Taunimanima momo na e laloamu Iehova ena Witnes taudia na dubu matamatana ta ladana. To, laḡani 2,700 mai kahana vada ela, Baibel ese Dirava momokanina ena hesiai taudia e gwauraidia, iena ‘hereva ihamomokanina’ o witnes taudia. (Isaia 43:10-12) Laḡani 1931 do se abia neganai, ladamai na Bible Students. To dahaka dainai ina lada Iehova ena Witnes taudia abia?

Emai Dirava ladana e hahedinaraiamu. Dirava ladana, Iehova, na nega tausen momo Baibel ai e hedinarai, una na toretore gunadia ese e hamomokaniamu. Baibel momo lalodiai una lada gabunai dagi ladadia heḡereḡere Lohiabada o Dirava e toredia. To, Dirava momokanina na Mose enai ina lada, Iehova, e gwauraia murinai, eto: “Ladagu binai ela hanaihanai.” (Esodo 3:15) Unu amo e hahedinaraia ia na idau, dia dirava koikoidia heḡereḡeredia. Ai na Dirava ladana helaḡana a huaiamu dainai a moalemu.

E hahedinaraiamu emai maduna be dahaka. Kara maoromaoro tauna Abela ena nega amo, momo na edia kara bona hereva amo e hamomokania idia na Iehova e abidadama heniava. Laḡani handred momo lalodiai, Noa, Abraham, Sara, Mose, David bona ma haida na “witnes” taudia ai ela. (Heberu 11:4–12:1, NW) Kota ai witnes ta ese asi ena kerere tauna ena hereva e hamomokaniamu heḡereḡerena, ai danu emai Dirava sivaraina a hamomokaniamu.

Iesu a tohotohoamu. Baibel ese Iesu e gwauraiamu “kamonai bona witnes tauna momokanina.” (Apokalupo 3:14, NW) Iesu danu eto, ia ese Dirava ‘ladana e hahedibalaia’ bona Dirava sivaraina ‘momokanina e gwauraia hedinarai.’ (Ioane 17:26; 18:37) Una dainai, Keriso e badinaiamu taudia ese Iehova ladana bae abia bona bae gwauraia hedinarai na ḡau badana. Iehova ena Witnes taudia na unu e kara tomamu.

• Dahaka dainai Bible Student taudia ese ina lada Iehova Ena Witnes taudia e abia?

• Edena nega amo Iehova na mai ena witnes taudia tanobadai?

• Iehova ena Witnes tauna hereadaena be daika?