirava ese tau bona hahine ginigunadia na paradaiso hairainai e atodia. Mauri ḡoevadaena e henidia. Iehova na e ura edia mauri na baine namo. Tama lalokauna ta be e uramu natuna na buruka bona mase dainai baine hisihisi, eiava? Lasi! Iehova ese natuna na e lalokau henidiamu  bona e uramu tanobadai bae moale hanaihanai. Baibul ese taunimanima na ini e herevalaidia toma: “[Iehova] ese nega hanaihanai na lalodia ai e atoa.” (Kohelete 3:11, NWT) Dirava ese ita e havarada neganai, mauri hanaihanai urana danu e heni. Bona dala e karaia una ura baine ḡuḡuru totona.

9. Iehova ese edena taravatu na Adam bona Heva e henidia, bona dahaka dainai una ibadinana na dia auka?

⁹ Dahaka dainai taunimanima e masemu? Haere baita  diba totona, namona na tau bona hahine ginigunadia mo tanobadai e nohova neganai e vara ḡauna aita laloa. Baibul na e gwaumu: “Dirava Iehova ese au danu tano ai e havaradia, ita-itadia bona ianidia nanamo audia iboudiai.” (Genese 2:9) To, taravatu ta e henidia. Iehova ese Adam e hamaoroa: “Imea audia iboudiai huahuadia bavani, emu ura heḡereḡerena; a namo bona dika idibalaidia auna huahuana una mo basio ania; badina be ia bavania dinana ai oi na ba mase vaitani.” (Genese 2:16, 17) Una taravatu ibadinana na dia auka. Adam bona Heva ese bae ani au huahuadia na momo herea. To, una haheḡani ese dala e kehoa idia ese Dirava, ḡau iboudiai bona mauri ḡoevadaena e henidia tauna, bae tanikiu henia. Danu, bema una haheḡani bae badinaia, idia ese Tamadia gubai ena siahu bae matauraia bona bae hahedinaraia idia na e uramu iena lalokau dalana bae badinaia.

10, 11. (a) Edena dalai tau bona hahine ginigunadia ese Dirava asie kamonai henia? (b) Dahaka dainai Adam bona Heva edia gwau-edeede karana na kerere badana?

¹⁰ Madi, tau bona hahine ginigunadia ese Iehova na asie kamonai henia. Satana na gaigai ta amo Heva e hereva henia, eto: “Momokani Dirava eto umui na imea audia ta huahuana basio ani a?” Heva e haere, eto: “Imea audia huahuadia baia ani; to Dirava eto ‘Imea bogaraḡinai e ginimu auna huahuana basio ania bona basio daua toho, ba mase na garina.’”​—Genese 3:1-3.

¹¹ Satana eto: “Momokani, umui na basio mase: Dirava vada dibana raruosi bavania dinana ai na matamui bae papa, bena Dirava ida ba heḡereḡere, namo bona dika ba diba.” (Genese 3:4, 5) Satana na e ura Heva na baine abia dae una taravatu au huahuana baine ania neganai namo baine davaria. Ia na e gwa, Heva na mai ena maoro sibona abi hidi baine kara dahaka be maoro bona dahaka be kerere; mai ena maoro ena ura karadia baine kara. Danu, Satana na e gwa Iehova ese e hamaorodia una au huahua bae ania neganai bae mase na koikoi. Heva ese Satana ena hereva na  e abia dae. Una dainai au huahua e abia bena e ania. Bena adavana danu e henia, e ania. Idia na mai edia ura ida unu e kara toma. Mai dibadia Dirava ese e hamaorodia basie karaia ḡauna e karaia. Una au huahua e ania neganai, mai edia ura ida una haheḡani haraḡana na asie badinaia. Idia ese Tamadia gubai bona iena siahu na asie matauraia. E Havaradia Tauna lalokauna asie matauraia na dia kara namona!

12. Edena haheitalai ese baine duruda bena baita laloparara, Adam bona Heva e gwau-edeede neganai Iehova na e lalohisihisi bada?

¹² Ina haheitalai aita laloa: Emu hemami be ede bamona bema natumu ta na ba naria namonamo, to gabeai iena gwau-edeede amo baine hahedinaraia oi na se matauraimumu eiava se lalokau henimumu? Una kara dainai bo  lalohisihisi badamu. Mani a laloa, Adam bona Heva e gwau-edeede neganai Iehova na e lalohisihisi bada.

13. Iehova ese Adam baine mase neganai baine vara ḡauna be ede e gwauraia toma, bona una anina be dahaka?

¹³ Adam bona Heva na e gwau-edeede dainai bae mauri hanaihanai na asi anina. Idia na e mase, Iehova ena hereva heḡereḡerena. Adam bona Heva na dia mamauri. Idia na dia lauma edia gabu ela. Una na Iehova ese Adam e gwau-edeede neganai e hamaoroa herevana amo ta dibamu. Dirava eto: “Tano [do] ba lou henia, badina be tano amo oma. Oi na tano ḡahuna: tano ḡahuna danu do ba lou henia.” (Genese 3:19) Dirava ese Adam na tano ḡahuna amo e karaia. (Genese 2:7) Una do se vara neganai, Adam na lasi. Una dainai, Iehova na e gwa Adam na tano ḡahuna baine lou henia, anina na Adam na ma basine mauri. Tano ḡahuna ai ma bainela.

