1, 2. (a) Edena negai oiemu ai harihari ḡauna na mai anina bada? (b) Dahaka dainai mauri davana na harihari ḡauna hereadaena?

EDENA harihari ḡauna hereadaena vada o abia? Ena be harihari ḡauna davana na maraḡi to una na dia ḡau badana. Moni hida ba halusi karana ese harihari ḡauna ena namo na se hahedinaraiamu. To, bema harihari ḡauna ta ese baine hamoalemu bona baine durumu, una na harihari ḡauna namo hereana.

² O uramu bavabi harihari ḡaudia amo tamona mo na hereadae. Ia na Dirava ese taunimanima e henidia harihari ḡauna. Iehova ese ḡau momo vada e henida, to iena harihari ḡauna hereadaena na ia Natuna, Iesu Keriso ena mauri idavalaina boubouna. (Mataio 20:28 ba duahia.) Ina karoa ai baita itaiamu, mauri davana na harihari ḡauna hereadaena, badina be hamoalemumu bona emu ura ḡaudia be havaramu. Iehova ese mauri davana amo ena lalokau e hahedinaraia.

3. Mauri davana be dahaka, bona baita laloa bada totona dahaka baita lalopararalaia?

³ Baita gwau dibamu, mauri davana na Iehova ese taunimanima kara dika bona mase amo e ruhadia karana. (Efeso 1:7) Baibul ai una hahediba baita lalopararalaia totona, namona na Eden umana ai e vara ḡauna aita laloa. Adam e kara dika bona e haboioa ḡauna baita dibaiamu neganai, baita lalopararamu dahaka dainai ita edai mauri davana na harihari ḡauna hereadaena.

4. Adam enai mauri ḡoevadaena anina be dahaka?

⁴ Iehova ese Adam e havaraia neganai, ḡau hereadaena ta e henia​—mauri ḡoevadaena. Anina na Adam tauanina bona darana na ḡoevadae dainai, basine gorere, buruka eiava mase. Ia na ḡoevadae dainai, Iehova ida baine hetura namonamo diba. Baibul na e gwaumu Adam na “Dirava natuna.” (Luka 3:38, Nega Matamata Baibel) Una dainai Adam ese ena hetura karana Iehova Dirava ida na e moalelaiava, natu ta ese tamana lalokauna e hetura heniamu heḡereḡerena. Iehova na Adam ida e herevaherevava, ḡaukara namodia e heniava bona baine kara ḡaudia e hadibalaiava.​—Genese 1:28-30; 2:16, 17.

5. Baibul na e gwaumu Dirava ese Adam na ia “heida-idana” e karaia, anina be dahaka?

⁵ Dirava ese Adam na ia “heida-idana” e karaia. (Genese 1:27) Una anina na Adam na dia Dirava toana e abia. Badina Karoa 1 ai ta dibaia, Iehova na Lauma. (Ioane 4:24) Una dainai, Iehova tauanina na dia hidio bona rara. Adam na ia heida-idana e karaia anina na, Adam ese Dirava ena kara namodia baine hahedinarai diba, bona idia haida na lalokau, aonega, hahemaoro maoromaoro bona siahu. Dala ma ta ai Adam na Tamana heḡereḡerena, ia na mai ena ura kwalimu. Una dainai, Adam na dia misini ta heḡereḡerena, ikarana tauna ena ura mo baine  kara. To, Adam na sibona namo eiava dika baine abia hidi diba. Bema Dirava ikamonai henina karana bema abia hidi, tanobada Paradaisonai bema mauri hanaihanai diba.

6. Adam ese Dirava e gwau-edeede henia neganai, dahaka e haboioa, bona ia besena ediai dahaka e vara?

⁶ Una ese e hahedinaraiamu, Adam ese Dirava e gwau-edeede henia bona Dirava ese e hamaoroa baine mase neganai, ia na dava dikana e abia. Ena kara dika dainai mauri ḡoevadaena mai ena hahenamo iboudiai e haboiodia. (Genese 3:17-19) Madi, Adam ese dia ia sibona ena mauri mo to gabeai baine havaradia besedia edia danu e haboioa. Baibul na e gwaumu: “Tau ta dainai dika tanobada ai e vareai, bona dika ese mase e vareailaia; bena mase ese taunimanima iboudiai e butudia tao, badina be iboudiai na mai edia kara dika.” (Roma 5:12) Oibe, ita iboudai na Adam ena amo kara dika ta abia. Una dainai, Baibul na e gwaumu Adam sibona bona ena bese na kara dika bona mase ese e ‘hoidia.’ (Roma 7:14) Adam bona Heva na asi edia helaro badina mai edia ura ida Dirava e gwau-edeede henia. To idia besedia iboudiai be ede bamona?

