Dina ta ta ai be dahaka hekwakwanai o davarimu? Oi tama emu gaukara be momo, a? Eiava oi tama o sina sibomu o hekwarahimu emu ruma bese o nariamu, a? Eiava skuli gabunai oi na turamu ese e dorimumu kara kererena ta ba karaia totona, a? Eiava oi na mai emu gorere eiava burukadia edia hisihisi o davarimu, a? Ita iboudiai na hekwakwanai ta davarimu. Tadikaka momo ese hekwakwanai na murinamurina nega tamona lalonai e davarimu. To ta dibamu kahirakahira Iehova ese ini hekwakwanai iboudiai amo ita na be ruhadamu.​—2Ko 4:16-18.

Una ta nariamu lalonai, namona na baita moale badina dibada Iehova ese eda hisihisi na e lalopararalaimu, eda haheauka karana na e itaiamu, bona vaira negai hahenamo momo be henidamu. (Ier 29:11, 12) Iesu danu ita na e laloda badamu. Eda Kristen maduna idauidau ta haḡuḡurumu negadiai, Iesu ena gwauhamata baita laloa, etomu: “Lau na . . . umui ida ta nohomu.” (Mt 28:20) Dirava ena Basileia ese vaira neganai be ruahadamu karana baita laloa dobumu neganai, ita na vaira negana baita nariamu bona hari ta davarimu hahetohodia baita haheaukalaimu.​—Ro 8:19-21.

VIDIO LADANA HEKWAKWANAI NEGADIAI, IESU BA RARAIA​—BASILEIA ESE BE HAVARAMU HAHENAMODIA BA ITAIA, UNA MURINAI INI HENANADAI BA HAERELAIDIA:

• Taunimanina be edena dalai Dirava amo e daudau, bona dahaka e vara?

• Iehova e badinaiamu taudia be vaira neganai dahaka hahenamo be moalelaimu?

• Vaira neganai una hahenamo be ede baita abia tomamu?

• Tanobada matamatana ai oi be o uramu dahaka hahenamo idauidau ba moalelai?