1, 2. Iehova ese turanai e halaodia taudia haida mani a gwauraidia.

O URAMU ede bamona tauna na oi turamu ai bainela? Oi na bo uramu ba bamoa tauna ena lalohadai, ura, bona e lalo badamu ḡaudia na oiemu ida bae heḡereḡere. Bona iena kara namodia, heḡereḡere kara momokani bona hebogahisi dainai bo hetura heniamu.

² Idaunega sivaraidia lalodiai, Dirava ese haida na ia turana namodia ai e halaodia. Heḡereḡere, Iehova ese Abraham na e gwauraia ia turana. (Isaia 41:8; Iakobo 2:23 ba duahi.) Dirava ese David na e lalonamo henia dainai, e gwauraia “egu lalokau tauna.” (Kara 13:22) Bona Iehova ese peroveta tauna Daniel na ‘e lalokau henia bada.’​—Daniel 9:23.

3. Dahaka dainai Iehova ese taunimanima haida na ia turanai e halaodia?

³ Dahaka dainai Iehova ese Abraham, David, bona Daniel na turanai e halaodia? Ia ese Abraham e hamaoroa: “Oi ese lau eregu o kamonai.” (Genese 22:18) Una dainai, Iehova ese mai manaudia ida iena ura e karaiamu taudia na e hakahikahidiamu. Ia ese Israel taudia e hamaorodia: “Lau gadogu ba kamonai, bena lau na emui Dirava ai bainala, bona umui na egu bese ai baola.” (Ieremia 7:23) Bema Iehova bo kamonai heniamu, oi danu ia turanai bo lao dibamu!

4, 5. Edena dalai Iehova ese ena siahu amo ena taunimanima e hagoadadiamu?

⁴ Dirava itura henina ena namo mani a laloa. Baibul na e gwaumu Iehova na dala idauidau ai “ena siahu na ienai asie kereremu taudia idurulaidia ai baine hedinarai.” (2 Sisiga 16:9) Edena dalai Iehova ese baine hagoadamu diba? Dala ta na Salamo 32:8 ese e gwauraia: “Lau [Iehova] ese baina hadibamu, emu raka dalana baina hadibalaimu; lau matagu ese baine itamu tao.”

⁵ Una hereva namona ese e hahedinaraiamu Iehova ese ita na e laloda badamu! Ia ese dala namodia be hadibamumu bona bo badinadiamu neganai be narimumu. Dirava na e uramu baine durumu hahetoho idauidau ba haheaukalaidia totona. (Salamo 55:22 ba duahia.) Una dainai, bema mai kudoumu idoinai ida Iehova bo hesiai heniamu, salamo itorena tauna heḡereḡerena bo gwaumu: “Iehova na vairagu ai na atoamu nega idoinai; badina be ia na lau idibagu kahana ai dainai lau na basina marere.” (Salamo 16:8; 63:8) Oibe, Iehova ese baine durumu diba, ia e moalelaiamu dalana ba badinaia totona. To, Dirava e inai heniamu tauna ta na se uramu oi na unu ba kara toma.

6. Satana ese taunimanima be ede e herevalaidia toma?

⁶ Ina buka ena Karoa 11 ai Satana Diabolo ese Dirava ena lohia siahuna e hepapahuahulaia dalana e herevalaia. Satana ese Dirava na e gwauraia koikoi bona kara auka tauna, badina Adam bona Heva na maoro se henidia dahaka be maoro eiava kerere bae abia hidi. Adam bona Heva e kara dika murinai bona besedia ese tanobada e hahonua matama neganai, Satana ese taunimanima edia kara badidia na e hepapahuahulaia. Satana na e gwa: ‘Taunimanima na dia Dirava e lalokau heniamu dainai e hesiai heniamu. Nega ba henigu, bena taunimanima iboudiai na Dirava ena amo baina hakaudia  siri.’ Iobu sivaraina ese e hahedinaraia Satana na unu e lalo tomamu. Iobu be daika, bona edena dalai ia na Satana ena hepapahuahu lalonai e vareai?

