Iehova ese ruma bese e havaraia neganai, tama sina maoro e henidia natudia bae biagudia. (Kolose 3:20) Tama sina edia maduna na natu bae hadibaia Iehova baine lalokau henia bona taunimanima namona ai bainela. (2 Timoteo 1:5; 3:15) Danu, natumu kudounai e miamu ḡaudia na ba dibadia. Emu haheitalai na mai anina bada. Bema Iehova ena Hereva na kudoumui ai mia, natumui na bo hadibaia namonamo dibamu.​—Salamo 40:8.

BAIBUL NA E GWAUMU: ‘Hereva ikamonaina ai ba haraḡa, hereva igwauraina ai ba halahe.’ (Iakobo 1:19) O uramu natumui ese bae hereva henimui neganai basie gari. Namona na bae diba be herevamu neganai, bo hakalamu. Basio badu, unu amo edia lalohadai bae herevalaia neganai basie gari. (Iakobo 3:18) Bema be laloamu oi na bo hereva aukamu eiava bo hahemaoro henidiamu, edia lalohadai korikori na basie herevalaimu. Natumu edia kara ba haheaukalaidia, bona hanaihanai ba hamaorodia o lalokau henidiamu.​—Mataio 3:17; 1 Korinto 8:1.

BA KARA DIBA ḠAUDIA:

• Natumui e uramu bae herevahereva neganai, ba noho heḡaeḡae

• Hanaihanai natumui ida ba herevahereva, dia hekwakwanai negadiai mo

BAIBUL NA E GWAUMU: “Lalo-parara e abia tarika-tarikamu tauna na ena namo baine bada.” (Hereva Lada-isidia 19:8) Nega haida, dia natumui edia hereva mo ba laloa, to edia kara danu, unu amo edia hemami korikori ba dibaia. Vaia, matamata taudia na edia hemami korikori basie gwauraimu to hereva kahadiai be herevamu eiava be koikoimu. “Tau ta do se kamonai negana ai na e haeremu, una na ena kavakava.” (Hereva Lada-isidia 18:13) Basio badu haraḡa.​—Hereva Lada-isidia 19:11.

BA KARA DIBA ḠAUDIA:

• Herevana natumui na dahaka e gwauraimu, to edia hereva na basio utu eiava basio badu

• Ba lalo lou umui negamui ai emui hemami be ede bamona bona dahaka o lalo badava

BAIBUL NA E GWAUMU: “Natugu e, tamamu ena hahediba ba kamonai, bona sinamu ena hahediba herevadia basio dadaraidia.” (Hereva Lada-isidia 1:8) Iehova ese tama sina na maoro e henidia natudia bae biagudia. Namona na natumui ba hadibadia bae matauraimui bona bae kamonai henimui. (Efeso 6:1-3) Natu na be dibamu bema tama sina na asie ‘lalo tamonamu.’ (1 Korinto 1:10) Bema asio lalotamonamu, natumui vairadiai basio hahedinaraia, badina una kara dainai basie matauraimuimu.

BA KARA DIBA ḠAUDIA:

• Natumui ihadibadia daladia ba herevalai bona ba lalotamona

• Bema natumui ihadibana dalanai emui lalohadai na idau, namona na adavamu ena lalohadai dalana ba haeroa danu

BAIBUL NA E GWAUMU: “Meromero bema rakalaia dalana na ba hadibalaia.” (Hereva Lada-isidia 22:6) Natumu ihadibana karana na basine vara kavamu. Namona na natumui ihadibadia dalana ba lalohadailaia, bona matadia ba hakani. (Salamo 127:4; Hereva Lada-isidia 29:17) Matahakani anina na dia ba kwadidia mo, to ba durudia taravatu o atomu badidia bae lalopararalai. (Hereva Lada-isidia 28:7) Danu, ba hadibadia Iehova ena Hereva bae ura henia bona ena hahekau herevadia bae diba. (Salamo 1:2) Una ese baine durudia lalomamina namona bae abia.​—Heberu 5:14.

BA KARA DIBA ḠAUDIA:

• Natumui na bae diba Dirava na e noho momokanimu bona bae abidadama henia diba

• Ba durudia kara mirodia be dahaka bae lalopararalai bona bae dadaraidia, kara unu bamodia haida na Intanet bona social networking ai e hedinaraimu. Matabodaḡa taudia bae dadaraidia daladia ba hadibadia