7, 8. Mauri davana anina na rua, idia be dahaka?

⁷ Iehova ese taunimanima na mauri davana amo e hamauridia. Mauri davana be dahaka? Mauri davana anina na rua. Ginigunana be, mauri davana na tau ta eiava ḡau ta ihoi louna eiava iruhana davana. Ia na tuari lalonai e ḡuia tauna bae ruhaia davana ida baita haheḡereḡerea diba. Iharuana be, mauri davana na ḡau ta baita hoia eiava baita hadikaia davana. Heḡereḡere, bema ta ese ḡau ta e hadikaia, una ḡau davana heḡereḡerena mo baine heni.

⁸ Edena dalai Adam e haboioa ḡauna davana baita heni bena kara dika bona mase edia iḡui amo baita  heruha? Iehova ese e heni mauri davana bona ena namo ita edai mani aita laloa.

9. Edena mauri davana ese taunimanima e davalaidia?

⁹ Adam ese mauri ḡoevadaena e haboioa dainai, ta ena mauri na dia heḡereḡere baine hoia lou totona. (Salamo 49:7, 8) Namona na mauri davana na e boio ḡauna heḡereḡerena. Una na Baibul ese e gwauraia hahemaoro ḡoevana heḡereḡerena, e gwa: “Mauri davana na mauri.” (Deuteronomi 19:21) Una dainai, daika ese Adam e haboioa mauri ḡoevadaena davana baine heni diba? Ḡoevadae tauna ta ese ‘ena mauri baine heni, taunimanima iboudiai idavalaidia.’​—1 Timoteo 2:6.

10. Iehova ese edena dalai mauri davana e heni?

¹⁰ Iehova ese edena dalai mauri davana e heni? Ia ese natuna ḡoevadaena ta e siaia tanobadai. To Iehova ese lauma tauna ta se abia hidi kava. Ia ese Natuna vara-edeana, e lalokau henia badamu tauna, e siaia. (1 Ioane 4:9, 10 ba duahi.) Una Natu na mai ena ura ida ena noho gabuna, guba e rakatania. (Filipi 2:7) Karoa 4 ai ta dibaia heḡereḡerena, Iehova ese hoa dalanai Natuna ena mauri na Maria bogana lalonai e atoa. Dirava ena lauma helaḡa amo, Iesu e vara neganai, ia na ḡoevadae tauna bona asi ena kara dika.​—Luka 1:35.

11. Edena dalai tau tamona ese momo edia mauri e davalaia?

¹¹ Edena dalai tau tamona ese taunimanima momo edia mauri davana e karaia? Edena dalai taunimanima momo ese kara dika e abia matama? Ba helalotao, Adam e kara dika neganai, mauri ḡoevadaena e haboioa. Una dainai, ia besena na mauri ḡoevadaena se henidia, to kara dika bona mase mo e henidia. Iesu, Baibul ese e gwauraiamu “Adam gini-gabena,” na ḡoevadae, bona  nega ta se kara dika. (1 Korinto 15:45) Anina na, Iesu ese Adam gabuna e abia ita baine hamaurida totona. Iesu ese Dirava e kamonai henia bona ena mauri ḡoevadaena e bouboulaia neganai, ia ese Adam ena kara dika davana e heni. Unu amo Adam besena na helaro e henidia.​—Roma 5:19; 1 Korinto 15:21, 22.

