United Nations na taunimanima iboudiai e hagoadadiamu bae ḡaukara hebou, human rights bae matauraia, bona eda planet o environment bae gimaia. Dahaka dainai UN na unu e hahegoada tomamu? Maher Nasser na UN Chronicle ai ini e haere toma: “Ina tanobada ai nega (climate o weather) e idauidaumu, orea haida e henaohenaomu, ogoḡami taudia edia ogoḡami e badamu bona taḡa taudia edia taḡa e badamu, tuari idauidau, refugee taudia na momo herea, terorist karadia, gorere idauidau, bona hekwakwanai ma haida na taunimanima ibouboudiai ediai e varamu.”

Taunimanima ma haida e laloamu, gavamani tamona ese tanobada idoinai baine lohiaia na namo. Una lalohadai e gwauraia taudia rarua be ini: (1) Dante, ia na Italy tauna, philosopher bona statesman, bona vada e mase (1265-1321), bona ma ta be (2) Albert Einstein, ia na scientist ta (1879-1955), bona ia danu vada e mase. Dante e laloava, ina tanobada ai maino na basie vara dibamu, badina politikol taudia edia lohia daladia na idauidau. Ia na Iesu ena hereva e gwauraia lou, eto, “Bema gavamani ta baine parara, ia na dika do baine davaria.”​—Luka 11:17, NWT.

World War II murinai, tuari taudia ese atomic bomb rua amo taunimanima hutuma e hamasedia neganai, Albert Einstein ese General Assembly of the United Nations na e tore henidia. Ia na eto: “United Nations ese ḡau ta baine karaia haraḡa na namo, reana gavamani tamona baine haginia, unu amo ina tanobada ai maino baine havaraia.”

To, una gavamani tamona ese ina tanobada idoinai baine lohiaia neganai, o laloamu ena politikol taudia ese hekwakwanai iboudiai bae haore, eiava idia ese corruption bona daḡedaḡe karadia bae dadarai vaitani, a? Eiava idia ese lohia taudia gunadia edia kara dikadia be tohotoho loumu, a? Unu henanadai daidiai, ita ese Lord Acton (England tauna bona historian) ena hereva baita laloa, eto: “Siahu taudia na taunimanima e hahisidiamu, bona e uramu dagi badadia bae abi taudia haida ese edia dika na e habadamu.”

Taunimanima na maino ai bae noho totona, namona na lalotamona ai bae noho. To, edena dala ai? Ina tanobada ai maino baine vara diba, a? Baibul na eto, oibe. To, dia mataḡaniḡani o hekokoroku politikol taudia ese e hagini gavamanidia amo maino na baine havaraia. Lasi, una na Dirava ese baine haginia gavamanina ese ina tanobada ai maino baine havaraia. Danu, una gavamani ese baine hahedinaraia Dirava mo sibona ese e karadia ḡaudia iboudiai baine biagudia na maoro. Una be edena gavamani? Baibul ese ini e gwauraia toma, God’s Kingdom o “Dirava ena Gavamani”.​—Luka 4:43; NWT.

Iesu Keriso na Dirava ena Gavamani e laloava dainai, ena ḡuriḡuri na ini e gwauraia toma: “Emu [Gavamani] bainema. Emu ura ḡauna na tanobada ai baine vara na namo.” (Mataio 6:9, 10, NWT) Oibe, Dirava ena Gavamani ese Dirava ena ura ḡauna na tanobada ai baine haḡuḡurua vaitani​—una Gavamani ese mai edia mataḡaniḡani o hekokoroku politikol taudia edia ura ḡauna na basine karaia.

Baibul ai Dirava ena Gavamani na e gwauraia, “guba Gavamanina” danu. (Mataio 5:3; NWT) Badina una Gavamani na guba amo tanobada baine lohiaia. Una nega ai dahaka baine vara? Dirava ena Gavamani na tanobada taudia edia amo ttax monidia basine gogo. Una dainai, taunimanima na una Gavamani henunai bae noho mai moaledia ida!

Dirava ena Gavamani na Iesu Keriso ese baine lohiaia, badina Dirava sibona ese Iesu na King ai e halaoa bona Baibul na eto:

• “[Gavamani] na ia paḡana ai baine heato . . . Iena [gavamani] na be bada be laomu bona maino na basine dokomu.” ​—Isaia 9:6, 7; King James Version.

•   “Bena lohia siahuna e henia, bona hairai bona [gavamani ta] danu, bese idau-idau . . . bona gado idau-idau iboudiai ese ia isiaina bae lao heni helaoreana; iena lohia siahuna na [do basine doko].” ​—Daniel 7:14; NWT.

• “Tanobada [gavamanina] na eda Lohiabada bona ena Keriso [ena Gavamani] ai vada ela.”​—Apokalupo 11:15; NWT.

Iesu ena ḡuriḡuri anina baine ḡuḡuru totona, Dirava ena Gavamani ese Dirava ena ura ḡauna na tanobada ai baine haḡuḡurua vaitani. Una gavamani henunai, taunimanima iboudiai na tanobada inarina dalana bae dibaia, unu amo ia na gabu ḡoevadaena ai bainela bona tubutubu ḡaudia bona animal na bae momo herea.

Kara hereadaena binai: Dirava ena Gavamani ese ia henunai bae noho taudia iboudiai na baine hadibadia ḡoevaḡoeva. Idia iboudiai na taravatu tamodia bae dibadia. Idia na lalotamona ai bae noho. Isaia 11:9 na eto: “[Idia na] basie hahehisi bona basie hahebua tari, egu ororo helaḡana idoinai ai; badina be tanobada na Iehova idiba-maorona ai baine honu, davara ena honuhonu-dae na heto.”

Una negana ai tanobada heḡeḡemadai, taunimanima ibouboudiai na lalotamona bona maino ai bae noho momokani​—gunaguna United Nations e urava taunimanima na unu bema noho toma. Salamo 37:11 na eto: “Maino ena harihari-bada idia ese bae moalelaia.” Nega ta ai, hereva ini hetomadia na vada be boio vaitanimu: “Raskol,” “pollution,” “hitolo,” bona “tuari.” To edena negai bona edena dala ai Dirava ena Gavamani na ina tanobada idoinai baine lohiaia? Bona una Gavamani baine lohia neganai, oi be ede baine durumu toma? Mani aita itaia.