Bema bo headava matamamu, hekwakwanai momo na be varamu. Unu na bae vara diba badina emui lalohadai, hemami, bona mauri daladia na idauidau. Eiava haida ese be havaramu o be vara kavamu.

Ena be nega haida asita uramu eda hekwakwanai baita hamaoromaorodia, to Baibul na e gwaumu baita hamaoromaorodia na namo. (Mataio 5:23, 24) Bema Baibul ena hahekau herevadia baita badinadiamu, hekwakwanai baita hahanaidiamu.

BAIBUL NA E GWAUMU: “Herevahereva na mai negana.” (Kohelete 3:1, 7) Namona na nega bavato hekwakwanai ba herevalai. Emu hemami bona lalohadai na mai momokanimu ida adavamu ba hamaorolaia. Nega iboudiai “hereva momokani” ba gwaurai. (Efeso 4:25) Ena be o badu dikadikamu to basio heai. Haere manauna ese heai e kouamu.​—Hereva Lada-isidia 15:4; 26:20.

Ena be adavamu ena hereva na so abia daemu, to namona na ba lalomanau bona basio helaloboio, adavamu ba lalokau henia bona ba matauraia. (Kolose 4:6) Hekwakwanai ba hamaoromaorodia haraḡa na namo, bona emui herevahereva karana na basio hadokoa.​—Efeso 4:26.

BA KARA DIBA ḠAUDIA:

• Nega maorodia bavabi hidi hekwakwanai ba herevalai

• Adavamu e herevamu neganai, ena hereva basio utua. Oi danu gabeai bo herevamu

BAIBUL NA E GWAUMU: “Ta ta ba heura heheni, varavara na heheto; ba hemataurai heheni danu.” (Roma 12:10) Emu hakala karana na mai anina bada. Adavamu ena lalohadai ba lalopararalaia totona, “ba hekaha heheni” bona “ba manau” na namo. (1 Petro 3:8; Iakobo 1:19) Basio hakala koikoi. Bema mai dalana, o karaiamu ḡaukarana ba hadokoa bona adavamu ena hereva ba kamonai, eiava ba noia gabeai ba herevalaia. Bema adavamu na dia oi inaimu, to turamu heḡereḡerena bo laloamu, ‘basio badu haraḡamu.’​—Kohelete 7:9.

BA KARA DIBA ḠAUDIA:

• Ba hakala, to basio badu, ena be o kamonaiamu ḡauna na so moalelaiamu

• Hereva anidia korikori ba diba. Adavamu toana bona ena hereva mamidia ba haerodia

BAIBUL NA E GWAUMU: “Hekwarahi iboudiai na mai ahudia, a hereva kava ese dabu e havaraiamu.” (Hereva Lada-isidia 14:23) Hekwakwanai ihanamona dalana bavabia hidi mo na dia heḡereḡere, to raruosi ese o abia hidi ḡauna ba badinaia. Ena be mai hekwarahina bona nega bada be oremu, to una na mai ena namo. (Hereva Lada-isidia 10:4) Bema bo ḡaukara heboumu, emui hekwarahi “davana namona” bo abiamu.​—Kohelete 4:9.

BA KARA DIBA ḠAUDIA:

• Emui hekwakwanai ihanamodia daladia bavabi hidi bona ba badina

• Nega ta ta ai o badinadiamu ḡaudia ba haerodia, umui e durumuimu eiava