Baibul education na mai siahuna mauri baine hamaoromaorodia. Ini sivarai rua mani ba duahidia: Ricardo bona Andres.

RICARDO: Laḡanigu 15 neganai, lau na gang eiava raskol grup ta na joinia. Bamogu matamatadia daidiai egu mauri na e idau. Egu plen na dibura rumana ai bae atogu, laḡani 10 lalodiai unuseniai baina noho! Reana oi na bo laloamu una na plen kavakavana. To dibura ruma ai laḡani momo e noho taudia na egu gabu taudia ese e ura henidiava bona e matauraidiava. Una dainai, lau na na urava dibura taudia baina tohotohodia.

Raskol taudia ese e ura heniva ḡaudia iboudiai na lau ese na ura heniva danu, haida bini, drag, sex, bona daḡedaḡe karana. Hanuaboi ta ai, lau na ma haida ida a hepidi heheniva. Lau na na laloava vada be pidigu masemu, to egu ai dika ta se vara. Una murinai, lau na lalogu na hadaia egu mauri bona egu ura ḡaudia baina haidau na namo. To lau ese senisi be ede baina karaia toma? Daika enai heduru baina abia na namo?

Varavaragu momo na asie moaleva. Idia edia mauri danu na hekwakwanai amo e honu. To, sinagu tadina ta mai ena famili ida edia mauri na idau. Lau dibagu idia na taunimanima namodia bona Baibul ena taravatu e badinava taudia. Nega ta ai idia ese lau e hadibagu Dirava ladana na Iehova. Una dainai, hepidi heheni karana e ore neganai, maoromaoro lau na Iehova na ḡuriḡuri henia, bona egu ḡuriḡuri ai Dirava ladana na hatoa bona ia na noia baine durugu. Hoa ḡauna na, dina iharuana ai, Iehova ena Witnes ta na egu ruma iduarana ai e kokokoko! Una JW tauna na egu Baibul teacher ai ela.

Una murinai hahetoho badana ta na egu ai e vara. Bamogu gunadia na e riniva, e noiguva idia baina bamodia totona. Ena be idia e ura dikava, to idia na hamaorodia, “Lasi.” Lau na lalogu vada na hadaia Baibul baina stadilaia noho, bona egu mauri dikana na basina lou henia! Lau egu mauri na e idau haraḡa, bona moale korikorina na davaria.

Lau na na helalotaomu, egu ḡuriḡuri ai egu plen na Dirava na hamaorolaia, nato, nega ta ai lau na dibura ruma ai bae atogu bona laḡani 10 lalodiai unuseniai baina noho, unu amo lau na raskol grup ena memba ta bae gwauraigu bena kominiti taudia ese bae matauraigu. To harihari, lau na Dirava na noiamu baine durugu nega iboudiai taunimanima baina haroro henidia bona baina durudia, matamana ai JW ta ese lau e duruguva heḡereḡerena. Dirava ese egu ḡuriḡuri na e haerelaia, badina lau na laḡani 17 lalodiai Dirava isiaina na lao heni hanaihanaimu! Bona ma ta bini: Lau na dibura rumana asinala.

Bamogu gunadia momo na laḡani momo dibura ruma ai doini e nohomu. Ma haida na vada e mase. Lau ese vavagu mai ena famili ida na tenkiu henidiamu. Idia na e urava bae idau badina idia na Iehova ena Witnes bona Baibul ena taravatu e badinava. Harihari lau ese unu JW taudia na matauraidia bada hereamu​—gunaguna be raskol grup taudia na matauraidiava. Bona hereadaena be, lau ese Dirava na tenkiu henia badamu badina be mauri hereadaena e hadibagumu.

 ANDRES: Lau na vara bona na bada gabunai drag, henaohenao, ala-ala, bona matabodaḡa karadia na bada. Tamagu na e inuinu momova bona cocaine drag e ani hanaihanaiva. Nega iboudiai ia na sinagu ida e heaiva bona e heatuva.

Lau na maraḡigu amo vada na inuinuva bona drag na ḡaukaralaiva. Nega momo lau na street ai na loa kava loa kavava, na henaohenaova bena na henaoava ḡaudia na na hoihoilaidiava. Lau na badava lalonai, tamagu ese lau na e hakaugu kerereva, lau e hadibaguva edena dala ai country lalonai drag bona illegal product idauidau baina vareailaidia bona baina hoihoilaidia. Lau na moni badana taina na abiava. Bena dina ta ai, police na egu ruma ema. Idia ese lau e arrest, bona kota ese lau na ala-ala dainai e siaigu laḡani 5 lalodiai dibura ruma ai baina noho.

Daba ta ai, ofesa ta na loudspeaker amo dibura taudia e noidiava baela Iehova ena Witnes ida Baibul bae ha herevalaia. Lau na una hebou nala. Bona una hebou ai na kamonai ḡaudia na na abidia dae dainai, Iehova ena Witnes ida Baibul vada na stadilaiava. Idia na Baibul amo Dirava ena taravatu e hadibalaiguva.

Dibura rumana ai lau ida a noho hebouva taudia haida na lau e hagariguva, badina asie urava lau na Baibul baina stadilaia. Lau na unu amo na lalopararava lau sibogu ese sensi na basina karaia diba, to heduru baina abia na namo. Una dainai, Iehova na ḡuriḡuri heniava, na noiava goada bona aonega baine henigu bona baine durugu. Dia una mo, to lau ese e hagariguva taudia na Baibul amo na haroro henidiava danu.

Dibura ruma amo bae halasigu negana e kau neganai, Iau na gari mamina ese e abigu dainai na urava dibura rumana ai taina do baina noho sisina! Dibura ruma amo na raka lasiva lalonai, dibura taudia haida na imadia e davedaveva, lau e goodbye heniguva. Idia haida na mai hebogahisidia ida e gwauva, “Pastor, madi emu ruma vada baola.”

Lau na asi dibagu egu ai be dahaka bema vara bema Dirava ese basinema hadibagu negana ai. Una dainai, lau ese Dirava na tenkiu henia bada bada hereamu, badina ia ese lau na e lalokau henigumu bona tau namona ta ai e halaogu. a