Dirava ese Aberahamo ena bese iboudiai e haboudia, bese tamona ai e halaodia, bena taravatu e henidia. Ia ese una bese ladana e hatoa “Israel”​—una bese sibona mo tomadiho momokani karadia e karava bona Dirava ena Hereva e gimaiava. (Salamo 147:19, 20) Una bese dainai, tanobada besedia iboudiai ese hahenamo bae davari diba.​—Genese 22:18 duahia.

Dirava ese Israel taudia e abidia hidi, Iena witnes taudia eiava hereva ihamomokanina taudia ai e halaodia. (Isaia 43:10, NW) Una bese ena sivarai ese e hamomokania, Dirava ena taravatu bae badinadia taudia na namo bae davari. (Deuteronomi 4:6) Danu, una bese amo, taunimanima ma haida ese Dirava momokanina bae dibaia.​—Isaia 43:12 duahia.

Gabeai, Dirava ese Israel besena e dadaraia, bena una bese gabunai, Iehova ese Kristen kongrigeisen e abia hidi. (Mataio 21:43; 23:37, 38) Hari ina negai, dia Israel taudia, to Kristen taudia momokanidia na Iehova ena hereva ihamomokanina (o witnes) ḡaukarana e karaiamu.​—Kara 15:14, 17 duahidia.

Iesu ese ia murinai e rakava taudia e haboudia, bese iboudiai bae haroro henidia bona hahediba taudia ai bae halaodia totona. (Mataio 10:7, 11; 24:14; 28:19, 20) Ina nega dokona lalonai, unu ḡaukara na e bada e laomu. Ina na nega ginigunana, Iehova ese bese idauidau milioni na tomadiho momokanina lalonai vada e hatamonadia. (Apokalupo 7:9, 10) Kristen taudia momokanidia e lalotamona dainai, e hahegoada hehenimu bona e heduru hehenimu. Ena be idia na tano idauidau ai edia Kristen heboudia e abimu, to iboudiai na program tamona e badinaiamu​—una program lalonai, Baibel amo heduru e abimu.​—Heberu 10:24, 25 duahidia.

Lagani 1870 heḡereḡerena ai, Baibel anina e tahuava grup maraḡina ta ladana, Bible students ese guna e boio hereva momokanidia haida e davari matamava. Idia e lalopararalaia ḡauna ta binai: Iesu na Kristen kongrigeisen e haboua, haroro ḡaukara baine karaia totona. Una dainai, una grup e toreisi, tanobada ibounai, Basileia iharorolaina ḡaukarana e hamatamaia. Lagani 1931 ai, edia grup o orea ladana e hatoa, Iehova ena Witnes taudia.​—Kara 1:8; 2:1, 4; 5:42 duahidia.

Aposetolo edia negai, heitatao oreana (governing body) ta ese tano idauidau ai e nohova Kristen kongrigeisen iboudiai e naridiava. Unu heitatao elda tataudia na e abia daeva, Iesu na kongrigeisen Kwarana. (Kara 16:4, 5) Una heḡereḡerena, hari ina negai, Heitatao Oreana (Governing Body) lalonai e ḡaukaramu lo elda tatau ese tano idauidau ai e nohomu Iehova ena Witnes taudia ibouboudiai e naridiamu. Una Heitatao Oreana ese Iehova ena Witnes taudia edia brens ofesi iboudiai e naridiamu. Unu brens ai e ḡaukaramu taudia ese Baibel istadilaidia bukadia na gado 600 mai kahana ai e hahanaidiamu, e printadiamu, bona e halasidiamu. Danu, Heitatao Oreana ese tano idauidau ai e nohomu kongrigeisen 100,000 mai kahana na Baibel amo e hagoadadiamu bona e hakaudiamu. Unu kongrigeisen ta ta lalodiai, lo tatau haida na elda o hahekau ḡaukarana e karaiamu. Unu elda taudia na mai edia lalokau ida Dirava ena mamoe e naridiamu.​—1 Petro 5:2, 3 duahidia.

Iehova ena Witnes taudia danu mai lalotamonadia ida sivarai namona e harorolaiamu, bona kamonai taudia na hahediba taudia ai e halaodiamu. Aposetolo taudia heḡereḡeredia, ai danu ruma ta ta a laomu, taunimanima a haroro henidiamu. (Kara 20:20) Danu, Baibel ena hereva momokani e ura heniamu kudou maoro taudia a noidiamu, baia durudia, Baibel amo diba bae abia totona. Ai, Iehova ena Witnes taudia na dia orea ta sibona mo, to ai na ruma bese badana ta na heto. Tamamai na tamona, bona Ia na mai ena lalokau. Ai iboumai na tadikaka bona taihu, bona a helalokau hehenimu. (2 Tesalonika 1:3, NW) Iehova ena Witnes taudia na mai lalotamonadia ida Dirava e hamoaleamu bona ma haida e durudiamu dainai, ina tanobada ai, idia na e moalemu ruma besena ta na heto.​—Salamo 33:12; Kara 20:35 duahidia.