Dahaka dainai ini taunimanima na e moalemu? Idia na emai hebou badana ta ai nonoho. Guna, Dirava ese ena hesiai taudia e haḡanidia laḡani ta lalonai nega toi bae hebou, hari ai danu unu a kara tomamu. (Deuteronomi 16:16) Laḡani ta ta iboudiai, ai ese dina tamona seket hebouna na nega rua abimu, bona dina toi rijinol hebouhebouna abiamu. Unu hebou ese ai be ede e durumai tomamu?

Unuseniai a hahegoada hehenimu. ‘Hebou badadia lalodiai’ Israela taudia na mai moaledia ida Iehova e hanamoava, ai danu hebou badadia lalodiai mai moalemai ida Iehova a toma henia dihomu. (Salamo 26:12; 111:1) Unu hebou lalodiai, ai na kongrigeisen o tano idauidau amo e maimu taudia ida a hedavarimu. Dina tubuai, a aniani heboumu, a hebamomu, bona a hahegoada hehenimu. (Kara 2:42) Danu, tanobada heḡeḡemadai emai “orea taudia” e hatamonadiamu lalokauna, na unuseniai a itaiamu.—1 Petro 2:17.

E durumaimu Dirava baia badinaia totona. Israela taudia na namo e davari badina Dirava ena hereva anidia e gwaurai neganai, “lalodia na e parara.” (Nehemia 8:8, 12) Ai danu emai hebou badadiai Baibel ena hereva a kamonaimu amo namo a davarimu. Hebou badadia ta ta edia sinado na Baibel amo e abi. Tok e henimu tauna bona e duruamu taudia edia kaha amo, Dirava ena ura ikarana dalana a dibaiamu. Bona hekwakwanai idau-idau e haheaukalaimu taudia edia sivarai e gwauraimu neganai, una ese e hagoadamaimu. Rijinol heboudiai, Baibel sivaraidia na drama amo e hahedinaraimu neganai, mai anina bada ḡaudia haida a dibamu. Hebou badadia ta ta iboudiai, haida na e bapatisomu, una na edia gwauhamata Dirava enai e hamomokaniamu karana.

• Dahaka dainai hebou badadiai a moalemu?

• Hebou badana ta ilao henina ena namo be dahaka?