Hari ina negai disasta na e vara louloumu. Disasta ta e varamu neganai, heduru bae heni haraḡa totona, ḡaukara bae heḡaeḡaelai namonamo na mai anina bada. Una dainai, Gavanin Bodi na brens ofesi ta ta ai Disaster Relief Department e hagini.

Una dipatmen ai e ḡaukaramu tadikakadia na e dibamu disasta e varamu neganai, kara haraḡa una gabu ena kongrigeisin elda e rini henidiamu, unu amo bae diba pablisa be dahaka heduru bae abi. Bema pablisa na dia heḡereḡere una gabu ai e dika ḡaudia bae hanamo, brens ofesi na tadikaka haida e abidia hidimu heduru bae heni totona. Unu tadikaka na volentia haida be noidiamu eiava kohu haida be gwauraimu e dika ḡaudia bae hanamo totona, eiava tadikaka taihu idurudia ḡaudia be hoimu bena be henidiamu.

Una dala e badinaiamu na mai ena namo. Ḡaukara e haharaḡaiamu, daradara na lasi, bona moni eiava kohu na be ḡaukaralai namonamomu, to bema tadikaka na sibodia edia diba ai ḡau be karamu, ḡaukara na basine heau namonamomu.

Brens ese e abidia hidi tadikakadia na bae haeroa relief ḡaukarana ai moni hida bae ḡaukaralai, bona volentia hida bae abidia hidi. Danu, idia ese una gabu ena siahu taudia bae dibadia, unu amo edia heduru amo ḡaukara bae haorea haraḡa diba. Una dainai bema ta na e uramu baine heduru namona na gwaumaoro baine abi guna, gabe amo moni bona kohu baine siai, eiava dika e vara gabunai baine heduru diba.

Disasta e varamu neganai, ita na ta uramu baita heduru. (Heb 13:16) Eda tadikaka na ta lalokau henidiamu! Dahaka baita kara diba? Ḡau badana na, disasta ai dika e davari taudia bona heduru e henimu tadikaka taihu daidiai baita ḡuriḡuri. Danu, kontribiusen baita heni diba tanobada heḡeḡemadai ḡaukarana iduruna totona. Gavanin Bodi ena hahekau henunai, brens ofesi na be dibamu unu kontribiusen be ededia gabu ai bae hedurulai diba. Bema ita na ta uramu baita heduru ina fomu baita hahonua diba, Local Design/Construction Volunteer Application (DC-50).

INA VIDIO BA ITAIA, BRAZIL AI ABATA ESE DIKA BADA E HAVARAIA, BENA INA HENANADAI BA HAERELAIA:

Laḡani 2020 ai, Brazil ai e vara abata murinai, Iehova ena Witnes taudia ese e heni heduru amo dahaka ome diba?