Laḡani momo lalodiai, ai Iehova ena Witnes taudia ese Baibel idauidau a ḡaukaralaiva, a printava bona a hariharilaiva. To gabeai a lalo-parara, Baibel matamatana ta baia halasia na namo, badina Dirava na e uramu taunimanima iboudiai ese “hereva momokani” bae dibaia. (1 Timoteo 2:3, 4) Una dainai, laḡani 1950 ai, New World Translation Baibel kahana haida a halasi matama. Una Baibel na gado 120 mai kahanai a hahanaidia namonamo.

Baibul ta baia lalo-pararalaia haraḡa na mai anina. Gado na e idaumu bona Baibel momo herevadia na asita lalo-pararalaimu. Danu Baibel toretore gunadia e hedinaraimu dainai, Heberu, Aramia bona Grik gadodia ai e tore herevadia a lalo-pararalai namonamomu.

Baibul ta baia hahanaia ḡoevaḡoeva na mai anina. Baibel ihahanaina taudia ese Dirava ena hereva helaḡadia latadiai hereva ta basie ato kau eiava basie abi oho, namona na toretore ginigunana bae badinaia. To Baibel momo lalodiai Dirava ladana, Iehova, na se ato.

Baibul ta ai Dirava ladana baia abia isi na mai anina. (2 Samuel 23:2) Iehova ladana na nega 7,000 mai kahana toretore gunadiai e hedinarai (henuai laulau a itaia). Una dainai, New World Translation Baibel lalonai una lada na gabudia korikoridiai ato lou. (Salamo 83:18) New World Translation Baibel e hahanaia taudia ese laḡani momo lalodiai ḡau iboudiai e tahu namonamo dainai, a duahiamu neganai a moalelaiamu, badina Dirava ena lalohadai na e hedinarai namonamomu. Ena be emu gado ai una Baibel e hahanaia eiava lasi, to a hagoadamumu dina ta ta iboudiai Iehova ena Hereva ba duahia.—Iosua 1:8; Salamo 1:2, 3.

• Dahaka dainai Baibel matamatana ta a hahanaia?

• Dirava ena ura idibana totona, dina ta ta iboudiai dahaka baita kara?