Momo na dubu se laomu badina edia henanadai haeredia eiava tauhalo asie davarimu. To dahaka dainai Iehova ena Witnes taudia edia Keristani heboudia baola na namo? Unu hebou ai be dahaka bo davarimu?

Taunimanima namodia bogaragidiai bo moalemu. Aposetolo edia negai, Keristani taudia na mai edia kongrigeisen ta ta, bona edia hebou ai Dirava e toma henia dihova, Toretore Helaḡadia e stadilaiva, bona e hahegoada heheniva. (Heberu 10:24, 25) Bona e moaleva badina idia na turadia korikoridia bogaragidiai. (2 Tesalonika 1:3; 3 Ioane 14) Ai danu idia e karava heḡereḡerena a karamu bona a moalemu.

Baibel ena hahekau herevadia ibadinadia ena namo bo dibamu. Baibel negadiai e karava heḡereḡerena, ai danu iboumai ai—tatau, hahine, natu—na gabu tamonai a heboumu. Hahediba taudia ese Baibel amo e hadibamaimu, edena dalai Baibel ena hahekau herevadia na emai mauri lalonai baia badinadia. (Deuteronomi 31:12; Nehemia 8:8) Hebou e maimu taudia iboudiai ese ane bona edia hereva amo edia helaro bae herevalai diba.—Heberu 10:23.

Emu abidadama Dirava enai be hagoadaiamu. Aposetolo Paulo ese kongrigeisen ta e tore henia, eto: ‘Na ura dikadikamu baina itamui, na tomamu umui bona lau eda heabidadama dainai baita hahealo heheni.’ (Roma 1:11, 12) Hebou negadiai kongrigeisen taudia ibamodia karana ese emai abidadama e hagoadaiamu, bona e durumaimu Baibel ena hahekau herevadia baia badina totona.

A noimumu emai hebou ta baoma bena ina karoa ai ome duahi ḡaudia na sibomu ese bame itadia. Mai moalemai ida baia abimu dae. Emai hebou na asi davadia.

• Emai hebou a karamu daladia be daidia edia heḡereḡerena?

• Keristani hebou ilao henidia amo dahaka namo baita davari?