Ena be Kristen taudia na dia Mose ena Taravatu henunai, to Iehova na e uramu ena haheḡani hereadaedia rua​—Dirava bona dekeda taudia ilalokau henidia karana​—baita badina. (Mt 22:37-39) Una lalokau na se vara kavamu. Namona na baita hahedinaraia. Edena dala ai? Dala badana ta na, dina ta ta ai Baibul baita duahia. Baibul ai Dirava ena kara idauidau baita haerodiamu neganai, “Iehova hairaina” baita itaiamu. (Sa 27:4) Unu amo, eda lalokau ienai be badamu bona ena lalohadai dalana baita badinaiamu. Una ese be durudamu Dirava ena haheḡani, siboda eda ura idadaraina lalokauna baita hahedinaraia haheḡanina danu, baita badinadia. (Ioa 13:34, 35; 1Io 5:3) Baibul duahiduahi ba moalelaia totona heduru herevadia toi bini:

• E vara ḡaudia na lalomu ai ba lalohadailai. Ba laloa oi na unuseni ai. Dahaka o itamu, o kamonaimu, eiava o hairumu? E herevalaidia taudia edia hemami be ede bamona?

• O uramu kahadia bavabi hidi. Dala haida bini: Ba duahi badabada, eiava e rekodia ḡauna ba kamonai bona emu Baibul amo ba badinaia. Dia namo karoa ta ta mo ba duahi, to Baibul ese e herevalaia tauna ta sivaraina eiava Baibul ena topik ta ba duahia. Heḡereḡere, New World Translation of the Holy Scriptures Baibul ena Apendiks A7 eiava B12 ai Iesu sivaraina ba duahia. Dina sirina ai e hetore sirina ena karoa ibounai ba duahia. Baibul bukadia na edia list ai e ato bona unu heḡereḡeredia ba duahi.

• Ba duahi ḡaudia ba lalopararalai. Dina ta ta ai karoa ta ba duahia, ba lalopararalaia bona ba laloa dobu na namo, dia namo karoa momo ba duahi Baibul ibounai ba haorea helaoreana. E vara gabuna ba laloa. E vara ḡaudia ba haero. Mapu bona haheḡereḡere siridia (marginal reference) ba ḡaukaralai. So lalopararalaiamu herevana ta ba hetahulaia. Bema heḡereḡere, nega bada bavato ba lalo dobu totona, emu duahiduahi ai boma kara heḡereḡerena.