Oi ese o laloamu ina tanobada ai e varamu hekwakwanaidia be baita haoredia diba, a? Unu baita kara toma totona, namona na hekwakwanai e varamu badidia baita diba guna na namo.

Ina haheitalai ba laloa: Tau ta ladana Tom na e gorerea bona gabeai madi e mase. Ia be dahaka dainai e mase? Una hospele ai Tom e duruava doktana ta na ini e gwau toma: “Gorere toana (symptom) ginigunadia e hedinarai neganai, dokta iboudiai na [Tom] ese gorere e abia badina na asie tahua namonamo.” Toana na unu dokta ese hisihisi bae hamaraḡi medicine o muramuradia mo Tom e heniava.

Taunimanima ese ina tanobada ai hekwakwanai be unu bamona e hanamo tohomu, a? Heḡereḡere gavamani na taravatu momo e atomu, security camera e ḡaukaralaimu, bona police taudia edia namba e habadamu badina e laloamu unu dala amo taunimanima na crime o taravatu iutudia karadia bae hadoko. To unu hekwakwanai na se maraḡimu. Taunimanima edia lalohadai, hemami, bona ura na edia kara ese e hahedinaraimu.

South America ena ogoḡami tanona ta ai e nohomu tauna ta, Daniel, na ini e gwau toma: “Gunaguna emai mauri na namo herea. Henaohenao (armed robbery) taudia garidia na asia gariva. To harihari, emai town o hanua ai taunimanima na gari ai e nohomu. Ogoḡami na bada dainai, taunimanima momo na e mataḡaniḡanimu, mauri asie matauraimu, o ma haida edia kohu eiava moni e henaomu.

Tuari dainai Elias na Middle East e heautania bona gabeai ia na Iehova ena Witnes ta ai ela. Ia na ini e gwau toma: “Egu city ai e nohova memerodia bona tataudia na edia family, politikol taudia, bona dubu taudia ese e hagoadadiava tuari ai bae vareai bena ladadia bae bada. Inaidia danu unu e hahegoadadia tomava! Lau na unu amo na itaiava, taunimanima ese hekwakwanai iboudiai na basie haore diba.”

Baibul na ini e gwau toma, eto:

• “Edia lalo-hadai be didika, maraḡidia negadia ela.”​—Genese 8:21.

• “Taunimanima lalodia na koikoi herea bona dika rohoroho, daika ese baine dibadia?”​—Ieremia 17:9.

• “Tau lalona amo e daemu ḡaudia bini: lalo-hadai dikadia; ala-ala; . . . mata-bodaga; henao; hahebade koikoi.”​—Mataio 15:19.

Taunimanima na asi dibadia lalohadai dikadia, hemami dikadia, bona ura dikadia be ede bae haoredia toma. Unu daidiai hekwakwanai na e bada e laomu, atikol gunana ai ta duahia heḡereḡerena. (2 Timoteo 3:1-5) Hari, taunimanima edia aonega na bada bona herevahereva daladia na momo, dia guna heḡereḡerena. To dahaka dainai ita ese ina tanobada ai hekwakwanai na basita haoredia dibamu? Eiava dahaka dainai ita na dia heḡereḡere hekwakwanai baita haorea? Ina tanobada ai hekwakwanai bae ore diba, a?

Herevana ita ese taunimanima baita durudiamu edia kara dikadia amo bae helalo kerehai, to dahaka dainai ina tanobada ai hekwakwanai iboudiai na basita haoredia dibamu? Badina be taunimanima edia aonega bona goada na mai hetoadia.

Baibul na eto: “Taunimanima ena raka na ia sibona ese basine gwauraia hidi.” (Ieremia 10:23) Una anina binai: Dirava ese ita e karada na dia ita  siboda baita helohia, dia taunimanima ma haida baita lohiadia, dia davara lalonai baita noho, o dia guba ai baita noho totona.

To, ina henanadai ba laloa: Taunimanima e uramu ita ese baita hadibadia dahaka bae kara, o dahaka be maoro bona dahaka be kerere, a? Eiava sina bogana lalonai beibi ihamasena karana, o natu inaridia daladia eiava topik unu bamodia ai, taunimanima e uramu baita doridia eda lalohadai bae badina, a? Ḡau ini bamodia ese taunimanima na e hapararadiamu. Una dainai, Baibul ena hereva na maoro. Ita na asi eda siahu o asi eda maoro taunimanima ma haida baita lohiadia. To, daika baita noia ita baine duruda?

Bema Dirava na ita e karada, namona na ia baita noia ita baine duruda! Ena be taunimanima haida e lalomu Dirava ese ita na vada e laloda boio, to Baibul ese e hahedinaraia Dirava ese ita na e lalodamu. Bona Baibul ena aonega hereva anidia baita lalopararalaimu neganai, ita siboda eda aonega bona goada hetoadia na baita lalopararalaimu danu. Dia una mo, to taunimanima e hisihisimu badidia danu na baita lalopararalaimu. German tauna (philosopher) ta na ini e gwau toma: “Taunimanima bona gavamani na idaunegai e vara dika idauidau amo ḡau ta asie dibaia, bona idia ese dika na doini e havaraiamu.”

Baibul na eto: “Tau ta na ena kara namodia amo e hamomokanimu ia na aonega tauna.” (Luka 7:35, NWT) Haheitalai ta na Isaia 2:22 (NWT) ai, unuseniai aonega herevana na eto: “Taunimanima ta basio abidadama henia.” Una hereva na ita e durudamu dainai, ita na taunimanima edia gwauhamata koikoidia ta dadaraimu. North America ena city ta ai daḡedaḡe karana na bada, bona unuseniai e nohomu tauna ta ladana Kenneth na ini e gwau toma: “Hanaihanai politikol taudia iboudiai e gwauhamatamu, etomu, ḡau iboudiai bae hanamo, a ḡau ta asie karaiamu. Una ese e hamomokaniamu Isaia 2:22 ena hereva na momokani, eto, taunimanima na namo ta basie havaraia diba.”

Paragraf ginigunadia ai e hereva tauna, Daniel, na ini e gwau toma: “Dina ta ta ai, e varamu ḡau dikadia amo na itaiamu, taunimanima ese ma haida na basie lohiadia namonamo dibamu. . . . Herevana bank account ai oi na mai emu moni, o mai emu retirement monina, to vaira nega ai oi na dounu basio moalemu. Lau dibagu taudia haida na matamanai unu bamona ḡaudia ai e tabekauva, to gabeai edia moni ibounai e ore.”

Baibul na ita e durudamu dainai, ita na taunimanima edia gwauhamata koikoidia ta dadaraimu. To, sivarai ma ta amo baita itaiamu, Baibul ese tauhalo o helaro na ita e henidamu danu.