Laḡani 2018 amo, iseda pablik magasin idauidau ese topik ta ta e herevalaimu. Ini magasin iboudiai na iseda Hahediba Toolbox ai bo davarimu. Una dainai haroro ai baita ḡaukaralaidia diba. Reana gabu ta ai ta haloaloamu eiava stoa ta laomu negadiai, unu magasin haida baita abi kau diba. Ini magasin na dia ta istadi henina totona baita ḡaukaralai, to edia ḡaukara na taunimanima lalodia bae veri Dirava bae dibaia totona.

Ta ida herevahereva o hamatamaiamu neganai, siri ta ba duahia bona magasin ai lalona baine veria topik ta ba herevalaia. Heḡereḡere, bema ia na mai ena famli eiava ena lalokau tauna ta e haboioa dainai e lalohisihisimu, reana ba o gwa: “Oi o davariamu hekwakwanaina e herevalaia magasin namona ta na duahia. Na uramu baina hahedinaraia?” Bema o itaiamu una tau o hahine na e uramu diba ma haida baine abi, reana magasin ba henia eiava elektronik ḡauna ta ba siaia, ena be una na emu haroro ginigunana. Vaia buka bona magasin ihariharilaina karana na dia eda tahua ḡauna badana, to magasin baita ḡaukaralaimu neganai kudou-maoro taudia baita davaridia dibamu.​—Apos 13:48.