TOI TAMONA hahediba herevana e abia daemu taudia na e gwaumu, Dirava lalonai taunimanima na tatoi​—Tamana, Natuna, bona Lauma Helaḡa. Idia tatoiosi na heheḡereḡere, mai edia siahu, bona asi matamadia. Una dainai Toi Tamona hahedibanai, e gwaumu, Tamana na Dirava, Natuna na Dirava, bona Lauma Helaḡa na Dirava, to Dirava na tamona.

 Toi Tamona e abia daemu taudia na asi dibadia una hahediba herevana be ede bae herevalaia toma. To dounu e gwaumu ia na Baibul ena hahediba herevana ta. To, namona na ba diba ina hereva “Toi Tamona,” Baibul ai na se hedinarai. To Baibul ese Toi Tamona lalohadaina e hahedinaraia, eiava? Una henanadai baita haerelaia totona, mani Toi Tamona e abia daemu taudia ese e gwauraia momomu sirina aita itaia.

Ioane 1:1 na e gwaumu: “Matamana negana ai Hereva vada e nohova; una Hereva na Dirava ida e nohova; una Hereva na Dirava.” Una karoa tamonai, aposetolo Ioane ese e hahedinaraia “Hereva” na Iesu. (Ioane 1:14) To, Baibul ese Hereva na e gwauraia Dirava dainai, haida na e laloamu Natuna bona Tamana na Dirava tamona lalonai.

Namona na ba helalotao Baibul kahana na Grik gado ai e hahanaia guna. Gabeai, gado hahanai taudia ese Grik toretoredia na gado ma haidai e hahanaidia. To Baibul e hahanaia taudia haida ese ina hereva, “Hereva na Dirava” na asie ḡaukaralaia. Dahaka dainai? Baibul e torea Grik gadona na mai dibadia dainai, e laloava una hereva na bae hahanaia idau. Ede e hahanaia toma? Haheitalai haida na ini: “Logos [Hereva] na dirava.” (A New Translation of the Bible) “Hereva na dirava ta.” (The New Testament in an Improved Version) “Hereva na Dirava ida e nohova, bona Hereva na dirava ta.” (Nega Matamata Baibel) Unu Baibul idauidau ese e hahedinaraiamu, Hereva na dia Siahu Idoinai Diravana. * To, Iehova ese e havara ḡaudia padadiai Hereva ena dagi na bada dainai, e gwauraia “dirava ta.” Una siri ai ina hereva “dirava” anina na “siahu bada tauna,” dia Siahu idoinai Diravana.

Momo na asi dibadia Baibul e torea Grik gadona. Una dainai aposetolo Ioane ena hereva anina be ede baita diba toma? Mani ina haheitalai ba laloa: Sikuli hahedibana ta na ena stiuden vairadiai  sabjek ta e herevalaia. To stiuden edia lalohadai una sabjek ai na idauidau. Edia lalohadai be ede bae hamaoromaoroa toma? Reana hahediba tauna ena amo heduru ma haida bae noi na namo. Diba ma haida bae abi karana ese baine durudia una sabjek bae lalopararalaia namonamo. Una heḡereḡerena, Ioane 1:1 anina ba lalopararalaia totona, namona na Ioane ena Evanelia bukanai Iesu ena dagi e herevalaia dalana ba itaia. Diba ma haida ba tahu karana ese baine durumu lalohadai maorona bavabia.

Heḡereḡere, Ioane ese karoa 1, siri 18 ai e torea herevana ba laloa: “Matamana negana ema bona harihari tau ta ese [Siahu Idoinai] Dirava se itaia.” To taunimanima ese Natu eiava Iesu na de itaia, badina Ioane na e gwa: “Hereva na taunimanima tau-anina ai ema, ai bogaraḡimai e taruhava. Ia hairaina danu a itaiava.” (Ioane 1:14) Una dainai, Natu be edena dalai Siahu Idoinai Diravana ai bainela? Danu Ioane na e gwa Hereva na “Dirava ida.” To, edena dalai ta na tau ta ida bona ma nega tamona ia na una tau? Ma danu, Ioane 17:3 ai Iesu ese e hahedinaraia ḡoevaḡoeva ia bona Tamana gubai na i’idau. Ia ese Tamana na e gwauraia “Dirava momokani tamona.” Bona Ioane na ena Evanelia bukana dokona kahanai ini e gwa toma: “A ini hidaosi mo vada e tore, umui ese bavabia dae Iesu na Keriso, Dirava Natuna.” (Ioane 20:31) Mani a laloa, Iesu na se gwauraia, Dirava, to Dirava Natuna. Ioane ena Evanelia bukana ai e tore ḡaudia ese Ioane 1:1 baita lalopararalaia dalana e hahedinaraia. Iesu eiava Hereva na e gwauraia “dirava ta” badina iena dagi na bada, to una dagi na dia Siahu Idoinai Diravana heḡereḡerena.

Mani sikuli hahedibana bona ena stiuden a lalodia lou. Ena be hahediba ese una sabjek na ma baine herevalaia namonamo, to stiuden haida na dounu bae daradara. Dahaka bae kara diba? Reana hahediba ma ta enai diba ma haida bae tahu. Bema hahediba iharuana ese idia edia hahediba ena hereva baine hamomokania, una ese edia daradara na be hamaoromaoroamu. Una heḡereḡerena, bema Ioane ese Iesu bona Siahu Idoinai Diravana edia idau e herevalaia dalana o daradaralaiamu, Baibul itorena taudia ma haida edia amo diba ma haida bavabi na  namo. Heḡereḡere, mani Mataio e torea herevana a laloa. Ia ese ina nega oromana dokona e herevalaia neganai, Iesu ena hereva na ini e torea toma: “Una dina, una hora, ta asi dibana, guba anerudia danu asi dibadia, Natuna danu asi dibana, a Tamana sibona mai dibana.” (Mataio 24:36) Unu hereva ese edena dalai e hamomokaniamu Iesu na dia Siahu Idoinai Diravana?

Iesu na e gwa Tamana ena diba ese Natuna ena diba na e hereaia. To, bema Iesu na Siahu Idoinai Diravana, Tamana e diba ḡaudia danu bema diba. Una dainai, Tamana bona Natuna na dia heḡereḡere. To, haida na bae gwa: ‘Iesu na taunimanima ta heḡereḡerena tanobadai e nohova neganai una hereva e gwauraia.’ To, bema una na momokani, lauma helaḡa be ede bamona? Bema ia danu Tama heḡereḡerena, una Dirava tamona lalonai, dahaka dainai Iesu na se gwa Tamana e diba ḡaudia na lauma helaḡa danu mai dibana?

Baibul dounu bo stadilaiamu neganai, una kaha e herevalaia Baibul siridia ma haida bo dibamu. Unu siri ese e hamomokanimu Tamana, Natuna, bona lauma helaḡa na i’idau.​—Salamo 90:2; Kara 7:55; Kolose 1:15.