Iesu ese murinai e rakava taudia e haḡanidia taunimanima na hahediba ai bae halaodia. (Mt 28:19) Anina na haroro bona hahediba ḡaukarana bae karaia. Namona na nega ta ta siboda baita henanadai, ‘Edena dala ai hahediba ihalaodia ḡaukarana baina karaia namonamo?’

Basita nari taunimanima na dekeda baema totona, to namona na hanaihanai “gaiho namo” taudia baita tahudia. (Mt 10:11) Ta haroromu neganai, ta ‘davaridiamu taudia’ iboudiai ta hereva henidiamu, a? (Ka 17:17) Aposetolo Paulo ena haroro goadagoada dainai Ludia na hahediba ta ai ela.​—Ka 16:13-15.

VIDIO LADANA, BAITA HARORO HANAIHANAI, BASITA “HADOKOA”​—NEGA BONA GABU IDAUIDAU AI BONA RUMA TA RUMA TA AI, BA HALASIA BENA INI HENANADAI BA HAERELAI:

• Samuel ena dina ta ta maurina ai, edena dala ai e hahedinaraia ia na hanaihanai hereva momokani uhedia e hadova?

• Dahaka dainai haroro daladia idauidau ai baita haheauka na namo?

• Emu dina ta ta maurina ai, daidia ediai Basileia sivaraina ba harorolaia diba?

Taunimanima hahediba ai baita halaodia totona, pablikeisen mo baita rakatani na dia heḡereḡere. Lauma dalanai bae goada totona, namona na baita lou henidia bona Baibul stadi baita kara. (1Ko 3:6-9) Bema baita hekwarahi ta baita durua, to Basileia ena hereva momokani basine laloa bada be ede bamona? (Mt 13:19-22) Namona na hanaihanai kudoudia “tano namona” na heto taudia baita tahudia.​—Mt 13:23; Ka 13:48.

VIDIO LADANA BAITA HARORO HANAIHANAI, BASITA “HADOKOA”​—PABLIK GABUDIA AI BONA HAHEDIBA IHALAODIA ḠAUKARANA AI, BA HALASIA BENA INI HENANADAI BA HAERELAI::

• Edena dala ai Solomon bona Mary ese hereva momokani uhedia, Ezekiel bona Abigail kudoudia ai na e dairidia?

• Haroro daladia idauidau bona pablik gabudia ai ta haorormu negadiai, eda ura badana be dahaka?

• Dahaka dainai ma haida hereva momokani baita hadibadia karana na baita laloa bada?