12. Iesu ena hisihisi ese dahaka e hamomokania?

¹² Baibul ese Iesu do se mase ai e haheaukalai hisihisidia na e herevalai ḡoevaḡoeva. Ia na e dadabaia bona e hasatauroa, bena e hisihisi ela bona mase. (Ioane 19:1, 16-18, 30; Apendiks ai atikol ladana, “Kristen Taudia ese Tomadiho Lalonai Korosi Bae Ḡaukaralaia be Namo, Eiava?”) Dahaka dainai Iesu na e hisihisi bada? Gabe karoana ta ai, baita itaiamu Satana na e gwa Iehova e badinaiamu tauna na hahetoho negadiai basine haheauka diba. Iesu ese hisihisi e haheaukalaia karana amo Satana ena hereva na e hakoikoia. Iesu ese e hamomokania, ḡoevadae tauna mai ena ura kwalimu ese Dirava na baine badinaia diba, herevana Diabolo na dahaka baine kara. Iehova na e moale bada herea badina Natuna lalokauna ese ia e badinaia namonamo!​—Hereva Lada-isidia 27:11.

13. Mauri davana be edena dalai e heni?

¹³ Mauri davana be edena dalai e heni? Iuda taudia edia kalenda Nisan 14, 33 C.E. ai, Dirava ese Natuna ḡoevadaena na se koua bae hamasea totona. Iesu na “nega tamona mo” tauanina ḡoevadaena e bouboulaia. (Heberu 10:10) Iesu e mase bena dina ihatoinai, Iehova ese lauma tauna ta ai e hatorea isi lou. Guba ai, Iesu ese ena mauri ḡoevadaena, Adam besena daidiai e bouboulaia ḡauna, na Dirava e henia. (Heberu 9:24) Iehova ese Iesu ena mauri idavalaina boubouna na e abia dae, unu amo taunimanima na kara dika bona mase edia iḡui amo e ruhadia.​—Roma 3:23, 24 ba duahi.

14, 15. Dirava ese “eda dika” baine gwauatao totona, dahaka baita kara na namo?

¹⁴ Ena be ita na mai eda kara dika, to mauri davana dainai hahenamo momo baita moalelaimu. Una mauri davana dainai hari bona vaira neganai baita abimu hahenamodia haida mani aita lalodia.

¹⁵ Kara dika igwautaona. Kara dika ai ta vara dainai, baita hekwarahimu kara maoromaoro baita badinaia totona. Ita iboudai na eda kara o hereva ai ta kereremu. To, Iesu ena mauri idavalaina boubouna amo Dirava ese “eda dika” baine gwauatao diba. (Kolose 1:13, 14) To, eda dika baine gwauatao totona, namona na baita helalo-kerehai momokani. Danu, Iesu ena boubou ḡauna ta abidadama heniamu dainai, mai manauda ida Iehova baita noia eda dika baine gwauatao.​—1 Ioane 1:8, 9 ba duahi.

16. Dahaka ese baine duruda mai lalo mamina ḡoevana ida Dirava baita tomadiho henia, bona ena namo be dahaka?

¹⁶ Dirava vairanai laloda mamina baine ḡoeva. Lalo mamina dikana dainai baita laloamu ita na dia heḡereḡere bona asi anida. To Iehova ese mauri davana amo kara dika e gwauatao dainai, mai laloda mamina ḡoevana ida ia baita tomadiho henia diba, ena be ita na dia ḡoevadae. (Heberu 9:13, 14) Unu amo ḡau ta ese basine koudamu Iehova baita hereva henia. Una dainai, baita ḡuriḡuri henia dibamu. (Heberu 4:14-16) Laloda mamina baine ḡoeva neganai baita lalo mainomu, siboda tauanida basita hadikaiamu bona baita moalemu.

17. Ededia hahenamo baita abi dibamu badina Iesu na ita daidai e mase?

¹⁷ Tanobada paradaisonai mauri hanaihanai helarona. Roma 6:23 na e gwaumu: “Kara dika davana be mase; a Dirava ena harihari ḡauna na mauri hanaihanai, Keriso  Iesu iseda Lohiabada bagunai.” Ina buka ena Karoa 3 ai, vaira neganai baine vara tanobada Paradaisona ena hahenamo ta herevalai. (Apokalupo 21:3, 4) Unu vaira hahenamodia bona mauri hanaihanai na bae vara diba badina Iesu na ita daidai e mase. Unu hahenamo baita abi helaoreana, namona na baita hahedinaraia mauri davana na ta laloa badamu.

