Satana ese koikoi herevana ginigunana e gwauraia negana amo, tanobada ai dika vada e hematama. Matamana neganai, Satana na aneru ḡoevadaena, to gabeai, ia na ‘hereva momokani se badinaia.’ (Ioane 8:44) Satana na e urava taunimanima ese ia bae toma henia diho, to una na kerere; badina be Dirava sibona baita toma henia diho na maoro. Satana ese hahine ginigunana, Heva, e koia bona lalona e ania ia baine kamonai henia, dia Dirava. Adam danu Heva ida Dirava e gwau-edeede henia. Adam ese una abi hidi e karaia dainai, hisihisi bona mase e varamu.​—Genese 3:1-6, 19 duahidia.

Satana ese Heva lalona e ania Dirava baine gwau-edeede henia negana amo, Satana na e gwa, Herea Mikamika Diravana e lohiamu na dia maoro. Taunimanima momo danu Satana ida Dirava ena lohia dalana e dadaraiamu. Una dainai, Baibel na e gwaumu, Satana na “tanobada lohiana.”​—Ioane 14:30; 1 Ioane 5:19 duahidia.

Dirava ena ḡaukara iboudiai na ḡoḡoevadadae. Ia ese aneru bona taunimanima ḡoevadaedia e karadia dainai, idia sibodia na Dirava bae badinaia namonamo diba. (Deuteronomi 32:4, 5) Dirava ese ita e karada neganai ura kwalimu (freedom) e henida danu, anina na namo o dika iabi hidina na ita siboda ese baita kara. Una ura kwalimu dainai, ita na mai eda dala baita hahedinaraia, Dirava ta lalokau heniamu.​—Iakobo 1:13-15; 1 Ioane 5:3 duahidia.

Adam bona Heva edia nega amo ema hari, momo na doini Iehova ena lohia dalana e gwau-edeede heniamu. To, dahaka dainai Dirava ese una kara do se koua? Ia na e uramu baine hahedinaraia, Dirava ena lohia dalana sibona ese taunimanima edia mauri baine hanamoa. (Kohelete 7:29; 8:9) Laḡani 6,000 vada eme ore bona e varamu ḡaudia ese e hadibadamu, taunimanima sibodia na basie  henari o basie helohia diba. Tanobada e lohiaimu taudia iboudiai ese tuari, raskol karadia, kara gageva, o gorere do asie haoredia.​—Ieremia 10:23; Roma 9:17 duahidia.

To, Dirava ena lohia dalana e abia daemu taudia na namo e davarimu. (Isaia 48:17, 18) Kahirakahira, Iehova ese taunimanima edia gavamani iboudiai baine haoredia. To, Dirava ena lohia dalana e abia hidimu taudia sibodia ese tanobada bae noholaia.​—Isaia 11:9; Daniel 2:44 duahia.

Satana na e gwaumu, taunimanima na Iehova se lalokau heniamu, to Dirava e hesiai heniamu, namo bae abi helaoreana. Satana ena hereva ba hakoikoia diba, a? Oibe! Dirava doini e haheaukamu lalonai, namona na baita hahedinaraia, ita be Dirava ena lohia dalana ta abia daemu eiava taunimanima edia. Eda mauri dalana amo baita hahedinaraiamu, ita be daika ena lohia dalana ta abia daemu.​—Iobu 1:8-12; Hereva Lada-isidia 27:11 duahidia.

Dirava ena lohia dalana baita abia dae dalana ta binai: Dirava ena Hereva, Baibel, ese e gwauraiamu tomadiho momokani karadia baita diba bena baita badinadia. (Ioane 4:23) Satana ena lohia dalana baita dadaraia dalana ta binai: Politikol bona tuari karadia amo baita gini siri, Iesu e kara heḡereḡerena.​—Ioane 17:14 duahia.

Satana ese ena siahu e ḡaukaralaiamu dalana ta binai: Ita e hagoadadamu matabodaḡa bona dika bae havara karadia baita kara totona. Unu kara ta dadararaidiamu negadiai, readia turada haida o varavarada haida ese be kirikirilaidamu o be dadaraidamu. (1 Petro 4:3, 4) Una dainai, abi hidi maorona baita karaia na ḡau badana. Ita ese Dirava e lalokau heniamu taudia baita bamodia, eiava? Ita ese Dirava ena taravatu namodia baita badinadia, eiava? Unu baita kara toma neganai, ita ese Satana ena hereva baita hakoikoia, badina ia na etomu, ‘Metau negadiai, ita na Dirava basita badinaia diba.’​—1 Korinto 6:9, 10; 15:33 duahidia.

Dirava na taunimanima e lalokau henidiamu dainai, ta dibamu Ia ese hisihisi iboudiai baine haoredia vaitani. Dirava ena lohia dalana e abia daemu taudia na tanobada ai mauri namona bae moalelaia ela bona hanaihanai.​—Ioane 3:16 duahia.