Lauma dalanai tahua ḡaudia baita atomu neganai, eda goada na aonega dalanai baita ḡaukaralaiamu. (1Ko 9:26) Eda tahua ḡaudia ese be durudamu, ina tanobada oromana dikana do se ore neganai, eda nega na baita ḡaukaralaia namonamo. (Efe 5:15, 16) Emui ruma bese tomadihona ai, hesiai laḡanina matamatana ai ba kara diba tahua ḡaudia ba herevalai diba, a? Unu ba kara toma totona, ina hebou pepana ai na ba kara diba tahua ḡaudia haida e herevalai, una na ba lalodia bona ba ḡuriḡurilaidia.​—Iak 1:5.

Heḡereḡere, bema ruma bese na bae ḡaukara hebou neganai, reana idia ese regula painia ḡaukarana bae karaia diba, a? Bema o daradaramu horana be ede ba haḡuḡurua toma, edia noho dalana na oiemu noho dalana heḡereḡerena regula painia taudia haida ba hereva henidia diba. (Her 15:22) Reana, emui ruma bese tomadihona ai painia ta ba intaviu henia. Bena ba badinaia diba sediual-na ta ba torea. Bema oi na guna o painia, ba laloa emu mauri dalana be heḡereḡere hari ma ba painia totona eiava lasi.

Emu ruma bese ai, haida ese hua ta eiava hua haida lalodiai heduru painia ḡaukara bae karaia diba, a? Bema emu goada na dia heḡereḡere, reana dina ta ta ai hora haida ai mo hesiai ḡaukara ba karaia diba. Bema oi na dina iboudiai moni ḡaukara o karamu eiava o skulimu, reana bavabia hidi huana na mai holideina eiava wiken-na na ima. Kalenda ai o uramu ba heduru painia negana ba makaia bena sediual ta ba karaia.—Her 21:5.

INA VIDIO BA HALASIA, PAINIA GOADANA TA AI BAOLA, BENA INA HENANADAI BA HAERELAIA:

• Taihu Aamand ena ekspiriens ese e hadibadamu, Iehova ese bae painia totona sibodia edia ura e dadaraimu taudia be ede e naridia namonamo tomamu?