Ta matana ba hakania anina na kara maoromaoro ai ia ba hakaua, o ia ba sisiba henia, o ia ba hadibaia namonamo, eiava ia ba ha-aonegaia. Iehova ese ita e sisiba henidamu badina na e uramu dala maorona ai ia baita tomadiho henia. (Ro 12:1; Heb 12:10, 11) Nega haida ai, matahakani iabina na mai hisihisina, to una ese be durudamu kara maoromaoro baita karaia bona hahenamo baita abimu. (Her 10:7) Matahakani e henimu bona e abimu taudia ese dahaka bae laloatao be namo?

Matahakani ihenina tauna. Elda taudia, tama sina, bona ma haida ese matahakani bae heni neganai, namona na Iehova heḡereḡerena mai edia lalokau bona hebogahisi ida matahakani bae heni. (Ier 46:28) Sisiba aukana na ta ena hekwakwanai heḡereḡerenai bae heni bona mai edia lalokau ida una bae karaia na namo.​—Tit 1:13.

Matahakani iabina tauna. Dala idauidau ai matahakani ta abimu neganai, basita dadaraia to una horana ai baita badinaia na namo. (Her 3:11, 12) Ita na dia ḡoevadae dainai, dala idauidau ai matahakahi baita abi na namo. Reana Baibul ta duahiamu o kongrigeisin heboudiai ta kamonaimu ḡaudia amo matahakani ta abimu. Eiava nega haida, ma haida be hahemaoro komiti amo matahakani e abimu. Bema matahakani baita abia daemu bona baita badinaiamu, hari mauri namona baita moalelaiamu bona vaira negai baita mauri hanaihanaimu.​—Her 10:17.

INA VIDIO BA ITAIA, “IEHOVA ESE E LALOKAU HENIDIAMU TAUDIA NA E MATAHAKANI HENIDIAMU,” BENA INI HENANADAI BA HAERELAIDIA:

• Matamanai Canon ena mauri be ede bamona, bona ede e idau toma?

• Iehova ena lalokau dainai dahaka matahakani e abi?

• Canon ena sivarai amo dahaka ta dibamu?