7, 8. (a) Dahaka dainai Iobu na iena negai e nohova taudia amo idau? (b) Edena dalai Satana na Iobu ese Dirava e hesiai heniava badina e hepapahuahulaia?

⁷ Iobu na laḡani 3,600 gunanai e nohova tauna. Ia na tau namona ta, badina Iehova na e gwa: “Tanobada ai ia na asi idaina; ia na asi ena kerere ta, bona kara maoromaoro tauna; Dirava garina e garimu, bona kara dika amo e raka ohomu.” (Iobu 1:8) Dirava ese Iobu na e moale heniava.

⁸ Satana na Iobu ese Dirava e hesiai heniava badina e hepapahuahulaia. Diabolo na Iehova e hamaoroa: “[Iobu] bona ena ruma, bona ena orea bona ena ḡau iboudiai, na vada o maḡudia, ani? Imana ḡaukaradia vada o hanamodia, bona tano ai ena taḡa na vada e habadadia. A harihari imamu a toia roro, ena orea bona ena ḡau iboudiai ba daudia toho; bena ia ese oi vairamu ai baine uduguiraimu.”​—Iobu 1:10, 11.

9. Satana ena hereva dainai Iehova be dahaka e kara, bona dahaka dainai?

⁹ Satana na e gwa, Iobu ese Dirava e hesiai heniamu badina ḡau namodia e heniamu. Danu, Diabolo na e gwa bema Iobu na hahetoho be davarimu, Dirava be rakataniamu. Una dainai Iehova be dahaka e kara? Satana na Iobu ese Dirava e hesiai henia badina e hepapahuahulaia dainai, Iehova ese se koua Iobu baine tohoa. Una dala amo, Iobu ese baine hahedinaraia ia be Dirava e lalokau heniava eiava lasi.

10. Iobu enai dahaka hahetoho e vara, bona dahaka e kara?

¹⁰ Satana ese Iobu na dala idauidau ai e tohoa. Haida ese ena animal e henaodia, bona e aladia. Ena hesiai taudia momo e hamasedia. Una dainai ia na e ogoḡami. Danu, natuna ten na lai gubana ta ese e hamasedia. Ena be unu dika idauidau e vara, to “Iobu na se kerere bona Dirava se gwau dika henia.”​—Iobu 1:22.

11. (a) Satana be e ura Iobu enai ma dahaka baine kara, bona Iehova be dahaka e kara? (b) Iobu e gorere neganai, dahaka e kara?

 ¹¹ Satana na se hesiku. Reana e lalova ena be Iobu ese ena kohu, hesiai taudia, bona natuna e haboiodia karana e haheaukalaia, to bema baine hagorerea, Dirava baine rakatania. Iehova ese Satana na se koua gorere dikana ta amo Iobu baine hahisia. To, Iobu ese Dirava iabidadama henina karana na se rakatania. Ia na mai lalogoadana ida e gwa: “Harihari ela bona baina mase, egu lalo-maoromaoro [“abidadama,” NWT] basina negea.”​—Iobu 27:5.

12. Iobu ese Satana ena hepapahuahu herevana be ede e haerelaia toma?

¹² Iobu na asi dibana ienai e varava hekwakwanaidia na Satana ese havarava. Asi dibana Diabolo ese Iehova ena lohia siahuna e hepapahuahulaiava, una dainai e laloava Dirava ese unu hekwakwanai e havarava. (Iobu 6:4; 16:11-14) To, dounu Iehova e badinaiava. Bona Satana ena hereva​—Iobu ese Dirava e hesiai heniamu badina ia amo ḡau namodia e abimu​—na koikoi, badina Iobu na dounu Dirava e abidadama heniava!

13. Iobu ese Dirava e abidadama henia dainai, dahaka e vara?

¹³ Iobu ena abidadama dainai Iehova ese Satana ena hepapahuahu herevana e haerelaia. Momokani, Iobu na Iehova turana, bona Dirava ese ena abidadama dainai e hanamoa.​—Iobu 42:12-17.

14, 15. Dahaka dainai baita gwa diba Satana ese dia Iobu mo, to taunimanima iboudiai danu e gwauraidia?

