KAROA 21
Betele be Dahaka?
Laulau Tore Dipatmen, U.S.A.
Germany
Kenya
Colombia
Betele na Heberu herevana ta, anina na “Dirava ena ruma.” (Genese 28:17, 19) Una na Iehova ena Witnes taudia ese tanobada heḡeḡemadai e haginimu brens ofesi ladadia. Betele ai, tadikaka ese haroro ḡaukara e hakauamu bona e duruamu. Heitatao Oreana na emai hedikwota New York U.S.A. ai, bona brens ofesi iboudiai edia ḡaukara e gunalaimu. Brens ofesi ai e ḡaukaramu taudia na a gwauraidiamu Betele famili. Idia na Betele ai e nohomu, e ḡaukara heboumu, e aniani heboumu, bona Baibel e herevalaia heboumu.—Salamo 133:1.
Unuseniai e ḡaukaramu taudia na mai lalodia idoidiai e ḡaukaramu. Betele taudia iboudiai na Keristani taudia, bona hanaihanai Dirava ena ura bona iena Basileia ḡaukaradia e karamu. (Mataio 6:33) Idia iboudiai na Betele ai e mahutamu bona e anianimu, bona moni taidia e henidiamu. Betele taudia ta ta na mai edia ḡaukara, heḡereḡere haida be ofesi ai, haida be kisini ai, printa gabudiai, haida daiutu e haḡoevamu, dabua e hurimu, haida be meintenens ai, bona haida ma ḡaukara haida e karamu.
Basileia iharorolaina ḡaukarana e duruamu gabuna. Betele iboudiai na e uramu dala idau-idau ai Baibel ena hereva momokani bae halasia, taunimanima iboudiai ese bae dibaia totona. Haheitalai na ina buklet. Heitatao Oreana ena henari henunai ina buklet e torea, bena kompiuta amo tanobada heḡeḡemadai trensleisen tim momo e siai henidia. Bona Betele haida ai printa masini badadia amo e printaia, bena kongrigeisen 110,000 mai kahana e siaidia lao. Unu ḡaukara idau-idau amo Betele famili na sivarai namona iharorolaina ḡaukarana e duruamu.—Mareko 13:10.
-
Betele ai be daidia e ḡaukaramu, bona ede e naridia tomamu?
-
Betele taudia be edena ḡaukara badana e duruamu?