Headava ese ruma bese matamatana ta e havaraiamu. Ena be tamamu sinamu na ba lalokau henidia bona ba matauraidia hanaihanai, to hari oi ese ba laloa bada tauna na oi adavamu. Reana tamamu sinamu eiava ravamu ese una na basie uralaiamu. To Baibul ena hahekau herevadia ese baine durumu lalohadai maorona bavabia, unu amo emu ruma bese matamatana o hagoadaiamu lalonai, tamamu sinamu bona ravamu ida maino ai ba noho diba.

BAIBUL NA E GWAUMU: “Tamamu sinamu ba matauraidia.” (Efeso 6:2) Herevana oi laḡanimu na hida, to hanaihanai tamamu sinamu ba matauraidia. Namona na ba laloparara oi adavamu danu mai tamana sinana, una dainai ia ese tamana sinana baine lalodia danu. “Lalokau na . . . asi ena hebore [“mama” NW],” una dainai adavamu ese tamana sinana baine haerodia neganai basio lalo kerere.​—1 Korinto 13:4; Galatia 5:26.

BA KARA DIBA ḠAUDIA:

• Ini na basio hereva toma, “Emu bese na nega iboudiai lau e hahemaraigumu” eiava “Sinamu na hanaihanai na karamu ḡaudia iboudia se moalelaimu”

• Namona na adavamu ena lalohadai heḡereḡerenai ba lalohadai

BAIBUL NA E GWAUMU: “Tau ese tamana sinana baine rakatanidia, adavana baine badinaia, raruosi na anidia tamona ai baela.” (Genese 2:24) Bo headavamu neganai tamamu sinamu na be laloamu idia na mai edia maoro oi bae biagumu bona emu headava maurina lalonai bae vareai.

Namona na adavamu ida ba herevahereva, idia be dahaka bae kara eiava basie kara, bena mai lalokaumui ida ba hadibadia. Namona na hereva momokani ba gwaurai to basio gwau henidia. (Hereva Lada-isidia 15:1) Manau, manada, bona haheauka ese baine durumui emui hetura karana idia ida baine namo bona “lalokau ai ba haheauka heheni.”​—Efeso 4:2.

BA KARA DIBA ḠAUDIA:

• Bema o laloamu emu headava lalonai varavara na e lao hereamu, namona na nega namodiai adavamu ida ba herevalaia

• Namona na hekwakwanai ihamaoromaorodia daladia ba lalotamonalai