Dirava na e uramu taunimanima iboudiai ese ḡuriḡuri karana amo ia bae hakahikahia. (Salamo 65:2) To, Ia ese ḡuriḡuri haida na se kamonai henidiamu o se abi daemu. Heḡereḡere, adavana e kara auka heniamu tauna ena ḡuriḡuri iboudiai na Dirava ese basine abi dae. (1 Petro 3:7) Danu, Israel taudia e kara havarava negadiai, Dirava ese edia ḡuriḡuri na se kamonai henidiava. Momokani, ḡuriḡuri karana baita matauraia na ḡau badana. Danu, kara dika rohorohodia e karamu taudia e helalo-kerehaimu neganai, Dirava ese edia ḡuriḡuri na e abi daemu.​—Isaia 1:15; 55:7 duahidia.

Ḡuriḡuri na tomadiho karana ta. Una dainai, namona na Ihavarada Diravana, Iehova, sibona mo baita ḡuriḡuri henia. (Mataio 4:10; 6:9) Ita na dia ḡoevadae tauda dainai, Iesu ladanai baita ḡuriḡuri na namo, badina ia na eda kara dika dainai e mase tauna. (Ioane 14:6) Iehova na se uramu eda ḡuriḡuri herevadia na pepai baita tore o baita lalodiatao, bena baita gwaurai loulou. Ia na e uramu kudouda amo Ia baita ḡuriḡuri henia.​—Mataio 6:7; Filipi 4:6, 7 duahia.

Ihavarada Diravana na laloda ai ta gwauraimu ḡuriḡuridia (silent prayers) danu baine kamonaidia diba. (1 Samuel 1:12, 13) Ia na e uramu nega idauidau ai​—daba, adorahi, aniani negadiai, bona hekwakwanai negadiai​—Ia baita ḡuriḡuri henia.​—Salamo 55:22; Mataio 15:36 duahidia.

Dirava se abidadama heniamu taudia bona Iena gwauhamata​—tanobada ai maino baine vara gwauhamatana​—e kirikirilaiamu taudia bogaragidiai ta nohomu dainai, Dirava itura henina karana na mai hekwarahina. (2 Timoteo 3:1, 4; 2 Petro 3:3, 13) Una dainai, Kristen taudia momokanidia ida baita heboumu neganai, idia bona ita baita hahegoada hehenimu.​—Heberu 10:24, 25 duahia.

Dirava e lalokau heniamu taudia baita bamodia neganai, idia ese be durudamu Dirava baita hetura henia totona. Iehova ena Witnes taudia edia hebou lalodiai, taunimanima na e hahegoada hehenimu.​—Roma 1:11, 12 duahidia.

Baibel amo o dibadiamu herevadia ba lalodia dobu karana ese baine durumu, Dirava ba hetura henia totona. Iehova ena kara, sisiba, bona gwauhamata herevadia anidia ba lalodia dobu. Mai ḡuriḡurimu ida unu ba kara toma neganai, Iehova ena lalokau bona aonega ba lalopararalaidia namonamo.​—Iosua 1:8; Salamo 1:1-3 duahidia.

Iehova ba hetura henia dalana badana binai: Ia enai ba tabekau bona ia bavabidadama henia. Ta hadoamu flaoana ta baine mauri totona, baita dairia hanaihanai na ḡau badana. Una heḡereḡerena, eda abidadama baine goada totona, namona na Baibel amo ta dibadiamu bona ta abi daemu herevadia badidia na hanaihanai baita lalodia dobu.​—Mataio 4:4; Heberu 11:1, 6 duahidia.

Iehova na ia e lalokau heniamu taudia e lalodiamu. Ia ese e gimadiamu badina se uramu ḡau ta ese edia abidadama bona mauri hanaihanai helarona baine hadikaia. (Salamo 91:1, 2, 7-10) Ia ese ita e haḡanidamu, tauanida bona eda moale bae hadika daladia baita dadarai. Iehova ese mauri dalana hereadaena na ita e hadibalaidamu.​—Salamo 73:27, 28; Iakobo 4:4, 8 duahidia.