Dika e varamu neganai, Iehova ena Witnes taudia na maoromaoro e heḡaeḡaemu, edia orea taudia bae durudia totona. Una ese e hahedinaraiamu ai na a helalokau hehenimu. (Ioane 13:34, 35; 1 Ioane 3:17, 18) Ede a heduru tomamu?

Moni a henimu. Guna Iudea ai, doe badana e vara neganai, Antioka Keristani taudia na moni e siai, Iudea Keristani taudia idurudia. (Kara 11:27-30) Una heḡereḡerena, tano haida ai emai orea taudia ese dika e davarimu neganai, emai heduru monidia na kongrigeisen amo a siaimu, e dabumu ḡaudia bae abi totona.—2 Korinto 8:13-15.

E dabumu ḡaudia a henimu. Elda na dika e varamu gabudiai e nohomu kongrigeisen taudia ta ta e sekediamu, idia nanamo eiava. Komiti ta (relief committee) ese aniani, ranu, dabua, mahuta gabudia, bona medikol ḡaudia e narimu. Witnes taudia momo na edia moni bona diba e ḡaukaralaimu dika gabudiai bae heduru totona, eiava e dika rumadia bona Kingdom Hall e hanamomu. Emai orea ai lalotamona na mia bona a ḡaukara heboumu dainai, dika e varamu negadiai maoromaoro a hedurumu. Ena be emai orea taudia a durudia badamu, to dala a davarimu negadia ai, taunimanima iboudiai a kara namo henidiamu, herevana edia dubu na idau.—Galatia 6:10.

Baibel amo tauhalo a henimu. Dika negadiai, lalometau taudia na tauhalo e uramu. Nega unu bamodiai, ai na “tauhalo Diravana,” Iehova, amo goada abimu. (2 Korinto 1:3, 4) Una dainai, Dirava ena gwauhamata na lalometau taudia ediai a herevalaimu, a hadibadiamu Dirava ena Basileia ese kahirakahira dika e havaramu ḡaudia iboudiai baine haoredia.—Apokalupo 21:4.

• Dahaka dainai Witnes taudia na dika negadiai e heduru haraḡamu?

• Edena dalai Baibel amo tauhalo na lalometau taudia baita henidia?