Nega ta Canada ai private skul ta na plan e karaia gabu ta ela. Una gabu ai teenage student memerodia haida ese student merona ma ta e reipia. Una hekwakwanai e vara murinai, niuspepa ta (Ottawa Citizen) ai Leonard Stern na ini e gwau toma: “Ena be matamata taudia na mai aonegadia, skul namodia be laomu, bona edia family na taḡa taudia, to idia na dounu kara dikadia be karamu.”

Leonard Stern ma eto: “Oi reana bo laloamu ḡau badana na tama o sina ese natudia bae hadibadia dahaka be maoro bona dahaka be kerere. To lasi, idia momo na natudia e hagoadadiamu skul ai maka namodia bae abi, unu amo moni ḡaukara namona bae abia, bona gabeai, taḡa taudia ai baela.”

Vaia, baita skul na ḡau badana. To, skul namodia danu asi dibadia edena dala ai student ta bae durua ura kereredia o lalohadai dikadia baine dadaraidia totona. So oi ese o laloamu diba maorona be edeseniai baita abia na namo?

Baibul na mirror ta na heto. Una buka ese be durudamu eda kerere bona manoka ḡaudia baita ita ḡoevaḡoevamu. (Iakobo 1:23-25) Baibul ese danu ita be durudamu senisi baita karamu, unu amo maino o lalotamona e havaramu karadia baita hahedinaraimu. Unu kara haida bini: Kara maoromaoro, hebogahisi, haheauka, boga-auka, bona lalokau. Bona Baibul na eto: “Lalokau . . . na ihatamonada ḡauna herea-daena.” (Kolose 3:14) Dahaka dainai lalokau na kara hereadaena? Baibul ese una kara e herevalaia dalana mani aita itaia.

• “Lalokau na e haheauka taritarimu; lalokau na mai ena heabi-dae; asi ena hebore [eiava se mamamu]; se heaḡimu; se hekokorokumu; se kara havaramu; sibona ena ḡau se tahumu; se badu haraḡamu; ihadikalaina karadia se lalo taomu; kara gageva-gageva [eiava kara dikadia] se moalelaimu, a hereva momokani e moalelaimu; ḡaukara iboudiai e goadalaimu [eiava ḡau iboudiai lalodiai e gini goadamu]; . . . dika iboudiai e haheauka henimu. Lalokau na se dokomu.”​—1 Korinto 13:4-8; NWT.

• “Lalokau ese dekemu tauna se hadikaiamu.”​—Roma 13:10.

• “A herea-daena binai: ba heura heheni mai lalomui idoidiai, badina be uraheni ese kara dika momo e tahunimu.”​—1 Petro 4:8.

Dahaka dainai e lalokau henimumu taudia dekedekediai o nohomu neganai, oi na so garimu? Badina be oi dibamu idia ese oi na e lalomumu bona basie hahisimumu.

Danu, lalokau taudia na taunimanima ma haida edia namo e lalo badamu dainai, edia mauri daladia e haidaumu o sacrifice momo e karamu. Haheitalai binai: George na tubuna merona e vara neganai, ia na e ura dikadikava beibi dekedekenai baine noho. To, George na mai siga anina, bona ravana tauna na se urava George na beibi badinai siga baine ani. Una dainai, George be dahaka e kara? Ena be ia na laḡani 50 lalodiai siga vada e ani, to ia na beibi ena namo e laloa bada dainai siga ani karana e hadokoa. Oibe, lalokau ese taunimanima edia mauri na baine haidaua diba!

 Namona na tama o sina ese lalokau ihahedinaraina dalana na natudia bae hadibalaia. Lalokau taudia na natudia e ubudiamu, e gimadiamu, bona e beromu o e goreremu negadiai e durudiamu. Lalokau taudia na natudia ida e herevaherevamu o e hadibadiamu. Danu, lalokau taudia ese natudia matadia na e hakanimu o e sisiba henidiamu, anina na Dirava ena Hereva amo e hadibadiamu dahaka be maoro bona dahaka be kerere. Ma danu, lalokau taudia na haheitalai namona e hahedinaraiamu dainai, natudia ese e tohotohodiamu.

To madi, taunimanima haida ese lalokau ihahedinaraina dalana na natudia asie hadibalaidiamu. Una anina be, idia natudia be vada taunimanima dikadia ai be laomu, a? Lasi, idia na taunimanima namodia ai baela diba! Badina ena be tama haida o sina haida na lalokau asie hahedinaraiamu bona kara dikadia e karamu, to idia natudia na edia mauri e haidau bona taunimanima namodia ai ela. Sivarai gabena ai baita itaiamu taunimanima rarua na edia mauri e haidau, ena be ma haida e laloava idia na unu basie kara toma!