Iesu Keriso ese ena hahediba e hamaorodia: “Emui diari taunimanima vairadiai unu ba hahedinaraia toma, bena emui kara namodia bae ita bona Tamamui guba ai e nohomu na bae heatolaia.” (Mataio 5:16) Unu baia kara toma totona, Intanet bona teknoloji matamatadia a ḡaukaralai namonamomu. Web sait ladana, jw.org, amo Iehova ena Witnes taudia edia ḡaukara bona e abidaemu herevadia ba diba. Una Web sait ai be dahaka mimia?

Baibel ese henanadai badadia e haerelaimu. Emai Web sait ese taunimanima edia henanadai badadia e haerelaimu. Unu henanadai badadia siks na pepapepa ladana, Oi Ura Hereva Momokani Oi Diba, A? ese e haerelai. Una pepapepa na gado 400 mai kahana ai a hahanaia bona emai Web sait ai mia. Danu, unuseniai gado 100 mai kahana ai a hahanaia New World Translation Baibel, eiava Gima Kohorona bona Awake! magasin matamatadia, eiava Baibel be Dahaka Ia Hadibaia? bukana bona pablikeisen idau-idau ba duahi, ba hakala eiava ba daonloud diba. Ma danu, kamonai tauna ta ena gado ai rau haida ba printa bena ba henia diba. Taia kudima taudia danu saini gado ai a karamu vidio bae ita diba. Baibel duahiduahi, Baibel drama, bona miusiki namodia danu ba daonloud diba, bena emu laḡa-ani negadiai ba hakala heni.

Iehova ena Witnes taudia edia ḡaukara bona ḡau ma haida. Emai Web sait ai emai orea ena ḡaukara, a davarimu hahetoho badadia haida, dika e varamu negadiai a hedurumu sivaraidia ba duahi eiava vidiodia ba ita diba. Hebou badadia baia abi gabudia bona negadia, bona emai brens ofesi edia adres bona telefon namba danu mimia.

Emai Web sait amo hereva momokani ena diari na gabu daudaudia ai a hahedinaraiamu. Una dainai, Antarctica taudia bona hutuma ese namo e davariamu. Emai ḡuriḡuri ai Iehova a noiamu, tanobada ibounai “ena hereva na baine pere rohoroho,” bena taunimanima ese Dirava bae imodaia.—2 Tesalonika 3:1.

• Edena dala ai jw.org ese momo e durudiamu hereva momokani bae dibaia totona?

• Emai Web sait ai be dahaka o uramu ba ita?