Mani a laloa, oi na Iesu ena negai Galilea ai o nohova. Oi na Kalaga Ariana totona Ierusalem ola. Una hanua na Dirava itomadiho henina taudia, gabu dau bona badi tanodia amo ema taudia, ese e hahonua. Oi na o urava boubou ḡauna ta Iehova ba henia. Una dainai, nani ta o abia bona unu hutuhutu lalonai mai emu hekwarahi ida dubu helaḡa o raka lao. O kau neganai, dubu helaḡa na boubou ḡaudia e urava bae heni taudia ese e hahonua. O nari ela bona una na oiemu nega nani na hahelaḡa tauna ba henia. Una negai, oi na o helalotao tadikakamu ta ida o heai, reana ia na unu hutuma bogaraḡidiai eiava hanua lalonai. Iesu ese ba karaia ḡauna na e herevalaia. (Mataio 5:24 ba duahia.) Edena dala ai oi bona tadikakamu na Iesu ena hereva heḡereḡerena ba maino? Henu listina ai, haere maorona ba makaia.

NAMONA NA OI ESE . . .

• tadikakamu ba hereva henia bema o laloamu ia na badi namona ta dainai e lalohisihisi

• tadikakamu ena lalohadai ba hamaoromaoroa bema o laloamu ia na e badu kava eiava bema una hekwakwanai na umui raruosi emui kerere

• tadikakamu ena lalohadai e herevalaiamu neganai ba kamonai namonamo, bona ena be iena hereva anina na so lalopararalaiamu, to mai momokanimu ida ba sori henia badina emu kara ta amo lalona o hahisia

NAMONA NA TADIKAKAMU ESE . . .

• kongrigeisen ai ma haida edia heduru baine tahu totona baine hamaorodia oi ese ia na o kara auka henia

• mai baduna ida baine hereva henimu, e vara hekwakwanaina ibounai baine gwauraia lou, bona baine hamaoromu una na emu kerere dainai ba hereva hedinarai na namo

• ia ba hereva henia totona o manau bona o boga auka karana baine lalopararalaia, bona mai kudouna idoinai ida emu dika baine gwautao

Ena be hari eda tomadiho ai animal na asita bouboulaimu, to Iesu be e urava dahaka baita diba, tadikakada ida baita maino karana ai bona Dirava ese e abia daemu tomadiho dalana ai?