Nega na e maimu Dirava ena Gavamani na ina tanobada idoinai baine lohiaia bona taunimanima iboudiai na maino bona lalotamona ai bae noho. Salamo 72:7 ai Dirava na e gwauhamata, eto: “Maino danu baine bada.” To edena negai Dirava ena Gavamani na ina tanobada idoinai baine lohiaia? Ina Gavamani be edena dala ai ina tanobada baine lohia? Bona Dirava ena Gavamani baine lohia neganai, oi be ede baine durumu toma?

Baibul na toa momo e perovetalaidia​—unu ese bae hahedinarai Dirava ena Gavamani bainema negana na vada kahirakahira. “Toadia” haida be, tuari, hitolo, gorere, earthquake, bona kara havara.​—Mataio 24:3, 7, 12; Luka 21:11; Apokalupo 6:2-8.

Peroveta herevana ma ta na eto: “Dina gabedia ai nega dikadia do bae vara. Badina be taunimanima na sibodia bae heura heni; moni bae mata ḡaniḡani henia; . . . tamadia sinadia bae gwau edeede henidia; basie hahenamo; basie helaḡa; lalokau basie diba; bae tudaga; bae habade koikoi; bae lebulebu; bae daḡedaḡe; kara namo basie ura heni; . . . bae hereva kava; lebulebu karadia bae ura heni bada, Dirava bae ura henia maraḡi.” (2 Timoteo 3:1-4) Gunaguna be taunimanima haida mo unu e kara tomava. To harihari, taunimanima momo herea vada unu e kara tomamu.

Unu peroveta hereva anidia na laḡani 1914 ai vada e vara matama. Una laḡani murinai tanobada e idau herea dalana na histori itoredia taudia, gavamani taudia, bona buka itoredia taudia ese e herevalaia. Peter Munch (Danish historian) na eto: “Laḡani 1914 ai tuari e vara neganai, ina ese tanobada na e haidaua. Matamanai, taunimanima na e laloava ina tanobada ai mauri na baine namo herea, . . . to iseda nega ai problem e varamu, heḡereḡere, taunimanima na e inai hehenimu, bona gari ai e nohomu.”

To unu dika iboudiai na kahirakahira be oremu. Bona unu dika ese e hahedinaraimu, Dirava ena Gavamani ese ina tanobada idoinai baine lohiaia negana na vada kahirakahira. Iesu ese dina gabedia ai bae vara toa namona ta na ini e herevalaia toma, eto: “[Ina Gavamani] sivaraina namona na tanobada idoinai bae harorolaia, bese iboudiai ihadibalaidia; bena dokona vada baine kau.”​—Mataio 24:14.

Dirava ena Gavamani sivaraina namona na Iehova ena Witnes edia haroro herevana badana. Una dainai, idia edia pablikeisin badana ta ladana e gwauraia, The Watchtower Announcing Jehovah’s Kingdom. Dirava ena Gavamani ese taunimanima bona tanobada baine hanamodia daladia na Iehova ena Witnes ese una pablikeisin amo e herevalaimu.

Haere na ini point 4 amo baita dibamu:

1. Ina tanobada e lohiaiamu politikol taudia na gabeai Dirava ena Gavamani lalonai o ladanai basie lohia dibamu.

2. Ina tanobada ena politikol taudia na basie uramu edia dagi bae ato diho, bona idia ese Dirava ena Gavamani be tuari heniamu na kerere.​—Salamo 2:2-9.

3. Dirava ena Gavamani ese ina tanobada ena politikol gavamani iboudiai na baine haoredia vaitani, ena be idia na e ura dikamu taunimanima doini bae lohiadia. (Daniel 2:44; Apokalupo 19:17-21) Baibul ese ina tanobada ai baine vara tuari ginigabena ladana na e gwauraia, Aramagedono.​—Apokalupo 16:14, 16.

4. Dirava ena Gavamani bae badinaia taudia iboudiai na Aramagedono amo bae roho mauri bena tanobada matamata ai bae noho. Baibul na eto, idia na “hutuma bada-herea,” reana milion milion momo.​—Apokalupo 7:9, 10, 13, 14.

Dirava ena Gavamani henunai bae noho taudia ese bae karaia ḡau ginigunana binai: Dirava do bae dibaia. Oibe, Iesu na Dirava e ḡuriḡuri henia neganai, ia na eto: “Mauri hanaihanai binai: idia ese oi Dirava Korikori tamona bae dibamu, bona Iesu Keriso danu, oi ese o siaia tauna.”​—Ioane 17:3.

Iehova Dirava bae dibaia taudia na dala momo ai heduru be abimu. Mani unu dala rua aita herevalai: Ginigunana: Idia ese Dirava e abidadama heniamu karana na be goadamu. Una anina na idia ese be abia daemu, Dirava ena Gavamani na momokani bona be lohiamu negana na vada kahirakahira. (Heberu 11:1) Iharuana: Idia ese Dirava bona dekedia taudia e lalokau henidiamu karana na be bada be laomu. Dirava bae lalokau henia taudia na mai lalodia idoinai ida Dirava ena taravatu bae badina. Dekedia taudia bae lalokau henidia taudia na Iesu ena sisiba bae badinaia (Golden Rule). Iesu ena sisiba binai: “Umui na o uramu taunimanima ese bae kara henimui karana na umui ese unu mo ba kara henidia toma.”​—Luka 6:31.

Tama ta mai lalokauna ese natuna ena namo e laloa badamu heḡereḡerena, eda Dirava danu unu e kara tomamu. Ia e uramu baita abia maurina na Baibul ese e gwauraia, “mauri korikori.” (1 Timoteo 6:19) Hari ina nega maurina na dia “mauri korikori.” Badina taunimanima hutuma edia mauri na auka bona e hekwarahimu. Oi ese una “mauri korikori” anina ba diba totona, namona na Dirava ena Gavamani ese ena taunimanima baine hanamodia daladia ma haida ba dibadia.