Ina buklet amo Baibel ena hahediba hereva badadia haida vada ome diba dainai, Iehova o lalokau heniamu. Una lalokau ba hagoadaia hanaihanai na ḡau badana. (1 Petro 2:2) Hanaihanai Dirava ena Hereva ba stadilaia bona Dirava turana ai baola, bena reana gabeai mauri hanaihanai bavabia diba.​—Ioane 17:3; Iuda 21 duahidia.

Dirava idibana karana bo habadaiamu neganai, emu abidadama danu be goadamu. Mai ena abidadama tauna ese Dirava e hamoaleamu. (Heberu 11:1, 6) Unu bamona tauna na ena dika amo e helalo-kerehaimu, bona ena mauri dikana e dadaraia vaitanimu.​—Kara 3:19 duahia.

Reana bo uramu ome diba ḡaudia na ma haida ba hadibalaidia​—vaia eda kara, ta uramu sivarai namodia baita herevalai, ani? Baibel bo stadilaia hanaihanaimu neganai, Baibel iḡaukaralaina dalana danu bo manadalaiamu. Anina na, Iehova iabidadama henina karana bona sivarai namodia na Baibel amo ma haida bo hadibalaidiamu.​—Roma 10:13-15 duahidia.

Momo ese sivarai namodia na turadia o varavaradia e harorolai henidia gunamu, reana unu ba kara toma diba. To, heai e havaramu haroro herevadia na basio gwaurai. Dia namo ta ba hamaoroa, ia na dubu kererena e laomu, lasi, to namona na Dirava ena gwauhamata sivaradia mo ba hamaorolaia. Ba helalotao danu, taunimanima na emu hereva bona kara namodia daidiai, Baibel ena hereva momokani bae abia dae diba.​—2 Timoteo 2:24, 25 duahidia.

Baibel istadilaina karana amo, Iehova iabidadama henina karana ba habadaia. Gabeai, ḡuriḡuri amo emu mauri na Iehova enai  ba gwauhamtalaia, bena ia ba badinaia. Unu ba kara toma neganai, Iehova natuna ai baola diba.​—2 Korinto 6:18 duahia.

Baibel ba stadilaia hanaihanai neganai, maoro bona kerere edia idau ba dibadia. (Heberu 5:13, 14) Iehova ena Witnes ta ba noia, baine durumu. Ia ese Baibel be Dahaka Ia Hadibaia? (Hiri Motu gado bukana) amo baine durumu, Baibel anina ba lalopararalaia totona. Baibel amo ḡau momo bo dibamu neganai, emu mauri danu be heau namonamomu.​—Salamo 1:1-3; 73:27, 28 duahidia.

Sivarai namodia na Iehova, moale Diravana, ena amo e maimu dainai, Ia turana ai baola na ḡau badana. Unu ba kara toma dalana binai: Iena orea taudia ba bamodia. (Heberu 10:24, 25) Hanaihanai Iehova ihamoalena karadia ba goadalai, unu amo ba hahedinaraia, oi na o uramu mauri korikorina eiava mauri hanaihanai bavabia. Una hahenamo bavabia totona, Dirava turana ai baola na ḡau badana.​—1 Timoteo 1:11; 6:19 duahidia.