¹⁴ Satana ese dia Iobu mo ena abidadama Dirava enai e hepapahuahulaia. Oi danu una hepapahuahu lalonai. Hereva Lada-isidia 27:11 ese una na e hahedinaraia, Iehova na e gwa: “Natugu e, ba aonega, lalogu na ba hamoalea, e gwau henigumu tauna baina haere henia totona.” Unu hereva, Iobu e mase bena laḡani handred momo murinai e tore herevadia, ese e hahedinaraiamu Satana na dounu Dirava e gwau  heniamu bona Iena hesiai taudia e gwauraidia kereremu. Iehova e hamoaleamu daladia ta badinamu neganai, ita ese Satana ena hereva ta hakoikoiamu, bona Dirava ta hamoaleamu. Una dainai emu hemami be ede bamona? Ena be eda mauri ai ḡau haida baita haidaudiamu, to Satana baita hakoikoia na moale ḡauna, ani?

¹⁵ Satana na e gwa: “Tau ta ese ena orea bona ena kohu iboudiai baine heni, ena mauri ibodohilaina.” (Iobu 2:4) Ina hereva “tau ta,” ese e hahedinaraiamu Satana na Iobu mo se gwauraia to taunimanima iboudiai danu. Una na mai anina bada herevana. Satana ese Dirava o abidadama heniamu karana na e hepapahuahulaiamu. Diabolo na e uramu hekwakwanai negadiai, Dirava ba gwau-edeede henia bona dala maorona ba rakatania. Edena dalai Satana ese una baine haḡuḡurua diba?

16. (a) Satana ese ededia dalai taunimanima na Dirava ena amo e hakaudia sirimu? (b) Edena dalai Diabolo ese unu dala amo oi baine tohomu?

¹⁶ Karoa 10 ai ta herevalaia bamona, Satana ese dala idauidau e ḡaukaralaimu taunimanima na Dirava amo baine hakaudia siri. Ia na “leona na heto, baine anidia ore taudia na e tahudiamu.” (1 Petro 5:8) Una dainai, Baibul bo stadilaiamu bona o dibamu ḡaudia bo badinadiamu neganai turamu, varavaramu eiava ma haida ese be daḡedaḡe henimumu, una na Satana ena hekou dalana. * (Ioane 15:19, 20) Danu, Satana na “sibona diari aneruna ai e hahelao.” (2 Korinto 11:14) Diabolo ese dala hehunidia amo baine koimu Dirava ihamoalena dalana ba rakatania totona. Danu e uramu ba lalomanoka, ba laloa oi na dia heḡereḡere Dirava ba hamoalea. (Hereva Lada-isidia 24:10) Ena be Satana na “leona” eiava “diari aneruna” na heto, to iena hereva na dounu tamona: E gwaumu hahetoho ba davari neganai, Dirava ena hesiai  ḡaukara ba rakatania. Edena dalai Iobu heḡereḡerena, Satana ena hereva ba hakoikoia bona Dirava ba badinaia noho?

17. Iehova ena haheḡani baita badinadia badina badana be dahaka?

¹⁷ Satana ba haere henia diba bema Dirava e moalelaiamu dalana ba badinaia. Una anina be dahaka? Baibul na e gwaumu: “Iehova, emu Dirava, ba lalokau henia mai lalomu idoinai, mai laumamu [“souli,” NWT] idoinai, bona mai goadamu idoinai.” (Deuteronomi 6:5) Emu lalokau Dirava enai be badamu neganai, bo uramu iena ura ba badinadia. Aposetolo Ioane na e gwa: “Dirava iura-henina anina binai: Ena haheḡani baita badina.” Bema mai kudoumu idoinai ida Iehova bo lalokau heniamu, oiemu ai “ena haheḡani danu dia memetau.”​—1 Ioane 5:3.

18, 19. (a) Iehova ena haheḡani haida be dahaka? (Maua ladana “ Iehova Ese E Inai Henimu Ḡaudia Ba Dadarai” ba itaia.) (b) Ede ta diba tomamu Dirava ese se doridamu ḡau momo baita kara?

