Ini laulau ai o itamu heḡereḡerena, Iehova ena Witnes taudia na kongrigeisen heboudia e laomu negadiai, dabua namodia e karamu bona toadia na namo. Dahaka dainai?

Dirava a matauraiamu. Momokani, Dirava ese ita oromada o toada na se lalomu. (1 Samuel 16:7) To, ia itoma heni dihona totona a heboumu negadiai, a uramu Dirava bona kongrigeisen taudia baia matauraidia. Vaia, ta kota e laomu neganai, dabua namodia e karamu badina e uramu baine hahedinaraia, diadi ena dagi e matauraiamu. Una heḡereḡerena, ai danu a uramu emai hebou gabudiai baia hahedinaraia, ai na “tanobada idoinai ihahemaoro-henina Diravana,” Iehova, bona ia a toma henia dihomu gabuna a matauraidiamu.—Genese 18:25.

Baibel ena hereva heḡereḡerena. Baibel ese Keristani taudia e hagoadadiamu edia dabua “bae hahedokilai, mai manaudia bona mai hematauraidia ida.” (1 Timoteo 2:9, 10) Una sisiba a badinaiamu dainai, asia uramu lebulebu dabuadia o haida ihahekwakwanaidia dabuadia baia kara. A dabua maorodia abi hidimu. Momokani, toada namona amo ‘Ihamaurida Diravana ena hahediba herevadia anidia baita hahedinarai’ bona baita “imodaia” diba. (Tito 2:10; 1 Petro 2:12) Hebou negadiai, dabua namodia a karamu bona toamai na nanamo neganai, haida na e dibamu ai ese Iehova itoma henina diho karana a laloa badamu.

Haida na e gwaumu asi edia dabua namodia dainai, Kingdom Hall na asie maimu. Eda dabua dava bada ḡauna eiava lasi na herevana, to ḡau badana na toana na namo bona ḡoeva.

• Dahaka dainai toma diho negadiai dabua namodia a karamu bona toamai na namo?

• Ededia hahekau herevadia a badinamu?