14. Dahaka dainai ta masemu?

¹⁴ Bema lasi hari Adam bona Heva na mamauri, to e mase badina Dirava e gwau-edeede henia bona e kara dika. Ta masemu, badina Adam ena kara dika siahuna bona mase na natuna iboudiai ediai e hanai. (Roma 5:12 ba duahia.) Una kara dika na daihanai gorerena ta na heto, ita ta na basita roho mauri diba. Bona e havaraia ḡauna dikana na mase. Mase na ita inaida, dia turada. (1 Korinto 15:26) Baita moale badina Iehova ese mauri davana e heni, unu amo ita na inaida amo e hamaurida!

15. Dahaka dainai mase anina korikori ta dibamu karana ese e durudamu?

¹⁵ Baibul ese mase taudia e herevalaidia dalana ese be durudamu. Tame itaia heḡereḡerena, mase taudia na asie hisihisimu. Basie hadikadamu dainai basita gari henidia. Basita durudia dibamu, bona basie duruda dibamu. Basita hereva henidia dibamu, bona basie hereva henida dibamu.  Tomadiho igunalaina taudia momo na e gwaumu, idia ese e mase taudia na bae durudia diba, bona edia hereva e abi daemu taudia ese moni e henidiamu. To, mase anina korikori ta dibamu karana ese ita na unu hahediba hereva koikoidia e gwauraimu taudia edia amo e gimadamu.

16. Tomadiho momo ese daika ena lalohadai e hahedibalaimu, bona edena dalai?

¹⁶ Baibul ese mase e herevalaia dalana be tomadiho momo ese e abia daemu, eiava? Idia momo ese unu na asie abia daemu. Dahaka dainai? Badina idia ese Satana ena lalohadai e hahedibalaimu. Ia ese tomadiho koikoi amo taunimanima lalodia e verimu bena bae abia dae idia bae mase neganai, lauma edia gabu ai dounu bae mauri. Satana ese una koikoi herevana bona ma koikoi herevadia haida amo taunimanima na Iehova Dirava ena amo e hakaudia sirimu. Edena dalai?

17. Dahaka dainai hisihisi hanaihanai hahedibana ese Iehova ladana e hadikaiamu?

¹⁷ Matamanai ta herevalaia heḡereḡerena, tomadiho haida na e gwaumu, bema ta ena mauri na dika, baine mase murinai ia na lahi gabunai hisihisi baine ani hanaihanai. Una hahediba herevana ese Dirava ladana na e hadikaiamu. Iehova na lalokau Diravana bona ia ese taunimanima na unu basine hahisidia toma. (1 Ioane 4:8 ba duahia.) Emu hemami be ede bamona, bema tau ta ese maraḡina ta na ena gwau-edeede dainai imana lahi ai baine gabua? Una tau bo matauraiamu? Bo uramu ia ba dibaia, a? Lasi! Reana bo laloamu ia na daḡedaḡe tauna. To, Satana na e uramu baita abia dae Iehova ese taunimanima na lahi ai e hahisidia hanaihanaimu.

18. Edena koikoi herevana dainai taunimanima ese mase taudia e tomadiho henidiamu?

¹⁸ Danu, Satana ese tomadiho haida amo taunimanima e hadibadiamu, taunimanima e masemu murinai idia na lauma taudia ai e laomu bona mauri taudia ese bae matauraidia  na namo. Una hahediba herevana dainai, mase taudia laumadia na turada goadadia eiava inaida ai e laomu. Taunimanima momo ese una koikoi herevana na e abia daemu. Mase taudia garidia e garimu, e matauraidiamu bona e tomadiho henidiamu. To, Baibul na e gwaumu mase taudia na mamahuta bona namona na ita ese Dirava momokanina, Iehova, Ihavarada bona Ihamaurida Tauna sibona baita tomadiho henia.​—Apokalupo 4:11.

19. Mase anina korikori ta dibamu dainai edena Baibul hahedibana ta lalopararalaiamu?

¹⁹ Mase anina korikori ba diba karana ese tomadiho edia koikoi herevadia amo baine gimamu. Danu baine durumu Baibul ena hahediba herevadia ma haida ba lalopararalaidia. Heḡereḡere, o laloparara mase taudia na se laomu lauma edia gabu neganai, o abia dae momokani mauri hanaihanai na tanobada paradaisonai baine vara.

20. Edena henanadai na gabe karoana ai baita herevalaiamu?

²⁰ Idaunegai, kara maoromaoro tauna Iobu ese ina henanadai e heni: “Tau ta bema mase, ia na baine mauri lou a?” (Iobu 14:14) Mase tauna baine mauri lou diba, eiava? Baibul ese una e herevalaia dalana ese be hagoadamumu, bona gabe karoana ese una be hahedinaraiamu.