Bema oi na Iehova ena Witnes ta ida Baibel o stadilaiamu, reana hanaihanai emu stadi bukana o heḡaeḡaelaia gunamu. Una heḡereḡerena, kongrigeisen heboudia do asitala neganai, baita heḡaeḡae guna na ḡau badana. Wiki ta ta iboudiai, unu baita kara tomamu neganai, namo bada baita davarimu.

Stadi negana bona gabuna bavabia hidi. Edena nega be stadi negana namona? Dabai, ḡaukara ta do so karaia lalonai, a? Eiava hanuaboi, natu e mahutamu muridiai, a? Ena be nega kwadoḡi lalonai ba stadi, to namona na stadi negana ba makaia bena ba badinaia. Namona na asi reḡena gabuna ta ai ba stadi, bona reidio, TV o mobael fon ba koudia. Ḡuriḡuri amo emu stadi ba kehoa, unu amo ḡau idau-idau basio lalo-hekwarahilai, to Dirava ena Hereva mo ba laloa.—Filipi 4:6, 7.

Hereva haida ba maka bona ba haere. Ḡau badana na stadi badina ba lalo-pararalaia guna. Anina na atikol eiava karoa lalonai e tore ḡaudia haida ba haero, heḡereḡere hereva kwarana badana bona maraḡidia, laulau, bona riviu henanadaidia. Bena paragraf ta ta ba duahi bona henanadai haeredia ba tahu. E tore siridia na emu Baibel ai ba keho bona ba duahi, bona stadi e duruamu dalana ba laloa. (Kara 17:11) Paragraf ai haere o itamu neganai, hereva haida mo ba maka, unu amo emu haere ba laloatao. Bena hebou ai, sibomu emu hereva amo haere kwadoḡina ta o uramu ba heni neganai, imamu bavabia isi.

Wiki ta ta iboudiai hebou ai a herevalaimu ḡaudia idau-idau bo stadilaimu neganai, Baibel ai emu diba na be bada be laomu.—Mataio 13:51, 52.

• Hebou ḡaudia ba heḡaeḡaelai totona, dahaka ba kara?

• Hebou ai ba haere totona, ede ba heḡaeḡae toma?