Haroro ḡaukara ai baita ḡaukaralai Baibul stadi vidiodia na foa. Unu vidio ta ta e halasi badidia be dahaka?

• Ina vidio Dahaka Dainai Baibul Ba Stadilaia? e karaia badina na taunimanima bae durudia Baibul bae laloa bada, herevana e abi daemu ḡaudia na idauidau. Una vidio ese momo be hagoadadiamu mauri ai henanadai badadia edia haere na Baibul ai bae davaridia diba. Bona Baibul stadi ba noia dalana e herevalaia danu.

• Ina vidio Dahaka Dainai Baibul Ba Stadilaia? (kaha kwadoḡina) na atai ai tame herevalaia vidiona heḡereḡerena to ia na kwadoḡi. Ina vidio na baita ḡaukaralaia diba bema taunimanima na asi edia nega bae herevahereva.

• Ina vidio Baibul Stadi ai be Dahaka E Karamu? e karaia badina na taunimanima bae durudia Baibul stadi program bae ura henia bona Baibul stadi ikarana henanadaidia haida haeredia e heni, heḡereḡere stadi ba noia dalana danu e herevalaia.

• Ina vidio Emu Baibul Stadi Ba Moalelaia na emu Baibul stiuden enai ba hahedinaraia. Ena be ina vidio na Mauri Ba Moalelaia Hanaihanai! bukana ena rau 2 ai e hahedinaraia, to Mauri Ba Moalelaia Hanaihanai! buklet o herevalaia neganai, una vidio ba hahedinaraia. Una vidio ese buka ai mimia ḡaudia e herevalai bona stadi lalonai stiuden ese baine dibadia ḡaudia ma haida e herevalai.

Ena be unu vidio ta ta e karadia badidia na idauidau, to bema mai dalana taunimanima ediai baita hahedinarai o link baita siai diba. Namona na pablisa ese ini vidio iḡaukaralaidia daladia na bae diba namonamo bona haroro ḡaukara ai bae ḡaukaralai namonamo diba.