¹⁸ Iehova ena haheḡani be dahaka? Idia haida na basita kara karadia e herevalaimu. Heḡereḡere, maua ladana “ Iehova ese E Inai Henimu Ḡaudia Ba Dadarai” ba itaia. Unuseniai Baibul ese e taravatudia karadia e hahedinarai. Bo itaia matamamu neganai, bo laloamu unu kara haida na dia didika. To e hetore siridia bo lalo dobumu neganai, Iehova ena taravatu edia namo bo dibamu. Reana bo hekwarahimu emu kara ba haidaudia. To, Dirava ese e moalelaiamu dalana bo badinaiamu neganai bo moalemu. (Isaia 48:17, 18) Bona una na ba karaia diba. Ede ta diba tomamu?

¹⁹ Iehova ese ita na se doridamu basita kara diba ḡaudia baita kara. (Deuteronomi 30:11-14 ba duahi.) Baita kara diba bona basita kara diba ḡaudia na mai dibana. (Salamo 103:14) Danu, Iehova ese goada baine henida diba ia baita badinaia totona. Aposetolo Paulo na e gwa: “Dirava na momokani; ia ese baine narimui, emui goada e hereaiamu hedibaḡanina ta ese baine butumui tao na garina; hedibaḡani negana ai ia ese emui roho mauri dalana baine henimui,  bena ba haheaukalaia diba.” (1 Korinto 10:13) Iehova ese “siahu herea-daena” amo baine durumu ba haheauka. (2 Korinto 4:7) Paulo na hahetoho momo e haheaukalai murinai, e gwa: “Goada e henigumu Diravana dainai lau na ḡau iboudiai ikaradia ai na goadamu.”​—Filipi 4:13.

20. Ededia kara namodia baita hahedinarai na namo, bona dahaka dainai unu na mai anidia bada?

²⁰ Iehova ba hamoalea anina na dia ia e inai henimu karadia  mo ba dadarai. Namona na ia ese e ura henimu ḡaudia ba ura heni danu. (Roma 12:9) O uramu ba bamoa tauna ena lalohadai, ura, bona e lalo badamu ḡaudia na oiemu ida bae heḡereḡere, ani? Iehova danu unu e ura tomamu. Una dainai Iehova ese e ura henimu ḡaudia ba ura heni na namo. Unu ḡau haida na Salamo 15 ai e gwaurai, unuseniai Dirava turana ai baela taudia edia kara baita duahimu. (Salamo 15:1-5 ba duahi.) Iehova turana ese e hahedinaraimu karadia na Baibul ese e gwauraidiamu “lauma huahuana.” Unu kara na “lalokau, moale, maino, haheauka, hebogahisi, kara  maoromaoro, hereva ibadinana, manau, boga-auka.”​—Galatia 5:22, 23.

21. Dahaka ese baine durumu kara namodia ba hahedinarai?

²¹ Hanaihanai Baibul ba duahia bona ba stadilaia karana ese baine durumu kara namodia ba hahedinarai. Bona Dirava ena ura bo dibamu karana ese be durumumu, emu lalohadai na iena ida ba haheḡereḡerea. (Isaia 30:20, 21) Emu lalokau Iehova enai bo hagoadaiamu neganai, bo uramu Dirava ihamoalena dalana ba badinaia.

22. Dahaka be varamu bema Dirava e hamoaleamu dalana bo badinaiamu?

²² Iehova baita hamoalea totona baita hekwarahi na namo. Baibul ese emu mauri ba haidaua karana na dabua gunana ba kokia bona matamatana ba hahedokilaia karana ida e haheḡereḡerea. (Kolose 3:9, 10) To Salamo itorena tauna ese Iehova ena haheḡani na ini e gwauraidia toma: “Ibadinadia ahuna na bada.” (Salamo 19:11) Oi danu Dirava e hamoaleamu dalana bo badinaiamu neganai, hahenamo momo bo davarimu. Bema unu bo kara tomamu, Satana bo haere heniamu bona Iehova bo hamoalemu!