18. Dahaka dainai mauri davana dainai Iehova baita tanikiu henia?

¹⁸ Dahaka dainai mauri davana dainai Iehova baita tanikiu henia? Harihari ḡauna ta na harihari ḡauna namo hereana, bema ihenina tauna ese ena nega, goada, eiava moni baine ḡaukaralaia una harihari ḡauna baine heni. Bema ta dibamu harihari ḡauna ese e heni tauna ena lalokau e hahedinaraiamu, baita moalemu. Mauri davana na harihari ḡauna hereadaena, badina Dirava ese ḡau badana ta e karaia una baine heni totona. Ioane 3:16 na e gwaumu: “Dirava ese tanobada ini e lalokau henia tomamu: Natuna vara-edeana vada eme heni.” Mauri davana ese e hahedinaraiamu Iehova ese ita na e lalokau henidamu. Danu Iesu ena lalokau ita edai e hahedinaraiamu,  badina mai ena ura ida ita daidai ena mauri e heni. (Ioane 15:13 ba duahia.) Una mauri davana dainai ta dibamu Iehova bona Natuna ese ita ta ta na e lalokau henidamu.​—Galatia 2:20.

19, 20. Ededia dalai ba hahedinaraia diba Dirava ena harihari ḡauna, mauri davana, na o laloa badamu?

¹⁹ To edena dalai ba hahedinaraia Dirava ena harihari ḡauna, mauri davana, na o laloa badamu? Ḡau ginigunana na Iehova, Hariharibada Tauna Hereadaena, ba dibaia. (Ioane 17:3) Ina buka ena heduru amo Baibul ba stadilaia karana ese baine durumu Iehova ba dibaia. Iehova bo dibaiamu neganai, emu lalokau ienai danu be badamu. Bena, una lalokau dainai bo uramu ia ba hamoalea.​—1 Ioane 5:3.

²⁰ Iesu ena mauri idavalaina boubouna bavabidadama henia. Baibul na gwaumu: “Natuna e abidadama heniamu tauna ese mauri hanaihanai baine abia.” (Ioane 3:36) Edena dalai Iesu baita abidadama henia diba? Una abidadama na dia hereva ai mo baita gwauraia. Iakobo 2:26 na e gwaumu: “Kamonai [“abidadama,” Nega Matamata Baibel] asi ena kara be vada e mase.” Oibe, abidadama momokanina na eda “kara” amo baita hahedinaraia. Iesu baita abidadama henia dalana ta na ia baita tohotohoa, dia eda hereva ai mo to eda kara amo danu.​—Ioane 13:15.

21, 22. (a) Dahaka dainai laḡani ta ta ai Lohiabada ena Anibou hebouna baitala? (b) Karoa 6 bona 7 ese dahaka be herevalaiamu?

²¹ Laḡani ta ta ai Lohiabada ena Anibou hebouna baola. Nisan 14, 33 C.E. adorahina ai, Iesu ese hebou ta e hamatamaia bona Baibul ese una na e gwauraiamu “Lohiabada ena anibou.” (1 Korinto 11:20; Mataio 26:26-28) Ladana ma ta na Keriso ena mase Ilalotaona. Iesu ese una hebou amo ena aposetolo bona Kristen taudia  momokanidia iboudiai e hadibadia iena mauri ḡoevadaena e heni karana amo mauri davana e karaia. Iesu na e gwa: “Ini ba kara toma, lau ilalolaigu.” (Luka 22:19) Iesu ena mase Ilalotaona hebouna ese e hadibadamu Iehova bona Iesu ese mauri davana amo lalokau hereadaena e hahedinaraia. Laḡani ta ta ai Iesu ena mase Ilalotaona hebouna baitala karana amo baita hahedinaraia diba mauri davana na ta laloa badamu. *

²² Iehova ese e heni mauri davana na harihari ḡauna hereadaena. (2 Korinto 9:14, 15) Una harihari ḡauna hereadaena ese e mase taudia baine durudia diba danu. Karoa 6 bona 7 ese una be herevalaiamu.